LISAUN 24
Sé mak anju sira no saida mak sira halo?
Jeová hakarak ita aprende kona-ba ninia família iha lalehan. Família neʼe inklui anju sira neʼebé Bíblia bolu nuʼudar “Maromak nia oan-mane sira”. (Job 38:7, nota-rodapé) Saida mak Bíblia hatete kona-ba anju sira? Oinsá mak sira kona ita-nia moris? No anju sira hotu mak parte ba Maromak nia família ka lae?
1. Anju sira mak kriatura hanesan saida?
Jeová kria uluk anju sira antes nia kria rai. Sira mak kriatura espíritu neʼebé moris iha lalehan hamutuk ho Maromak. (Ebreu 1:14) Iha anju millaun ba millaun, no sira ida-idak mak úniku. (Apokalipse 5:11) Sira “kumpre [Jeová nia] liafuan, no rona ba ninia lian”. (Salmo 103:20) Iha tempu uluk, dala ruma Jeová haruka anju sira atu lori lia-menon, ajuda no salva ninia povu. Ohin loron, anju sira dirije ema Kristaun atu haklaken ba ema neʼebé hakarak aprende kona-ba Maromak.
2. Sé mak Satanás no ninia anju aat sira?
Anju balu la laran-metin tan ba Jeová. Anju primeiru neʼebé kontra mak “hanaran Diabu no Satanás, neʼebé lohi ema iha mundu tomak”. (Apokalipse 12:9) Satanás hakarak atu sai ukun-naʼin, tan neʼe nia fó influénsia ba Adão, Eva no anju sira seluk atu kontra Jeová. Bíblia bolu anju sira-neʼe nuʼudar anju aat. Jeová haruka Jesus atu duni sira husi lalehan tun mai rai, no iha futuru sira sei lakon.—Lee Apokalipse 12:9, 12.
3. Oinsá mak Satanás no ninia anju aat sira koko atu lohi ita?
Satanás no anju aat sira lohi ema liuhusi espiritizmu, neʼe mak hahalok aat atu koko komunika ho espíritu sira. Porezemplu, ema balu husu ajuda ba matan-dook ka siʼikdór sira, uza astrolojia ka oróskopu. Ema balu uza tratamentu neʼebé liga ho espiritizmu. Satanás mós lohi ema atu fiar katak ema bele komunika ho ema neʼebé mate ona. a Maibé Jeová fó avizu mai ita: “Labele bá atu husu ema neʼebé koko atu koʼalia ho ema mate, no labele husu ema neʼebé siʼik futuru.” (Levítico 19:31) Nia fó avizu neʼe atu proteje ita husi Satanás no ninia anju aat sira. Sira mak Maromak nia inimigu neʼebé hakarak halo aat mai ita.
KEʼE KLEʼAN
Aprende kona-ba buat diʼak neʼebé anju sira halo, perigu husi espiritizmu, no oinsá ita bele proteje an husi Satanás no anju aat sira.
4. Anju sira ajuda ema atu aprende kona-ba Jeová
Maromak nia anju sira la haklaken diretamente ba ema. Maibé, anju sira-neʼe bele ajuda Maromak nia atan sira atu hetan ema neʼebé hakarak aprende kona-ba nia. Lee Apokalipse 14:6, 7, depois koʼalia hamutuk kona-ba pergunta tuirmai:
-
Tanbasá presiza anju sira-nia ajuda atu halaʼo serbisu haklaken?
-
Hodi hatene katak anju sira bele dirije ita atu hetan ema neʼebé hakarak aprende kona-ba Maromak, oinsá mak neʼe fó korajen ba Ita?
5. Hasees an husi espiritizmu
Satanás no anju aat sira mak Jeová nia inimigu, no mós ita hotu nia inimigu. Lee Lucas 9:38-42, depois koʼalia hamutuk kona-ba pergunta tuirmai:
-
Saida mak anju aat sira halo ba ema?
Ita lakohi husik anju aat sira fó influénsia mai ita. Lee Deuteronómio 18:10-12, depois koʼalia hamutuk kona-ba pergunta tuirmai:
-
Iha dalan saida deʼit mak anju aat sira koko atu fó influénsia no komunika ho ita? Ema balu iha ita-nia área toman atu halo ka uza saida neʼebé liga ho espiritizmu?
-
Tuir Ita-nia hanoin, Jeová bandu espiritizmu tanba razaun neʼebé diʼak ka lae? Tanbasá?
Loke VÍDEO, depois koʼalia hamutuk kona-ba pergunta tuirmai.
-
Tuir Ita-nia hanoin, biru neʼebé Palesa tau iha ninia oan nia liman mak perigu ka lae? Tanbasá?
-
Saida mak Palesa presiza halo atu proteje nia no ninia família husi anju aat sira?
Husi uluk kedas, ema Kristaun neʼebé loos sempre kontra hasoru anju aat sira. Lee Apóstolu 19:19 no 1 Korinto 10:21, depois koʼalia hamutuk kona-ba pergunta tuirmai:
-
Tanbasá importante atu halakon Ita-nia sasán naran deʼit neʼebé liga ho espiritizmu?
6. Manán funu hasoru Satanás no ninia anju aat sira
Satanás mak ulun-naʼin ba anju aat sira. Maibé anju diʼak sira-nia ulun-naʼin mak arkanju Miguel, neʼe mak Jesus nia naran seluk. Miguel iha forsa hanesan saida? Lee Apokalipse 12:7-9, depois koʼalia hamutuk kona-ba pergunta tuirmai:
-
Sé mak iha forsa boot liu, Miguel no ninia anju sira ka Satanás no ninia anju aat sira?
-
Ema neʼebé halo tuir Jesus presiza taʼuk ba Satanás no ninia anju aat sira ka lae?
Ita bele manán hasoru Satanás no ninia anju aat sira. Lee Tiago 4:7, depois koʼalia hamutuk kona-ba pergunta tuirmai:
-
Oinsá mak Ita bele proteje an husi Satanás no ninia anju aat sira?
EMA BALU DEHAN: “La sala atu halimar vídeo game ka haree filme kona-ba espiritizmu. Neʼe jeitu.”
-
Tanbasá hanoin hanesan neʼe mak perigu?
PONTU IMPORTANTE
Anju sira neʼebé diʼak ajuda ita. Maibé Satanás no ninia anju aat sira mak Jeová nia inimigu, no sira uza espiritizmu atu lohi ema.
Rezumu
-
Oinsá mak Jeová nia anju sira ajuda ema atu aprende kona-ba nia?
-
Sé mak Satanás no ninia anju aat sira?
-
Tanbasá mak Ita hakarak hasees an husi espiritizmu?
BUKA-HATENE LIUTÁN
Evidénsia saida mak hatudu katak Jesus mak arkanju Miguel?
Evidénsia saida mak hatudu katak Diabu laʼós refere ba hahalok aat iha ema nia laran.
Haree oinsá feto ida sai livre husi anju aat nia influénsia.
“Nia hetan objetivu ba ninia moris” (Livru Haklaken, 1 Jullu 1993)
Aprende oinsá mak Satanás uza espiritizmu atu lohi ema.
“Fakta tentang Ilmu Gaib dan Sihir” (Jalan Menuju Kehidupan Abadi, parte 5)
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
