ADESUA 24

Nahorɛ Dwirɛ Beni Yeɛ Ɔfa Abɔfoɛ Nwo Ɔ?

BƆ

Yehowa pena kyɛ yesua y’abusua bɔ bɛwɔ anwuro nanwo nikye. Bɛbɔ bɛwɔ sɔ abusua he anu yeɛ ole abɔfoɛ bɔ bɛfrɛ bɛ “Nyameɛpiri mmaamɔ” ne. (Yob 38:7) Nzu yeɛ Bible ne kã fa abɔfoɛ nwo ɔ? Ngɛndɛensoɛ beni yeɛ bele ye wɔ sona so ɔ? Aso abɔfoɛ mukoraati yeɛ bɛboka Nyameɛpiri abusua naso anaa?

1. Abɔfoɛ te nwamɔ?

Yehowa bɔle abɔfoɛ kora yeɛ ɔbɔ aseɛ ne ɔ. Tekyɛ Yehowa ne, bɛ koso bɛte honhom bɔ anyeɛ ngora nwu bɛ, bɔ bɛwɔ anwuro ɔ. (Hebrifoɛ 1:14) Abɔfoɛ million pẽe yeɛ bɛwɔ berɛ ɔ, na benu biala da nzorɛ. (Nyekyire 5:11) “[Yehowa] fa ye dwirɛ soma bɛ, na betie ye komvi.” (Edwein 103:20) Wɔ tete mmerɛ nanu ne, ɔtɔ mmerɛ bie a, né Yehowa soma abɔfoɛ maa bɛfa ye dwirɛ bɛkɔma ye mmenia, né bɛboka bɛ, na né bedé bɛ befi ɔhaw nu. Ɛnnɛ, abɔfoɛ kyire Kristofoɛ atẽe maa bɛkɔ mmenia bɔ bɛpena kyɛ besua Nyameɛpiri nwo dwirɛ ne berɛ.

2. Satan ne ye adaemoni te nwamɔ?

Abɔfoɛ nanu biemɔ anni nahorɛ aama Yehowa. Abɔfoɛ bɔ olimoa tele atuã “yeɛ ole Satan Abɔnzam bɔ ɔlakalaka aseɛ sofoɛ mukoraati” ne. (Nyekyire 12:9) Né Satan pena kyɛ odi afoforɛ so, yeti ɔlakalakale mmenia bɔ belimoa ne, na ye sĩ ne ɔlakalakale abɔfoɛ koso maa bɛɛbokale yeso wɔ ye atuã telɛ nanu. Bɛfrɛ sɔ abɔfoɛ bɔ bɛtele atua ne adaemoni. Yehowa tole bɛ fili anwuro guale aseɛ so, na ɔkɔsɛkye bɛ.—Kenga Nyekyire 12:9, 12.

3. Atẽe beni aso yeɛ Satan ne ye adaemoni bɔ mmɔden kyɛ bɛkɔlakalaka yɛ ɔ?

Satan ne ye adaemoni fa sunzum nu dwirɛ bɔ yeɛ ole, mmɔden bɔ ebie bɔ kyɛ ɔne ahonhom kodwudwo so lakalaka mmeni pẽe. Kyɛ nneasoɛ ne, mmenia biemɔ nate bɛbɔ bɛnea nzramaa nu, bɛbɔ bɛkã kyẽabie dwirɛ, bɛbɔ bɛye ngonyaa, ɔne kɔmeɛ so dwudwo. Afoforɛ koso fa bɛnwo wura anwonyerɛ salɛ bɔ ahonhomzɛmlilɛ wɔnu nu. Ebiemɔ koso lakalaka bɛnwo kyɛ bɛkɔhora ne awufoɛ kodwudwo. Nakoso Yehowa bɔ yɛ kɔkɔ kyɛ: “Nnɛmɔ kɔ ebie bɔ ɔfrɛ ɛnwomẽe anaa adinzifoɛ berɛ.” (Levitikɔs 19:31) Ɔfa sɔ kɔkɔbɔ he ma yɛ kyɛbɔ ɔkɔyɛ a, ɔkɔbɔ yɛnwo waen kofi Satan ne ye adaemoni nwo ɔ. Bɛte Nyameɛpiri pɔfoɛ na bɛpenakyɛ bɛpira yɛ.

SUA PẼE BOKASO

Sua nningyein pá bɔ abɔfoɛ yɛ, asane bɔ ɔwɔ ahonhomzɛmlilɛ nu ɔne kyɛbɔ yɛkɔhora yɛkɔbɔ yɛnwo waen yekofi Satan ne ye adaemoni nemɔ nwo ɔ.

