TAKGALHTAWAKGA 24
¿Tuku wan Biblia xlakata ángeles?
Jehová lakaskin pi kalakgapaswi xfamilia xalak akgapun. Kʼuma familia anta makgtanumakgo ángeles, nema na kalilakgapaskan «xkamanan Dios» (Job 38:7). ¿Tuku masiya Biblia xlakata ángeles? ¿Tuku tlawakgo ángeles? ¿Putum ángeles makgtapakgsikgo kxfamilia Dios?
1. ¿Tiku ángeles?
Jehová kamalakatsukilh ángeles akxni nina xtlawa Katiyatni. Umakgolh ángeles, espíritus, nila kakxilhaw, chuna la Dios chu lamakgo kʼakgapun (Hebreos 1:14). Lhuwa millones ángeles anan chu ni xlakxtumkan (Apocalipsis 5:11). Xlakan «tlawakgo tuku [Jehová] wan chu kgalhakgaxmatkgo xlimapakgsin» (Salmo 103:20). Makgasata, Jehová kamalakgachalh xʼángeles xlakata wi tuku xkamakatsinikgolh xkachikin, xkamakgtayakgolh chu xkalakgmaxtukgolh. La uku, ángeles kapulalinkgo kstalaninanin Cristo xlakata nakatekgskgo latamanin tiku katsiputunkgo xlakata Dios.
2. ¿Tiku Satanás chu xdemonios?
Makgapitsi ángeles nialh tatayakgolh Jehová. Xapulana tiku talalakatawakalh wa tiku «wanikan Akgskgawini chu Satanás, tiku kaʼakgskgawima putum tiku lamakgolh kkatiyatni» (Apocalipsis 12:9). Satanás xkaʼakgchipaputun amakgapitsin, wa xlakata tlawalh pi xapulana latamanin xtalalakatawakakgolh Dios. Chu alistalh tlawalh pi asta makgapitsi ángeles na xtalalakatawakakgolh Dios. Umakgolh ángeles kawanikan demonios. Jehová katamakxtucha kʼakgapun, kamakamilh kKatiyatni chu nakamalakgsputukan (kalikgalhtawakga Apocalipsis 12:9, 12).
3. ¿La kinkaʼakgskgawiputunkgoyan Satanás chu xdemonios?
Satanás chu xdemonios maklakaskinkgo taskuwan chu atanu tuku na makgtanuma ktaskuwan xlakata nakaʼakgskgawikgo latamanin, uma tlawa pi latamanin nakatachuwinankgo nixatlan espíritus. Akgtum liʼakxilhtit, makgapitsi latamanin likgalhtawakgakgo o kgaxmatkgo horóscopo chu amakgapitsin kalakgankgo tiku putsananikgo staku, katsinanin, skgoyonanin chu skuwananin. Wi tiku putsakgo likuchun nema na anta makgtanuma tuku xla taskuwan. Chu na wilakgo tiku kamakanajlikan pi tlan nakatachuwinankgo tiku nikgonita. Pero Jehová kinkawaniyan: «Ni kakalakgpitit tiku katachuwinankgo espíritus o tiku wankgo tuku aku nala» (Levítico 19:31). Xla kinkawaniyan umakgolh tachuwin xlakata Satanás chu xdemonios xtalatlawananin chu kinkatlawaniputunkgoyan tuku nitlan.
TLAKG KALAKPUTSANANIW
Kaʼakxilhwi tuku tlawakgo ángeles chu tuku nitlan kitaxtu akxni makgtanukan tuku xla taskuwan. Na kaʼakxilhwi tuku tlan natlawayaw xlakata Satanás chu xdemonios nitu nakinkatlawanikgoyan.
4. Ángeles kamakgtayakgo latamanin nalakgapaskgo Jehová
Xʼángeles Dios ni wa katachuwinankgo latamanin, wata kapulalinkgo kskujnin Dios xlakata nakatekgskgo latamanin tiku lakgapasputunkgo. Kalikgalhtawakgatit Apocalipsis 14:6, 7 chu kalichuwinantit uma:
-
¿Tuku xlakata maklakaskinaw xtamakgtaykan ángeles xlakata nalichuwinanaw Dios?
