Ýehowa Hudaýyň gökdäki maşgalasy perişdelerden ybarat. Perişdelere «Hudaýyň ogullary» hem diýilýär (1 Musa 6:2; Eýýup 38:7). Mukaddes Kitapda perişdeler barada näme aýdylýar? Olar adamlara nädip kömek edýär? Hemme perişdeler Hudaýyň maşgalasyna degişlimi?

1. Perişdeler kimler?

Ýehowa Hudaý älem-jahany ýaratmazdan öň perişdeleri ýaradypdy. Olaram Ýehowa ýaly göze görünmeýär we gökde ýaşaýar (Ýewreýler 1:14). Olaryň sany millionlarça, Hudaý olaryň hersini üýtgeşik edip ýaratdy (Ylham 5:11). Olar «Hudaýa gulak asyp, sözüni berjaý edýärler» (Zebur 103:20). Gadym döwürlerde Ýehowa perişdeleri arkaly adamlara habaryny ýetirýärdi. Şeýle-de olar arkaly halkyna kömek edip, halas edýärdi. Şu günlerem perişdeler hak Hudaýy tanamak isleýän adamlary tapmaga kömek edýärler.

2. Şeýtan we jynlar kimler?

Perişdeleriň käbiri Ýehowa dönüklik etdiler. Ilkinji dönük perişdä «Iblis we Şeýtan» diýilýär. Ol «bütin ýer ýüzünde ýaşaýanlary aldaýar» (Ylham 12:9). Şeýtan hemmeleriň üstünden agalyk etmek isledi, şonuň üçin Adam ata bilen How enäni azdyrdy. Şondan soň käbir perişdeleri hem öz tarapyna geçirdi. Şol perişdelere jynlar diýilýär. Ýehowa olary gökden ýer ýüzüne kowdy, tizden bolsa olary ýok eder (Ylham 12:9, 12-nji aýatlary oka).

3. Şeýtan we jynlar nädip aldaýar?

Şeýtan we jynlar adamlary dürli usul bilen aldaýar. Meselem, köp adamlar jadygöýlik bilen gyzyklanýarlar, palçylara, tebiplere, dogalaýanlara ýa-da dogadan açýanlara ýüz tutýarlar, täleýine garadýarlar. Şeýle-de käbirleri ölüler bilen gepleşip bolýandygyna ynanyp, ölüleri çagyrýan adamlara ýüz tutýarlar. Ýöne Ýehowa: «Jadygöýlere we bilgiçlere ýüz tutmaň» diýýär (3 Musa 19:31). Şeýtan bilen jyn-arwahlar Hudaýyň duşmany, olar bize zyýan ýetirjek bolýar. Şonuň üçinem Ýehowa bizi olardan goramak isleýär.

 SÖHBETDEŞLIK

6. Şeýtan bilen jynlardan gorkmaň

Şeýtan jynlaryň hökümdary. Emma Hudaýa wepaly perişdelere Mikaýyl diýen baş perişde ýolbaşçylyk edýär. Mikaýyl Isanyň başga bir ady. Ylham 12:7—9-njy aýatlary okap, aşakdaky soraglar boýunça gürrüňdeş boluň.

• Mikaýyl bilen perişdeleri güýçlümi ýa-da Şeýtan bilen jynlary?

• Isanyň şägirtleri Şeýtan bilen jynlardan gorkmalymy?

Sen Şeýtany we jyn-arwahlaryny ýeňip bilersiň. Ýakup 4:7-ni okap, aşakdaky sorag boýunça gürrüňdeş boluň.

• Sen Şeýtandan we jynlardan nädip goranyp bilersiň?

 GAÝTALAMAK

Perişdeler bize kömek edýär. Şeýtan bilen jynlar Ýehowanyň duşmanlary, olar adamlary jadygöýligiň her dürli usullary bilen aldaýar.

Jemleýji soraglar

• Perişdeler Ýehowany tanamak isleýän adamlara nädip kömek edýär?

• Şeýtan bilen jynlar kim?

• Sen näme üçin jadygöýlikden gaça durmak isleýärsiň?