LESOGNE 24
Ino ty Maregne Miomba o Anjelio Sady Ino ty Atao’e?
Tea i Jehovah ho fantantikagne ty miomba o keleia’e an-dagnitse agneo. Agnisa o keleia’e iohoe o anjelio. Atao tihoe “anak’Andrianagnahare” ka iareo. (Joba 38:7) Ino ty rehafe ty Baiboly miomba o anjelio? Misy voka’e amantikagne vao ty raha atao iareo? Agnisa ty keleian’Andrianagnahare iaby vao o anjelio?
1. Ino ty atao tihoe anjely?
Namorogne anjely ty Jehovah taloha ty namorogna’e ty tane toy. Fagnahy tsy trea maso an-dagnitse agne manahake i Jehovah avao ka iareo. (Hebreo 1:14) An-tapetrisa’e maro o anjelio sady sambe managne ty mampiambake aze iareo tsikiraidraike. (Apokalypsy 5:11) “Magnorike ty baiko [i Jehovah] naho mitsanogne ty fiaragnana’e” iareo. (Salamo 103:20) Nagnirake o anjelio ty Jehovah tie taloha mba hagnambara ty hafatse boake ama’e ndra hagnampe naho hagnavotse ty vahoa’e. Magnampe o Kristianao ka o anjelio tie amy izao mba hitarike iareo ho mbamy ze ndaty te hianatse ty miomba an’Andrianagnahare mbeo.
2. Ia ty Satana naho i demonia’e a rey?
Nivalike tamy i Jehovah ty anjely ila’e. Atao tihoe “Devoly naho Satana” i anjely voaloha’e nivalikey sady “mamitake ze tane misy ndaty” reke. (Apokalypsy 12:9) Te hifehefehe o raha finorogneo ty Satana, le nitaone’e ty Adama naho i Eva mba tsy hankatò i Jehovah. Nitarike ty anjely ila’e mba higoreve miarake ama’e ka reke naho fa tafara tatoy. Atao tihoe demonia o anjely nigoreve rehoe. Niroahe i Jehovah boake an-dagnitse agne ty Satana naho i demonia’e rey le natora’e an-tane etoy. Ho ringanegne iareo amy ty hoavy.—Vakio ty Apokalypsy 12:9, 12.
3. Akore ty atao i Satana naho i demonia’e rey mba hamitahagne o ndatio?
Mamitake ndaty maro ty Satana naho o demonia’e reo, le mandrisike iareo mba hifandrambe amo o angatseo. Faie tena raty ty manao raha misy ifandrambesa’e amo o angatseo. Misy ohatse ty mamonje mpagnorik’andro, mpamantatse ty raha hiseho amy ty hoavy, mpamoreke, mpijoro naho ambiasa. Ty ila’e ka mipay fitsaboagne misy ifandrambesa’e amy ty angatse. Voafitake ka ty ila’e, le mino fa afake mifampirehake amo o mateo. Faie mampitao antikagne ty Jehovah tie: “Ko mipay hevetse amo o mpamorekeo ndra amo o mpirehake ty hoavio” nareo. (Levitikosy 19:31) Mampitao antikagne reke satria tea’e harovagne amy i Satana naho o demonia’eo tikagne. Fahavalon’Andrianagnahare iareo sady te hampijale antikagne.
ANDAO HANDINEKE TY PITSOPITSO’E
Hodinehentikagne ato tie ino ty raha soa atao o anjelio, nagnino ro magnoho-doza ty fanoagne raha misy ifandrambesa’e amo o demoniao, vaho ty azontikagne atao mba ho voaro amy i Satana naho o demonia’eo.
4. Magnampe o ndatio hahafantatse i Jehovah o anjelio
Tsy mitory mivantagne amo o ndatio o anjelio. Faie mitarike ty mpanompon’Andrianagnahare ho mbamy ze ndaty te hianatse ty miomba aze mbeo iareo. Vakio ty Apokalypsy 14:6, 7, sady iharò midineke ty fagnonteneagne retoa:
-
Nagnino tika ro mipay ty fagnampea o anjelio naho fa mitory?
-
Afake mitarike azo ho mbamy ze ndaty te hahafantatse ty miomba i Jehovah mbeo o anjelio. Mahafale azo vao ty mahafantatse izay? Ino ty anto’e?