4. Abɔfoɛ boka mmenia maa besua Yehowa nwo nikye

Nyameɛpiri abɔfoɛ ne mmenia ndwudwo tẽe. Mmom bekyire Nyameɛpiri asomvoɛ atẽe bɛkɔ mmenia bɔ bɛpena kyɛ besua Yenwo dwirɛ ne berɛ. Kenga Nyekyire 14:6, 7, na susu nzɛmmisa hemɔ anwo:

Nzuati yeɛ yɛhia abɔfoɛ nemɔ mmokalɛ na yahora yahã nzɛmba ne ɔ?
Kyɛbɔ abɔfoɛ ne kyire mmenia atẽe kɔ bɛbɔ bɛpena kyɛ besua Bible ne berɛ ne, aso ɔmaa enya akokoduro anaa? Nzuati ɔ?

5. Pó ahonhomzɛmlilɛ

Satan ne adaemoni nemɔ te Yehowa pɔfoɛ. Yɛkoso bɛte yɛ pɔfoɛ. Kenga Luka 9:38-42, na susu nzɛmmisa he anwo:

Sɛɛ yeɛ adaemoni nemɔ ne mmenia di ɔ?

Ɔzɛnkyɛ yɛmaa adaemoni nemɔ ba y’asetena nu. Kenga Deuteronomi 18:10-12, na susu nzɛmmisa hemɔ anwo:

Atẽe beni aso yeɛ adaemoni nemɔ bɔ mmɔden kyɛ, bɛne yɛ koli ngitahoɛ na banya yɛso ngɛndɛensoɛ ɔ? Ahohomzɛm nu neyeɛe beni yeɛ wabuso wɔ nekaa bɔ ɛwɔ ne ɔ?
Edé tonu kyɛ Yehowa kyi ahonhomzɛmlilɛ anaa? Nzuati ɔ?

Bɔ VIDIO ne, na susu nzɛmmisa bɔ olili so hemɔ anwo.

VIDIO: “Ɛmɔsi Abɔnzam Atẽe” (5:02)

Edédi kyɛ sɛbɛ bɔ ne ɔla Palesa awa brasua ne sa ne ttemayé anaa? Nzuati ɔ?
Nzu yeɛ ne odikyɛ Palesa yɛ, ne wahora wabɔ yenwo waen wafi adaemoni nemɔ nwo ɔ?

Nahorɛ Kristofoɛ ahɔso apó adaemoni nemɔ. Kenga Asomafoɛ Ne Nnwumaa 19:19 ɔne 1 Korintofoɛ 10:21, na susu nzɛmmisa he anwo:

Nzuati yeɛ yenwo hia kyɛ ɛsɛkye nikye biala bɔ ele ye, bɔ ɔne ahonhomzɛmlilɛ le abusuabɔ ɔ?

6. Di ngunim wɔ kõɛ bɔ ɛne Satan ne ye adaemoni kõ nanu

Satan yeɛ odi adaemoni nemɔ so ɔ. Nakoso, ɔbɔfo panyi Michael bɔ osa te Yesu dumaa ne, yeɛ okyire abɔfoɛ nahorɛfoɛ nemɔ atẽe ɔ. Tumi beni yeɛ Michael le ye ɔ? Kenga Nyekyire 12:7-9, na susu nzɛmmisa hemɔ anwo:

Michael ne ye abɔfoɛ, ɔne Satan ne ye abɔfoɛ, nwamɔ yeɛ bele tumi paa ɔ?
Esusu kyɛ yenwo hia kyɛ Yesu sĩlilɛfoɛ suro Satan ne ye adaemoni nemɔ anaa?

Ɛkɔhora koli ngunim wɔ kõɛ bɔ ɛne Satan ne ye adaemoni nemɔ kõ nanu. Kenga Yakobo 4:7, na susu nzɛmmisa he anwo:

Ɛkɔyɛ sɛɛ na abɔ wɔnwo waen afi Satan ne adaemoni nemɔ anwo?

EBIEMƆ KÃ KYƐ: “Bɔne biala nné nu kyɛ ɛkɔbɔ game anaa ɛkɔnea vidio bɔ ahonhomzɛmlilɛ wɔ nu ɔ. Yɛfa yɛgyegye yɛnye mbaen.”

Nzuati yeɛ sɔ adwene ne yɛ suro ɔ?

YEMUABƆLƐ

Abɔfoɛ nahorɛfoɛ boka yɛ. Satan ne ye adaemoni ne te Yehowa pɔfoɛ, na bɛfa ahonhomzɛmlilɛ so bɛlakalaka mmenia.

Ndimu

Atẽe beni yeɛ Yehowa abɔfoɛ nate so boka mmenia maa besua yenwo nikyee ɔ?
Satan ne ye adaemoni te nwamɔ?
Nzuati yeɛ ɛpena kyɛ ɛtwẽ wɔnwo fi ahonhomzɛmlilɛ nwo ɔ?

Yafa adesua ne yadwu:

Botaeɛ

Susu yenwo nea kyɛ ele nningyein bie bɔ ebia ɔne ahonhomzɛmlilɛ le abusuabɔ, na bɔ mbaeɛ pena nworɛ bɔ ɔkɔboka wɔ maa ekosi gyinaeɛ, na anwu bɔ ɛkɔyɛ wɔ yenwo ɔ.

Anaakyɛ:

Wɔ botaeɛ foforɛ