MATAUPU 24

Se a te Mea Tonu e Uiga ki Agelu?

FAKATAGI/PEI

E manako a Ieova ke iloa ne tatou a mea e uiga ki tena kāiga i te lagi. E aofia i te kāiga tenā ko agelu, kolā e taku ko ‘tama a te Atua.’ (Iopu 38:7) Ne a mea e fakaasi mai i te Tusi Tapu e uiga ki agelu? E fesoasoani atu pefea latou ki tino? E mata, e aofia a agelu katoa i te kāiga o te Atua?

1. Ko oi a agelu?

Ne faite ne Ieova a agelu a koi tuai o faite te lalolagi. E pelā mo ia, a agelu ne tino faka-te-agaga kolā e se lavea ki mata kae e ‵nofo i te lagi. (Epelu 1:14) E lau i miliona te aofaki o agelu, kae e tu ‵kese eiloa a agelu taki tokotasi. (Fakaasiga 5:11) “E tauave ne latou tena muna [a Ieova], kae faka‵logo ki tena leo.” (Salamo 103:20) I aso mua, ne uga atu sāle ne Ieova ana agelu ke fakaoko ana fekau, ke fesoasoani atu kae faka‵sao ana tino. I aso nei, e takitaki ne agelu a Kelisiano ki tino kolā e ma‵nako ke iloa ne latou a te Atua.

2. Ko oi a Satani mo ana temoni?

E isi ne agelu ne seki tumau i te fakamaoni ki a Ieova. A te agelu muamua telā ne ‵teke atu “e fakaigoa ki te Tiapolo mo Satani, telā e takitaki ‵se ne ia te lalolagi nofoaki kātoa.” (Fakaasiga 12:9) Ne manako a Satani ke pule a ia ki nisi tino, tenā ne fakamalosi ne ia a te tauavaga muamua kae fakamuli ifo ko nisi agelu ke ‵kau atu ki tena ‵tekeatuga. E fakaigoa a agelu ‵teke konā ki temoni. Ne ‵tuli ifo ne Ieova a latou mai te lagi ki te lalolagi, kae ka fakaseai atu latou.—Faitau te Fakaasiga 12:9, 12.

3. E takitaki ‵se pefea ne Satani mo ana temoni a tatou?

E takitaki ‵se ne Satani mo ana temoni a tino e tokouke e auala i faifaiga fakatemoni, io me ko te faivailakau, telā ko te fesokotaki atu ki agaga ma‵sei. E pelā mo nisi tino, e fesokotaki atu latou ki tino iloilo fetū, tino fakamatala mea ‵tupu i aso mai mua, mo tino faivailakau. E ‵sala atu a nisi tino ki togafiti kolā e aofia ei a faifaiga faivailakau ke faka‵lei aka olotou ma‵saki. Ko oti foki ne fakaloiloi a nisi tino ke tali‵tonu me e mafai o fai‵pati latou mo tino ‵mate. Kae ko leva ne fakailoa mai ne Ieova ki a tatou: “Sa ‵fuli atu ki tino kolā e fesokotaki mo agaga, kae sa olo ki tino fakamatala mea ‵tupu i aso mai mua.” (Levitiko 19:31) E fakailoa mai ne ia te mea tenei ke puipui ei tatou mai i a Satani mo ana temoni. A latou ko fili o te Atua kae ma‵nako ke fakalogo‵mae tatou.

KELI MALOSI IFO

Tauloto ki mea ‵gali kolā e fai ne agelu, te fakamataku o faifaiga faivailakau, mo te auala ke puipui ei tatou mai i a Satani mo ana temoni.

4. E fesoasoani atu agelu ki tino ke iloa ne latou a mea e uiga ki a Ieova

E se talai ‵tonu atu a agelu a te Atua ki tino. Kae e mafai o takitaki ne latou a tino tapuaki a te Atua ki tino kolā e fia iloa ne latou a ia. Faitau te Fakaasiga 14:6, 7, ko sau‵tala ei ki fesili konei:

Kaia e ‵tau ei o maua ne tatou te fesoasoani mai i agelu ke talai atu?
E mata, e fakamalosi loto ke iloa atu, me e mafai ne agelu o takitaki koe ki tino kolā e ‵tau o lagona ne latou a mea e uiga ki te Tusi Tapu? Kaia?

5. ‵Teke atu ki faifaiga faivailakau

A Satani mo ana temoni ko fili o Ieova. A latou foki ko fili o tatou. Faitau te Luka 9:38-42, ko sau‵tala ei ki te fesili tenei:

Ne a faifaiga a temoni ki tino?

E se talia ne tatou a faifaiga fakatemoni i ‵tou olaga. Faitau te Teutelonome 18:10-12, ko sau‵tala ei ki fesili konei:

Ne a auala e taumafai ei a temoni o fakamalosi kae fesokotaki mai ki a tatou? Ne a faifaiga masani i te koga e nofo koe i ei?
E mata, e foliga ‵lei ki a koe me e fakatapu ne Ieova a faifaiga faivailakau? Kaia?

Pei te VITIO, ko sau‵tala ei ki fesili konei.

VITIO: “‵Teke Atu te Tiapolo” (5:02)

Se a tau faka‵tau, e fakamataku a te taulima telā ne pei ne te tamaliki fafine a Palesa? Kaia?
Ne a mea ne ‵tau o fai ne Palesa ke puipui a ia mai temoni?

Ne ‵teke atu faeloa a Kelisiano ‵tonu ki temoni. Faitau te Galuega 19:19 mo te 1 Kolinito 10:21, ko sau‵tala ei ki te fesili tenei:

Kaia e tāua ei ke fakamasei so se mea i ou kope telā e isi sena sokoga ki faifaiga faivailakau?

6. Ke manumalo i te taua atu ki a Satani mo ana temoni

A temoni e pule ne Satani. Kae ko agelu fakamaoni e pule atu ki ei a te agelu pule ko Mikaele, telā ko Iesu tena suā igoa. E pefea te malosi o Mikaele? Faitau te Fakaasiga 12:7-9, ko sau‵tala ei ki fesili konei:

Ko oi e malosi atu? Ko Mikaele mo ana agelu io me ko Satani mo ana temoni?
Se a tau faka‵tau e mata, e ‵tau o ma‵taku a soko o Iesu i a Satani mo ana temoni?

E mafai o manumalo koe i te taua atu ki a Satani mo ana temoni. Faitau te Iakopo 4:7, ko sau‵tala ei ki te fesili tenei:

E mafai pefea ne koe o puipui a koe mai i a Satani mo ana temoni?

MEA E FAI MAI NE NISI TINO: “E se masei a te tafao io me ko te onoono ki ata agaga. Se mea fua mo fakafiafia.”

Kaia e fakamataku ei te kilokiloga tenā?

MANATU AOGA

A agelu fakamaoni e fesoasoani mai ki a tatou. A Satani mo ana temoni ko fili o Ieova, kae e fakaaoga ne latou a faifaiga faivailakau ke takitaki ‵se a tino.

Fesili

E fesoasoani atu pefea a agelu a Ieova ke iloa ne tino a mea e uiga ki a ia?
Ko oi a Satani mo ana temoni?
Kaia e se manako ei koe ke aofia i faifaiga faivailakau?

Taimi ne oti ei te mataupu:

Mea e Mafai o Fai

Mafaufau me e mata, e isi sou kope telā e isi sena sokoga ki faifaiga faivailakau kae ‵talo mō te poto ke fakaiku aka ne koe a te mea e ‵tau o fai ki ei.

Nisi mea:

Nisi mea e mafai o fai ne koe