FIANARA 24

Ino ty Marina Mikasiky ty Anjely?

HANENTY

Teani-Jehovah hahay ani-fianakaviany an-danitsy any reo tsika. Anatini-fianakaviany anjely reo. Kaihy hoe “anaki-Ndranahary” rozy. (Joba 38:7) Ino ty raha volanini-Baiboly mikasiky ty anjely? Manino ro misy vokany amintsika ty raha ataon-drozy? Anatini-fianakavia-Ndranahary iaby va lafa atao anjely?

1. Ia anjely reo?

Namoro ani-anjely reo Jehovah talohani-namoronany ani-tany toy. Tsy hita maso manahaky ani-Jehovah rozy sady mipetraky an-danitsy any. (Hebreo 1:14) An-tapitrisany ty anjely sady samby mana ty maha ie azy. (Apokalypsy 5:11) “Manatanteraky ty [baikoni-Jehovah] noho mijanjy ty feony” rozy. (Salamo 103:20) Naniraky anjely Jehovah taloha mba handay hafatsy, na hanampy noho hanavotsy ty vahoakiny. Mitariky ty Kristiana ty anjely henanizao mba handeha amy ze olo maniry hianatsy mikasiky a-Ndranahary any.

2. Ia Satana noho demoniany reo?

Nisy anjely maromaro nivaliky tamy Jehovah. “Kaihy hoe Devoly noho Satana” anjely nivaliky voalohany iny, le “mamitaky ty tany iaby misy olo” ie. (Apokalypsy 12:9) Ta ho mpanday Satana ka nifitahiny Adama noho Eva, amy zay tsy hanoriky ty safàni-Jehovah. Nitarihiny hivaliky amy Jehovah koa ty anjely sisany. Anjely nanoriky ani-Satana rey ro kaihy hoe demonia. Niroasini-Jehovah baka an-danitsy any rozy, le natontany tan-tany etoy. Haripakiny tanteraky rozy amy hoavy.—Vakio Apokalypsy 12:9, 12.

3. Akory ty ataoni-Satana noho demoniany reo mba hamitaha antsika?

Mamitaky olo maro Satana noho demoniany reo, le ampirisihin-drozy ty olo mba hifandramby amy hery raty. Misy, ohatsy, lasa mamonjy ambiasa na mpisa aoly, na manaraky fitsaboa misy ifandrambesany amy hery raty. Ty olo sisany koa voafitaky ka lasa mieritseritsy hoe mbo afaky miresaky amin’olo fa nimaty rey. Fe mandrara antsika Jehovah hoe: “Ka mila hevitsy amy mpamoha angatsy na amy mpivola ty hoavy.” (Levitikosy 19:31) Nanome ani-fampitandrema io ie mba hiarova antsika amy Satana noho ty demoniany. Fahavalo-Ndranahary rozy, ka ta hanao raha raty amintsika.

DINIHO LALIKY

Hohenteantsika hoe ino ty raha soa ataoni-anjely reo, manino ro mikai-doza ty mifandramby amy hery raty, le ino ty azontsika atao mba hiarovantsika ty vatantsika amy Satana noho demoniany reo.

4. Manampy ty olo hianatsy mikasiky ani-Jehovah ty anjely

Tsy mitory mivanta amin’olo ty anjely. Fe mitariky ty mpanompo-Ndranahary rozy mba handeha amy ze olo maniry hianatsy mikasiky ani-Jehovah. Vakio Apokalypsy 14:6, 7, bakeo iaraho midiniky fanontanea retoa:

Manino tsika ro mila ty fanampeani-anjely lafa mitory?
Mahafalifaly anao va ty mahay hoe mitariky anao handeha amin’olo maniry hahay ty raha volanini-Baiboly ty anjely? Ino ty antony?

5. Ka mifandramby amy hery raty

Fahavaloni-Jehovah, Satana noho demoniany reo. Fahavalontsika koa rozy. Vakio Lioka 9:38-42, bakeo iaraho midiniky fanontanea toy:

Ino ty ataoni-demonia reo amin’olo?

Tsy teantsika laha misy ifandrambesany amy demonia ty fiainantsika. Vakio Deoteronomia 18:10-12, bakeo iaraho midiniky fanontanea retoa:

Ino ty ataoni-demonia reo mba hifandrambesa amintsika? Ino ty raha ataon’olo misy ifandrambesany amy hery raty hita mbaminareo etoy?
Mahasoa antsika va ty fandrarani-Jehovah antsika tsy hifandramby amy hery raty araky ty hevitsinao? Ino ty antony?

Alefaso VIDEO toy, bakeo iaraho midiniky fanontanea reo.

VIDEO: “Tohero ty Devoly” (5:02)

Akory ty hevitsinao, mikai-doza va aoly fiaro tamy tanani-anakini-Palesa iny? Manino?
Tsy maintsy nanao ino Palesa laha ta hiaro ty vatany amy ty demonia?

Manohitsy ani-demonia reo avao ty Kristiana marina bakany zay. Vakio Asan’ny Apostoly 19:19 noho 1 Korintianina 10:21, bakeo iaraho midiniky fanontanea toy:

Laha mana raha misy ifandrambesany amy demonia iha, manino ro tena mila potehy na oroa raha rey?

6. Afaky mandresy ani-Satana noho ty demoniany iha

Satana ro mitariky ani-demonia reo. Fa Mikaela arkanjely ro mitariky ty anjely tsy mivaliky. Anara hafa ikaiha ani-Jesosy, Mikaela io. Manao akory ty herini-Mikaela? Vakio Apokalypsy 12:7-9, bakeo iaraho midiniky fanontanea retoa:

Ia ty tena mahery? Mikaela noho ty anjeliny va sa Satana noho ty demoniany?
Akory ty hevitsinao, tokony hatahotsy ani-Satana noho ty demoniany va ty mpanori-dia ani-Jesosy?

Afaky mandresy ani-Satana noho ty demoniany iha. Vakio Jakoba 4:7, bakeo iaraho midiniky fanontanea toy:

Ino ty azonao atao mba hiarovanao ty vatanao amy Satana noho ty demoniany?

MIERITSERITSY TY OLO SISANY HOE: “Tsy hitako ze maharaty ty manao jeu video na manenty filma misy hery raty. Fialam-boly avao raha rey fa tsy hoe hataon-tena.”