CIIYO 24
Makani nzi Aamasimpe Aaliko Kujatikizya Bangelo?
Jehova uyanda kuti twiiye kujatikizya mukwasyi wakwe wakujulu. Mukwasyi ooyo ubikkilizya bangelo, ibaitwa kuti ‘bana ba Leza.’ (Jobu 38:7) Ino Bbaibbele lyaamba nzi kujatikizya bangelo? Ino babajatikizya buti bantu? Alimwi sena bangelo boonse ncibeela camukwasyi wa Leza?
1. Ino bangelo mbaani?
Jehova wakalenga bangelo katanalenga nyika. Mbubwenya mbuli nguwe, bangelo tabalibonyi alimwi bakkala kujulu. (Bahebrayo 1:14) Kuli bangelo banji alimwi umwi aumwi ulilibedelede. (Ciyubunuzyo 5:11) ‘Bacita ncaamba Jehova akuswiilila jwi lyakwe.’ (Intembauzyo 103:20) Kaindi, Jehova zimwi ziindi wakali kubelesya bangelo kwaamba milumbe yakwe, kugwasya alimwi akufwutula bantu bakwe. Mazuba aano, bangelo balabasololela Banakristo kubantu bayanda kwiiya kujatikizya Leza.
2. Ino Saatani amadaimona aakwe mbaani?
Bangelo bamwi tiibakazumanana kusyomeka kuli Jehova. Mungelo wakusaanguna iwakazanga, ngooyo “uutegwa Diabolosi a Saatani, ooyo weena nyika yoonse.” (Ciyubunuzyo 12:9) Saatani wakali kuyanda kuti keendelezya bamwi, aboobo wakayunga bantu bakusaanguna alimwi kumbele nobaba bangelo bamwi bakamusangana mubuzangi bwakwe. Bangelo aabo ibakazanga baitwa kuti madaimona. Jehova wakabatanda kujulu kuboola anyika alimwi bayoonyonyoonwa.—Amubale Ciyubunuzyo 12:9, 12.
3. Mbuti Saatani amadaimona mbobasola kutweena?
Saatani amadaimona aakwe balabeena bantu banji kwiinda mukubelesya mizimu, icilengwa cibyaabi cakusola kubandika amyuuya. Mucikozyanyo, bantu balabuzya makani kuli basikulingula nyenyeezi, basikwaamba zyakumbele alimwi akubaŋanga. Bamwi basola kuyandaula busilisi ibujatikizya mizimu. Alimwi bantu baleenwa kwiinda mukusyoma kuti balakonzya kubandika abafwide. Pele Jehova utucenjezya kuti: “Mutaunki kubasondi nokuba kubuzya makani kubaŋanga.” (Levitiko 19:31) Jehova ulatupa ncenjezyo eeyi kutegwa atukwabilile kuli Saatani amadaimona. Mbaasinkondonyina Leza alimwi bayanda kutucisa.
AMWIIYE ZINJI
Amwiiye zintu zibotu bangelo nzyobacita, ntenda yakubelesya mizimu alimwi ambotukonzya kulikwabilila kuli Saatani amadaimona.
4. Bangelo balabagwasya bantu kwiiya kujatikizya Jehova
Bangelo ba Leza tababakambaukili bantu cacigaminina. Muciindi caboobo, balabasololela bakombi ba Leza kubantu bayanda kwiiya kujatikizya nguwe. Amubale Ciyubunuzyo 14:6, 7, akubandika mibuzyo eeyi:
-
Nkaambo nzi ncotuyandika kugwasyigwa abangelo notukambauka?
-
Sena cilamukulwaizya kuzyiba kuti bangelo balamusololela kubantu bayanda kumvwa mulumbe wamu Bbaibbele? Nkaambo nzi?
5. Amwiikake mizimo
Saatani amadaimona mbaasinkondonyina Jehova. Andiswe mbaasinkondoma. Amubale Luka 9:38-42, akubandika mubuzyo ooyu:
-
Ino madaimona abeendelezya buti bantu?
Tatuyandi kulekela madaimona kutweendelezya. Amubale Deuteronomo 18:10-12, akubandika mibuzyo eeyi:
-
Muunzila nzi madaimona mwaasola kutweendelezya alimwi akubandika andiswe? Nzilengwa nzi zidumide kubusena nkomukkala?
-
Sena mucibona kuba camaano kuti Jehova ulakasya kubelesya mizimo? Nkaambo nzi?
Atweebelele VIDIYO, akubandika mibuzyo iitobela.
-
Sena muyeeya kuti cilikwabilizyo ncaakasamikidwe mwana waba Palesa cakali cibyaabi? Nkaambo nzi?
-
Ncinzi ba Palesa ncobakeelede kucita kutegwa balikwabilile kumadaimona?
Banakristo beni-beni lyoonse balaakazya madaimona. Amubale Milimo 19:19 alimwi a 1 Bakorinto 10:21, akubandika mubuzyo ooyu:
-
Nkaambo nzi ncociyandika kucinyonyoona cintu cili coonse ciswaangene amizimo?
6. Amuzwidilile mukulwana Saatani amadaimona aakwe
Madaimona ayendelezyegwa a Saatani. Pele bangelo basyomeka basololelwa a Silutwe wabangelo Mikayeli, izina limbi lya Jesu. Ino Mikayeli ujisi nguzu zinji buti? Amubale Ciyubunuzyo 12:7-9, akubandika mibuzyo eeyi:
-
Ino nguni uuli anguzu zinji? Sena ngu Mikayeli abangelo bakwe naa ngu Saatani amadaimona aakwe?
-
Sena muyeeya kuti basikutobela Jesu beelede kumuyoowa Saatani amadaimona aakwe?
Mulakonzya kuzwidilila mukulwana Saatani amadaimona aakwe. Amubale Jakobo 4:7, akubandika mubuzyo ooyu:
-
Mbuti mbomukonzya kulikwabilila kuli Saatani amadaimona aakwe?
BAMWI BAAMBA KUTI: “Kunyina cilubide kuuma mageemu alimwi akweebelela mafilimu aajatikizya mizimu. Nkulikondelezya buyo.”
-
Nkaambo nzi kuyeeya kuli boobu ncokuli kubyaabi?
MUBUFWAAFWI
Bangelo basyomeka balatugwasya. Saatani amadaimona aakwe mbaasinkondonyina Jehova, alimwi babelesya mizimu kweena bantu.
Ncinzi Ncomwaiya?
-
Mbuti bangelo ba Jehova mbobabagwasya bantu kwiiya kujatikizya nguwe?
-
Ino Saatani amadaimona aakwe mbaani?
-
Nkaambo nzi ncotuteelede kujatikizyigwa amizimu munzila iili yoonse?
AMUZYIBE ZINJI
Amubone bumboni butondezya kuti Jesu ngu Silutwe wabangelo Mikayeli.
“Ino Silutwe Wabangelo Mikayeli Nguni?” (Cibalo caaintaneti)
Amubone bumboni ibutondezya kuti Diabolosi tabuli buyo bube bubyaabi ibuli mulindiswe.
Amubone mukaintu umwi mbwaakaleka kweendelezyegwa amadaimona.
“Bakatalika Kupona Buumi Bulaampindu” (Ngazi Yamulindizi, July 1, 1993)
Amwiiye Saatani mbwabelesya mizimu kweena bantu.
“Ikasimpe Kujatikizya Masalamuzi Alimwi Abulozi” (Inzila Iisololela Kubuumi Butamani, ciiyo 5)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
