Йәһвә безнең күктәге гаиләсе турында белүебезне тели. Бу гаилә фәрештәләрдән тора. Алар Аллаһының уллары дип атала (Әюп 38:7). Фәрештәләр турында Изге Язмаларда нәрсә әйтелә? Алар кешеләргә нинди йогынты ясый? Бөтен фәрештәләр дә Аллаһының гаиләсенә керәме?

1. Фәрештәләр кемнәр алар?

Йәһвә фәрештәләрне җирне булдырганчы яраткан. Алар — аның кебек күктә яшәүче күренми торган рухлар (Еврейләргә 1:14). Күктә миллионлаган фәрештә бар; һәрберсе — аерым шәхес (Ачылыш 5:11). Алар Йәһвәнең «тавышын тыңлап сүзен үтиләр» (Зәбур 103:20). Борынгы заманда алар кайвакыт кешеләргә Йәһвәнең хәбәрләрен җиткергән, аның халкына ярдәм иткән һәм аларны коткарган. Бүгенге көннәрдә алар мәсихчеләрне Аллаһы турында белергә теләгән кешеләргә юнәлтә.

2. Шайтан һәм аның җеннәре кемнәр алар?

Кайбер фәрештәләр Йәһвәгә тугры булып калмаган. Фетнә күтәргән беренче фәрештә «бөтен дөньяны юлдан яздыручы Иблис һәм Шайтан дип атала» (Ачылыш 12:9). Шайтан башкалар өстеннән идарә итәргә теләгән, шуңа күрә ул беренче кешеләрне Аллаһыны тыңламаска котырткан. Соңрак хәтта башка фәрештәләр дә аның фетнәсенә кушылган. Бу фетнәчел фәрештәләр җеннәр дип атала. Йәһвә аларны күктән җиргә бәреп төшергән, һәм алар юк ителәчәк. (Ачылыш 12:9, 12 укы.)

3. Шайтан һәм җеннәр безне ничек юлдан яздырырга тырыша?

Шайтан һәм җеннәр күп кешеләрне спиритизм аша алдый. Спиритизм — җеннәр белән бәйләнешкә керергә тырышу. Кайбер кешеләр астрологлар, күрәзәчеләр, рухлар чакыручылар һәм өшкерүчеләргә бара. Башкалар исә гороскоплар карый, төш юрый һәм спиритизм белән бәйле дәвалау ысулларын куллана. Кешеләр үлгәннәр белән сөйләшеп була дип тә алдана. Ләкин Йәһвә безне кисәтә: «Рухлар чакыручыларга мөрәҗәгать итмә һәм күрәзәчеләр белән киңәшләшмә» (Левилеләр 19:31). Шулай итеп ул безне Шайтаннан һәм җеннәрдән яклый. Алар Аллаһының дошманнары һәм безгә зыян китерергә тели.

 ТИРӘНРӘК КАЗЫГЫЗ

6. Шайтан һәм җеннәргә каршы көрәштә җиңегез

Җеннәр белән Шайтан идарә итә. Ә тугры фәрештәләрне баш фәрештә Микаил җитәкли. Бу — Гайсәнең икенче исеме. Микаил никадәр куәтле? Ачылыш 12:7—9 ны укыгыз һәм җавап бирегез:

• Кем куәтлерәк — Микаил һәм аның фәрештәләреме я Шайтан һәм аның җеннәреме?

• Сез ничек уйлыйсыз, Гайсәнең шәкертләренә Шайтаннан һәм аның җеннәреннән куркырга кирәкме?

Сез Шайтан һәм аның җеннәренә каршы көрәштә җиңә аласыз. Ягъкуб 4:7 не укыгыз һәм җавап бирегез:

• Сез үзегезне Шайтан һәм җеннәрдән ничек яклый аласыз?

 ЙОМГАКЛАУ

Тугры фәрештәләр безгә ярдәм итә. Шайтан һәм аның җеннәре — Йәһвәнең дошманнары, һәм алар, кешеләрне алдар өчен, спиритизм куллана.

Кабатлау

• Йәһвәнең фәрештәләре кешеләргә аның турында белергә ничек ярдәм итә?

• Шайтан һәм аның җеннәре кемнәр алар?

• Ни өчен сез спиритизмнан ераграк торырга телисез?