-
¿Paxuwaya akxni lilakpuwana pi ángeles tlan napulalinkgoyan xlakata nakatekgsa latamanin tiku kgaxmatputunkgo xTachuwin Dios? ¿Tuku xlakata?
5. Kalakgmakganti taskuwan chu kaxatukawa tuku makgtanu ktaskuwan
Satanás chu xdemonios talatlawakgo Jehová chu na kinkatalatlawakgoyan. Kalikgalhtawakgatit Lucas 9:38-42 chu kalichuwinantit uma:
-
¿La kalikatsinikgo demonios latamanin?
Ni kamaxkiputunaw talakaskin demonios namakgtanukgo kkilatamatkan. Kalikgalhtawakgatit Deuteronomio 18:10-12 chu kalichuwinantit uma:
-
¿Tuku tlawakgo demonios xlakata namakgtanukgo kkilatamatkan chu nakinkatachuwinankgoyan? Anta niku wix lapat, ¿tuku tlawakgo latamanin nema makgtanuma ktaskuwan?
-
¿Lakpuwana pi Dios malakatsali akxni kinkawaniyan pi nalakgmakganaw putum tuku makgtanuma ktaskuwan? ¿Tuku xlakata chuna lakpuwana?
Kaʼakxilhtit VIDEO chu kalichuwinantit uma:
-
¿Lakpuwana pi tlan tuku xmamakganunit kskgata Palesa? ¿Tuku xlakata?
-
¿Tuku tlawalh Palesa xlakata demonios nitu xkatlawanikgolh?
Xaxlikana kstalaninanin Cristo ankgalhin lakgmakgankgonit tuku xla demonios. Kalikgalhtawakgatit Hechos 19:19 chu 1 Corintios 10:21 chu kalichuwinantit uma:
-
Komo wi tuku kgalhiya nema makgtanuma ktaskuwan, ¿tuku xlakata lu xlakaskinka namalakgsputuya?
6. Kakamakgatlaja Satanás chu xdemonios
Xmapakgsinakan demonios wa Satanás. Pero ángeles tiku ni makgxtakgkgo Dios wa kapulalima arcángel Miguel, uma wa atanu tukuwani nema lilakgapaskan Jesús. ¿La xlilhuwa litliwakga kgalhi arcángel Miguel? Kalikgalhtawakgatit Apocalipsis 12:7-9 chu kalichuwinantit uma:
-
¿Tiku tlakg lakgtliwakgan: Miguel chu xʼángeles, o Satanás chu xdemonios?
-
¿Lakpuwana pi kstalaninanin Cristo xlipekuanitkan Satanás chu xdemonios?
Wix tlan nakamakgatlajaya Satanás chu xdemonios. Kalikgalhtawakgatit Santiago 4:7 chu kalichuwinantit uma:
-
¿Tuku tlan natlawaya xlakata Satanás chu xdemonios nitu natlawanikgoyan?
MAKGAPITSIN WANKGO: «Nitu wamputun nalikgamanana videojuegos o naʼakxilha películas niku masiyakan xlakata magia, o niku masiyakan xlakata espíritus. Kaj talakgastan».
-
¿Tuku xlakata lu nitlan chuna nalakpuwanaw?
TUKU KATSINIW
Ángeles tiku ni makgxtakgkgo Dios kinkamakgtayakgoyan. Satanás chu xdemonios xtalatlawananin Jehová, chu maklakaskinkgo taskuwan xlakata nakaʼakgskgawikgo latamanin.
¿Tuku xkgalhtinanti?
-
¿Tuku tlawakgo ángeles xlakata latamanin nalakgapaskgo Jehová?
-
¿Tiku Satanás chu xdemonios?
-
¿Tuku xlakata lu nitlan katikitaxtunin komo naputsaya tuku xla taskuwan?
TLAKG KAKATSINI
Kaʼakxilhti tuku limasiya pi Jesús wa arcángel Miguel.
Kaʼakxilhti tuku limasiya pi Akgskgawini xlikana lama.
Kaʼakxilhti tuku tlawalh chatum puskat xlakata demonios nialh xmakglhuwikgolh.
«Tekgsli tapaxuwan kxlatamat» (Makatsinina, 1 xla julio kata 1993)
Kaʼakxilhti la maklakaskin Satanás tuku xla taskuwan xlakata nakaʼakgskgawi latamanin.
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
