Jehovha o vbweta gu khuye hi hevbula khu ndranga yaye ya ndzadzini. Ndranga yoyo yo pata dzingilozi, dzi ranwago pwani “sanana sa Nungungulu.” (Joba 38:7) Ginani egi Bhibhiliya yi ganeyago khu dzingilozi? Ginani dzi girago? Ina dzingilozi dzatshavbo dzi gomogo dzo gira gipandre nya ndranga ya Nungungulu?

1. Ginani dzingilozi?

Na si gu vangi mafu, Jehovha a di pheya khu gu vanga dzingilozi. Gufana ni Nungungulu, dzingilozi maphuvbo nya mba wonega nigu dzo vbanya ndzadzini. (Vahebheru 1:14) Gu na ni dzingilozi nya dzingi, ganiolu mweyo ni mweyo yi na ni makhalelo nyo hambane ni dzimbe. (Gutuledwa 5:11) Idzo dzo ‘landrisa milayo ya Jehovha ni gu yingisa magana yaye.’ (Ndzimo 103:20) Dziteponi dzi vbindridego, Jehovha a di gu tshuka a thumisa dzingilozi dzaye gasi gu vbindriseya mahungu yaye, gu phasa vathu vaye ni gu vbulugisa sithumi saye tepo si nga ba si tshangana ni sigaradzo. Muhuno, dzingilozi dzi ngu phasa Makristo gu mana vathu va vbwetago guti lisine khu Nungungulu.

2. Khu mani Sathane ni dzingilozi dzaye?

Dzingilozi nyo khaguri dzi di diga gu tumbega ga Nungungulu. Ngilozi nyo pheye yi nga wugeya Nungungulu ‘yo ranwa pwani khiyo Dhiyabhulosi, ni Sathane, mupembi nya litigo latshavbo.’ (Gutuledwa 12:9) Sathane a di vbweta fumeya vambe. Khu kharato, a di sengedzeya Adhamu ni Evha ni dzimbe dzingilozi nidzo va wugeya Nungungulu. Dzingilozi dzedzi nya mba engisa dzo ranwa pwani madhemoni. Jehovha a di tutumisa dzingilozi dzedzi khu ndzadzini dzita mafuni. Ganiolu, nugunugu dzi na fuviswa hidzo bhi. — Leri Gutuledwa 12:9, 12.

3. Sathane ni madhemoni vo zama kharini gu hi kanganyisa?

Sathane ni madhemoni yaye vo kanganyisa vathu khu gu thumisa wudhemoni, a gu giolovedzo nyo vivbe ngudzu nyo zame gu ganeya ni maphuvbo. Khu giyeyedzo, vathu nyo khaguri va ngu hongola ga vasasuvi nya dzinyeledzi, vatumbe, valoyi, ni dzinyanga. Vambe va ngu dzumeya dzindziya nya mathumelo nya madwali dzi gimbileyanago ni wudhemoni. Sathane gambe o gira vathu va khodwa gu khavo si ngu kodzega gu ganeya ni ava va fudego. Ganiolu, Jehovha o hi gengedza khuye: “Mu nga khidzimeli maphuvbo nya vafi, mu ngayi ga vanyamandriki, mwendro ga va nya gulola [mwendro gu sasula] dzisolo mu ya wudzisa gilo.” (Levhi 19:31) Uye o hi ninga gigengedzo gegi gasi hi dzi woneya ga Sathane ni madhemoni yaye. Avo valala va Nungungulu nigu vo vbweta hi gireya guvivba.

 GIRA WUGEVISISI NYO ETE

6. Pala Sathane ni madhemoni yaye

Madhemoni mo fumedwa khu Sathane. Ganiolu, dzingilozi nyo tumbege dzo fumedwa khu ngilozi nya yikhongolo ga dzatshavbo, a gu Migeli, li gu limbe lina la Jesu. Tshivba muni a gu nayo Migeli? Lerini Gutuledwa 12:7-9, mu vbedza mu bhula khu siwudziso sesi:

• Avba ga Migeli ni dzingilozi dzaye ni Sathane ni madhemoni yaye, khu mani a gu na ni tshivba nya yikhongolo?

• Wo si wona kharini, ina valandreyi va Jesu va yede gu thava Sathane ni madhemoni yaye?

U nga si kodza gu pala nyimbi ya Sathane ni madhemoni yaye. Lerini Jakobe 4:7, mu vbedza mu bhula khu giwudziso gegi:

• U nga dzi vhikeya kharini ga Sathane ni madhemoni yaye?

 REZUMO

Dzingilozi nyo tumbege dzi ngu hi phasa. Sathane ni madhemoni yaye valala va Jehovha nigu vo thumisa wudhemoni gasi gu kanganyisa vathu.

Siwudziso nyo wusedze

• Dzingilozi dzo phasa kharini vathu gu hevbula khu Jehovha?

• Khu mani Sathane ni madhemoni yaye?

• Khu ginani u vbwetago gu gimbileya hwindzo ni madhemoni?