5. Isintaho ze raha misy ifandrambesa’e amo o demoniao
Fahavalo i Jehovah ty Satana naho o demonia’eo. Fahavalontikagne ka iareo. Vakio ty Lioka 9:38-42, sady iharò midineke ty fagnonteneagne toy:
-
Atao o demoniao akore o ndatio?
Tsy engantikagne hifandrambe amantikagne o demoniao. Vakio ty Deoteronomia 18:10-12, sady iharò midineke ty fagnonteneagne retoa:
-
Ino ty atao o demoniao mba hifandrambesagne amantikagne naho hahavy antikagne hanao ze raha tea’e? Ino ty raha misy ifandrambesa’e amo o demoniao fanoe ty ndaty ama’areo ey?
-
Naho ty ama’o, mahasoa vao ty andrarà i Jehovah antikagne tsy hanao ty raha misy ifandrambesa’e amo o demoniao? Ino ty anto’e?
Alefaso i VIDEO oy, sady iharò midineke ty fagnonteneagne retoa naho fa avy eo.
-
Nagnoho-doza i Palesa naho i anak’ampela’ey vao i fiaro nampagnisie’e azey? Ino ty anto’e?
-
Ino ty tsy maintsy natao i Palesa mba ho voaro amy i demonia rey iareo?
Nanohetse o demoniao lognandro ty tena Kristiana hatrake amy izay. Vakio ty Asan’ny Apostoly 19:19 naho ty 1 Korintianina 10:21, sady iharò midineke ty fagnonteneagne toy naho fa avy eo:
-
Naho managne raha misy ifandrambesa’e amy ty demonia rehe, nagnino ze raha zay ro mila potehegne?
6. Ho vita’o ty handrese amy ty aly atao amy i Satana naho o demonia’eo
I Satana ty mitarike o demoniao. I Mikaela Arkanjely ty mitarike i anjely tsy mivalike rey. Agnaragne hafa itokavagne i Jesosy ka io. Manao akore ty hery anagna i Mikaela? Vakio ty Apokalypsy 12:7-9, sady iharò midineke ty fagnonteneagne retoa:
-
Ia ty tena mahery? I Mikaela naho o anjeli’eo vao sa i Satana naho o demonia’eo?
-
Toko’e hatahotse i Satana naho o demoniao vao ze mpanonjohy ty lia i Jesosy arake ty heve’o?
Ho vita’o ty handrese amy ty aly atao amy i Satana naho i demonia’e rey. Vakio ty Jakoba 4:7, sady iharò midineke ty fagnonteneagne toy naho fa avy eo:
-
Ino ty azo’o atao mba ho voaro amy i Satana naho o demoniao rehe?
MISY TY MIREHAKE FA: “Tsy mampagnino ty mihisa ndra magnente filma misy mazỳ. Toe fihisagne avao io.”
-
Nagnino ro magnoho-doza o fomba fihevetse iohoe?
FAMINTIGNAGNE
Magnampe antikagne o anjely tsy mivalikeo. Faie fahavalo i Jehovah ty Satana naho o demonia’eo. Ty fifandrambesagne amo o angatseo ro fomba amitaha iareo o ndatio.
Fameregnagne
-
Ino ty atao o anjely tsy mivalikeo mba hagnampeagne o ndatio hahafantatse i Jehovah?
-
Ia ty Satana naho o demonia’eo?
-
Nagnino rehe ro toko’e hagnalavitse ze raha misy ifandrambesa’e amo o demoniao?
FAGNAZAVAGNE FAGNAMPE’E
Ino ty porofo fa i Jesosy ro Mikaela Arkanjely?
Henteo ato ty porofo fa tena misy ty Devoly fa tsy toetse raty agnatentikagne ao avao.
Ino ty natao ty ampela raike toy mba tsy hifandrambe amo o demoniao sasa?
“Nahafantatse ty Raha Kendré o Fiaignagneo Reke” (Fitalakesan-davitse 1 Jolay 1993)
Ty fampiasagne ze raha misy ifandrambesa’e amo o demoniao ty fomba amitaha i Satana o ndatio. Akore ty anoa’e izay?
[Fagnamarehagne ambane peje]
a Ndra kokolampo.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
