Yehovah wani taki wi kon sabi en osofamiri di de na hemel. Na ini na osofamiri disi yu abi den engel di Bijbel e kari „manpikin fu Gado” (Yob 38:7). San Bijbel e taki fu den engel? San den engel e du? Na ala engel e gi yesi na Gado?

1. Suma na den engel?

Fosi Yehovah meki grontapu a meki den engel. Den engel e libi na ini hemel èn wi no man si den, neleki fa wi no man si Yehovah (Hebrewsma 1:14). Milyunmilyun engel de èn ibriwan fu den de tra fasi (Openbaring 5:11). Den e ’du san Yehovah taki èn den e gi yesi na en’ (Psalm 103:20). Na ini owruten, Yehovah ben seni engel son leisi fu tyari boskopu gi sma, fu yepi en pipel èn fu frulusu den. Na ini a ten disi engel e yepi Kresten fu feni sma di wani kon sabi Gado.

2. Suma na Satan nanga den ogri yeye?

Sonwan fu den engel no tan gi yesi na Yehovah. A fosi engel di trangayesi Yehovah na ’a wan di den e kari Didibri nanga Satan èn di e kori sma na heri grontapu’ (Openbaring 12:9). Satan ben wani tiri sma. Dati meki a kori den fosi libisma. Bakaten a kori tra engel tu fu trangayesi Yehovah. Bijbel e kari den engel disi ogri yeye. Yehovah yagi den komoto fu hemel kon na grontapu èn te fu kaba a o pori den.​—Leisi Openbaring 12:9, 12.

3. Fa Satan nanga den ogri yeye e suku fu kori wi?

Satan nanga den ogri yeye e kori furu sma nanga afkodrei. Afkodrei na te sma e pruberi fu taki nanga yeye. Fu eksempre, son sma e go na bonuman nanga lukuman noso den e go na wan sma di e luku den stari fu sabi fa den libi o waka. Son sma di siki e go suku yepi na bonuman. Tra sma e bribi taki den man taki nanga den dedewan. a Ma Yehovah e warskow wi: „No go suku yepi na bonuman èn no go suku rai na den lukuman” (Lefitikus 19:31). A e taigi wi a sani disi fu di a no wani taki Satan nanga den ogri yeye kori wi. Den na Gado feanti èn den wani du ogri nanga wi.

 SORTU TRA SANI YU KAN LERI?

6. Yu kan wini Satan nanga den ogri yeye

Satan e tiri den ogri yeye. Ma a fesiman fu den engel di e gi yesi na Gado, na Mikael. Dati na wan tra nen gi Yesus. O tranga Mikael de? Leisi Openbaring 12:7-9 èn taki fu den aksi disi:

• Suma moro tranga? Mikael nanga den engel fu en noso Satan nanga den ogri yeye fu en?

• Yu denki taki den disipel fu Yesus musu frede Satan nanga den ogri yeye?

Yu kan wini Satan nanga den ogri yeye. Leisi Yakobus 4:7 èn taki fu na aksi disi:

• San yu musu du efu yu no wani taki Satan nanga den ogri yeye du ogri nanga yu?

 SAN YU LERI?

Den engel di e gi yesi na Gado e yepi wi. Satan nanga den ogri yeye na feanti fu Yehovah èn den e kori sma nanga afkodrei.

Fa yu ben o piki den aksi disi?

• Fa den engel fu Yehovah e yepi sma fu kon sabi en?

• Suma na Satan nanga den ogri yeye?

• Fu san ede yu no wani abi noti fu du nanga afkodrei?