SAMBIRO 24
Kasi Ŵangelo Mbanjani?
Yehova wakukhumba kuti tiyimanye makora mbumba yake ya kuchanya. Ŵangelo ŵali mu mbumba ya Chiuta, lekani ŵakuchemeka kuti “ŵana . . . ŵa Chiuta.” (Yobu 38:7) Kasi Baibolo likuti ŵangelo mbanjani? Kasi ivyo ŵakuchita vikukhwaska wuli ŵanthu? Kasi ŵangelo wose ŵali mu mbumba ya Chiuta?
1. Kasi ŵangelo mbanjani?
Yehova wakalenga ŵangelo pambere wandalenge charu chapasi. Ŵangelo tingaŵawona yayi chifukwa ni mizimu ndipo ŵakukhala kuchanya. (Ŵahebere 1:14) Ŵangelo ŵalipo mamiliyoni ghanandi chomene, ndipo waliyose wali na udindo wake. (Chivumbuzi 5:11) Ŵangelo ŵakuchita “ivyo [Yehova] wakuyowoya na kupulikira lizgu lake.” (Salimo 103:20) Kale, nyengo zinyake Yehova wakatumanga ŵangelo kuti ŵapeleke uthenga, kovwira panji kuponoska ŵanthu ŵake. Mazuŵa ghano ŵangelo ŵakulongozgera Ŵakhristu ku ŵanthu awo ŵakukhumba kusambira vya Chiuta.
2. Kasi Satana na viŵanda mbanjani?
Ŵangelo ŵanyake ŵakatondeka kugomezgeka kwa Yehova. Mungelo uyo wakadankha kugaluka wakuchemeka “Dyabulosi na Satana, [ndipo] wakupuluska charu chose.” (Chivumbuzi 12:9) Satana wakakhumbanga kuti ŵanthu ŵasopenge iyo, ndipo wakapangiska Adamu na Eva kweniso ŵangelo ŵanyake kuti nawo ŵagalukire Chiuta. Ŵangelo ŵakugaluka aŵa ŵakuchemeka viŵanda. Yehova wali kuŵachimbizgira pa charu chapasi ndipo sonosono apa waŵaparanyenge.—Ŵazgani Chivumbuzi 12:9, 12.
3. Kasi Satana na viŵanda ŵakupuluska wuli ŵanthu?
Satana na viŵanda ŵakupuluska ŵanthu kwizira mu vyamizimu, ndipo ŵakupangiska kuti ŵanthu ŵayowoyeskanenge na mizimu yiheni uwo mbunyankhasi pamaso pa Yehova. Mwachiyelezgero, ŵanthu ŵakuluta ku ŵakumanya vya nyenyezi, ŵakuloska, kweniso ku ng’anga. Ŵanyake ŵakupenja mankhwala agho ghakukolerana na vyamizimu. Viŵanda vikupuluskaso ŵanthu kugomezga kuti ŵangayowoyeskana na ŵakufwa. Kweni Yehova wakutichenjezga kuti: “Mungalutanga ku ng’anga chara, panji kufumba ku ŵakuloska.” (Levitiko 19:31) Yehova wakuchita ivi kuti wativikilire kwa Satana na viŵanda vyake. Iwo mbalwani ŵa Chiuta ndipo ŵakukhumba kutipweteka.
MANYANI VINANDI
Wonani vinthu viwemi ivyo ŵangelo ŵakuchita, uheni wakuchita vyamizimu kweniso ivyo tingachita kuti tijivikilire kwa Satana na viŵanda vyake.
4. Ŵangelo ŵakovwira ŵanthu kusambira vya Yehova
Ŵangelo ŵakupharazga mwakudunjika yayi. Iwo ŵakulongozgera ŵateŵeti ŵa Chiuta ku ŵanthu awo ŵakukhumba kusambira vya Yehova. Ŵazgani Chivumbuzi 14:6, 7, kufuma apo dumbiskanani mafumbo agha:
-
Chifukwa wuli tikukhumba kuti ŵangelo ŵatovwirenge pa mulimo wakupharazga?
-
Kasi mukujipulika wuli kumanya kuti ŵangelo ŵangatilongozgera ku ŵanthu awo ŵakukhumba kumanya unenesko wa mu Baibolo? Chifukwa wuli?
