பரலோகத்தில் யெகோவாவின் குடும்பத்தில் இருப்பவர்கள்தான் தேவதூதர்கள். அவர்களை “கடவுளுடைய மகன்கள்” என்று பைபிள் சொல்கிறது. (யோபு 38:7, அடிக்குறிப்பு) அவர்களைப் பற்றி நாம் தெரிந்துகொள்ள வேண்டுமென்று யெகோவா விரும்புகிறார். பைபிள் அவர்களைப் பற்றி என்ன சொல்கிறது? அவர்கள் நமக்கு நன்மையோ தீமையோ செய்ய முடியுமா? எல்லா தேவதூதர்களுமே கடவுளுடைய குடும்பத்தில் இருக்கிறார்களா?

1. தேவதூதர்கள் யார்? அவர்கள் என்ன செய்கிறார்கள்?

பூமியைப் படைப்பதற்கு முன்பே யெகோவா தேவதூதர்களைப் பரலோகத்தில் படைத்தார். யெகோவாவைப் போலவே அவர்களையும் நம்மால் பார்க்க முடியாது. (எபிரெயர் 1:14) அவர்கள் கோடிக்கணக்கில் இருக்கிறார்கள். அவர்களுக்குத் தனித்தனி சுபாவமும் இருக்கிறது. (வெளிப்படுத்துதல் 5:11) அவர்கள் ‘[யெகோவா] சொல்வதைக் கேட்டு, அவருடைய வார்த்தையை நிறைவேற்றுகிறார்கள்.’ (சங்கீதம் 103:20) பழங்காலத்தில் யெகோவா தன் மக்களுக்குச் செய்திகளைச் சொல்லவும், உதவிகள் செய்யவும், அவர்களைக் காப்பாற்றவும் சிலசமயம் தேவதூதர்களை அனுப்பினார். இன்று, கடவுளைப் பற்றித் தெரிந்துகொள்ள விரும்புகிறவர்களைக் கண்டுபிடிக்க தேவதூதர்கள் நமக்கு உதவுகிறார்கள்.

2. சாத்தானும் அவனுடைய தூதர்களும் யார்?

யெகோவாவை எதிர்த்த முதல் தேவதூதன்தான் “சாத்தான்.” அவன் ‘உலகம் முழுவதையும் ஏமாற்றிவருகிறான்.’ (வெளிப்படுத்துதல் 12:9) அவன் எல்லாரையும் ஆள நினைத்ததால் ஆதாம் ஏவாளையும், பிறகு மற்ற தேவதூதர்களையும் தன் பக்கம் இழுத்துக்கொண்டான். கடவுளுக்குக் கீழ்ப்படியாமல்போன கெட்ட தூதர்கள்தான் பேய்கள். அவர்கள் பரலோகத்திலிருந்து பூமிக்குத் தள்ளப்பட்டார்கள், சீக்கிரத்தில் அழிக்கப்படுவார்கள்.—வெளிப்படுத்துதல் 12:9, 12-ஐ வாசியுங்கள்.

3. சாத்தானும் பேய்களும் மக்களை எப்படி ஏமாற்றுகின்றன?

கடவுளுடைய எதிரிகளான சாத்தானும் பேய்களும், ஆவியுலகத் தொடர்பு மூலமாக மக்களை ஏமாற்றுகின்றன. நேரடியாகவோ மறைமுகமாகவோ பேய்களோடு தொடர்புகொள்ளும் பழக்கம்தான் ஆவியுலகத் தொடர்பு. ஜோசியம், ஜாதகம், குறி கேட்பது, மந்திரவாதம், பில்லிசூனியம் எல்லாமே இதில் அடங்கும். சில மருத்துவ சிகிச்சைகளும் இதில் அடங்கும். பேய்கள் இறந்தவர்களைப் போலப் பேசியும் மக்களை ஏமாற்றுகின்றன. அவை நமக்குத் தீமை செய்வதிலேயே குறியாக இருப்பதால்தான், ‘ஆவிகளோடு பேசுகிறவர்களிடம் நீங்கள் போகக் கூடாது. குறிசொல்கிறவர்களிடம் குறி கேட்கக் கூடாது’ என்று யெகோவா எச்சரிக்கிறார்.—லேவியராகமம் 19:31.

 ஆராய்ந்து பார்க்கலாம்!

6. சாத்தானையும் பேய்களையும் நீங்கள் ஜெயிக்க முடியும்

பேய்களுடைய தலைவன் சாத்தான். ஆனால், நல்ல தூதர்களுடைய தலைவர் மிகாவேல், அதாவது இயேசு. மிகாவேலுக்கு எவ்வளவு சக்தி இருக்கிறது? வெளிப்படுத்துதல் 12:7-9-ஐப் படித்துவிட்டு, இந்தக் கேள்விகளைப் பற்றிக் கலந்துபேசுங்கள்:

• யாருக்கு அதிக சக்தி இருக்கிறது? மிகாவேலுக்கும் அவருடைய தூதர்களுக்குமா, சாத்தானுக்கும் அவனுடைய பேய்களுக்குமா?

• இயேசுவைப் பின்பற்றுகிறவர்கள் சாத்தானையும் பேய்களையும் நினைத்துப் பயப்பட வேண்டுமா? நீங்கள் என்ன நினைக்கிறீர்கள்?

சாத்தானையும் பேய்களையும் நீங்கள் ஜெயிக்க முடியும். யாக்கோபு 4:7-ஐப் படித்துவிட்டு, இந்தக் கேள்வியைப் பற்றிக் கலந்துபேசுங்கள்:

• சாத்தானும் பேய்களும் விரிக்கிற வலையில் நீங்கள் எப்படி விழாமல் இருக்கலாம்?

 சுருக்கம்

நல்ல தூதர்கள் நமக்கு உதவி செய்கிறார்கள். சாத்தானும் அவனுடைய பேய்களும் யெகோவாவின் எதிரிகள். அவை ஆவியுலகத் தொடர்பைப் பயன்படுத்தி மக்களை ஏமாற்றுகின்றன.

ஞாபகம் வருகிறதா?

• யெகோவாவைப் பற்றித் தெரிந்துகொள்ள தேவதூதர்கள் எப்படி மக்களுக்கு உதவுகிறார்கள்?

• சாத்தானும் பேய்களும் யார்?

• நீங்கள் ஏன் ஆவியுலகத் தொடர்பை அடியோடு தவிர்க்க வேண்டுமென்று நினைக்கிறீர்கள்?