5. Kanani vyamizimu
Satana na viŵanda mbalwani ŵa Yehova, kweniso mbalwani ŵithu. Ŵazgani Luka 9:38-42, kufuma apo dumbiskanani fumbo ili:
-
Kasi viŵanda vikuchita wuli na ŵanthu?
Tikwenera kukana kuchita vinthu ivyo vikukolerana na vyamizimu. Ŵazgani Dotoronome 18:10-12, kufuma apo dumbiskanani mafumbo agha:
-
Kasi viŵanda vikuchita wuli kuti vitipuluske na kuyowoyeskana nase? Kasi ni vinthu wuli vyakukhwaskana na vyamizimu ivyo ŵanthu ŵakuchita uko mukukhala?
-
Kasi mukuwona kuti Yehova wakuchita makora kutikanizga kuchita vyamizimu? Chifukwa wuli?
Wonelerani VIDIYO, kufuma apo dumbiskanani mafumbo agha.
-
Kasi mukuwona kuti chinthumwa icho Palesa wakavwalikanga mwana wake chikaŵa chakofya? Chifukwa wuli?
-
Kasi Palesa wakeneranga kuchita vichi kuti wajivikilire ku viŵanda?
Kwamba kale, Ŵakhristu ŵaunenesko ŵakukana kuchita kalikose kakukhwaskana na vyamizimu. Ŵazgani Milimo 19:19 na 1 Ŵakorinte 10:21, kufuma apo dumbiskanani fumbo ili:
-
Chifukwa wuli ntchakuzirwa kuti muwotche panji kutaya chilichose chakukhwaskana na vyamizimu?
6. Mungamutonda Satana na viŵanda vyake
Satana ndiyo wakulamulira viŵanda. Kweni ŵangelo ŵakugomezgeka ŵakulongozgeka na mungelo mulara Mikayeli, ilo ni zina linyake la Yesu. Mikayeli ngwankhongono chomene. Ŵazgani Chivumbuzi 12:7-9, kufuma apo dumbiskanani mafumbo agha:
-
Kasi pakati pa Mikayeli na ŵangelo ŵake kweniso Satana na viŵanda vyake wankhongono chomene ni njani?
-
Kasi mukuwona kuti ŵalondezgi ŵa Yesu ŵakwenera kopa Satana na viŵanda vyake?
Namwe mungamutonda Satana na viŵanda vyake. Ŵazgani Yakobe 4:7, kufuma apo dumbiskanani fumbo ili:
-
Kasi mungajivikilira wuli kwa Satana na viŵanda vyake?
IVYO ŴANYAKE ŴAKUYOWOYA: “Palije suzgo kuseŵera magemu, maseŵero panji kuwonelera mafilimu gha vyamizimu. Nkhani njakuti wamunthu ukondwepo waka.”
-
Chifukwa wuli ntchakofya kughanaghana nthena?
MWAKUDUMURA
Ŵangelo ŵakugomezgeka ŵakutovwira. Satana na viŵanda vyake mbalwani ŵa Yehova, ndipo ŵakugwiliskira ntchito vyamizimu kuti ŵapuluske ŵanthu.
Kuweleramo
-
Kasi ŵangelo ŵakovwira wuli ŵanthu kusambira vya Yehova?
-
Kasi Satana na viŵanda mbanjani?
-
Chifukwa wuli mukwenera yayi kuchitako chilichose chakukhwaskana na vyamizimu?
SANGANI FUNDO ZAKUSAZGIKIRA
Wonani ukaboni wakuti Yesu ni mulara wa ŵangelo panji kuti Mikayeli.
“Kasi Mikayeli, Mungelo Mulara, Ni Njani?” (Nkhani ya pa Intaneti)
Wonani ukaboni wakuti Dyabulosi waliko nadi.
Wonani ivyo mwanakazi munyake wakachita kuti wafwatuke ku viŵanda.
“Wakamanya Kuti Umoyo Uli na Chilato” (Gongwe la Mulinda, Julayi 1, 1993)
Wonani umo Satana wakugwiliskira ntchito vyamizimu kuti wapuluske ŵanthu.
“Unenesko Pakuyowoya za Mayere na Ufwiti” (Nthowa Yakuya ku Umoyo, chigaŵa 5)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
