OCIPAMA 24
Cipi Ocili Catiamẽla Kovangelo?
Yehova o yongola okuti tu lilongisa eci catiamẽla kepata liaye lio kilu. Vepata liaco mua kongela ovangelo va tukuiwa hati, “omãla . . . va Suku.” (Yovi 38:7) Nye Embimbiliya li popia catiamẽla kovangelo? Va panga ndati onepa komuenyo womanu? Ovangelo vosi va panga hẽ onepa kepata lia Suku?
1. Velie ovangelo?
Yehova wa lulika ovangelo eci ka lulikile ongongo. Ndeci eye, ovo oviluvo ka vi muiwa viespiritu vi kasi kilu. (Va Heveru 1:14) Kuli olohuluwa viovangelo kuenda ovo va litepa. (Esituluilo 5:11) Ovo va “tẽlisa olondaka via [Yehova] poku pokola kondaka yaye.” (Olosamo 103:20) Kosimbu, Yehova pamue wa enda oku va tuma oku eca esapulo, oku kuatisa, loku yovola afendeli vaye. Koloneke vilo, ovo va songuila Akristão komanu va yongola oku lilongisa catiamẽla ku Suku.
2. Helie Satana kuenda olondele viaye?
Ovangelo vamue ka va amameleko oku kakatela ku Yehova. Ungelo watete wa lekisa esino o “tukuiwa Eliapu haeye Satana, una o kasi oku yapuisa ilu lieve liosi.” (Esituluilo 12:9) Satana wa yonguile oku viala vakuavo, kuenje wa yapuisa omanu vatete noke ovangelo vakuavo va likongelavo kesino liaye. Ovangelo vaco vakuesino va tukuiwa okuti, olondele. Yehova wa va tundisa kilu kuenje va kasi palo posi noke va ka kunduiwa.—Tanga Esituluilo 12:9, 12.
3. Satana kuenda olondele, va seteka ndati oku tu yapuisa?
Satana kuenda olondele, va yapuisa omanu valua pocakati cumbanda okuti, elinga limue lioku seteka oku vangula laspiritu a vĩha. Ndeci, omanu vamue va sanda vakuakutãha lolombungululu, vakuakutãha, vakualondele kuenda vakuombanda. Vakuavo va sanda oku sakuiwa lovihemba mua kongela umbanda. Omanu va tavavo kuhembi wokuti, va pondola oku vangula lava va fa. Pole, Yehova o tu lungula ndoco: “Ko ka sandiliyi omanu vakuakuvangula lolondele, ale vakuakutãha.” (Ovisila 19:31) Eye wa tu ĩha elungulo liaco oco a tu teyuile ku Satana lolondele viaye. Ovo, ovanyãli va Suku kuenda va yongola oku tu linga cimue cĩvi.
LILONGISA ONDONGOSI
Lilongisa ovina viwa ovangelo va lingainga, ohele yi tunda kumbanda, ndomo tu liteyuila ku Satana kuenda kolondele.
4. Ovangelo va kuatisa omanu oku lilongisa catiamẽla ku Yehova
Ovangelo va Suku havoko muẽle va kundila omanu. Pole, ovo va songuila afendeli va Suku komanu vana va yongola oku lilongisa catiamẽla kokuaye. Tanga Esituluilo 14:6, 7, noke konomuisa apulilo a kuãimo:
-
Momo lie tu sukilila ekuatiso liovangelo poku kunda?
-
Oku kũlĩha okuti, ovangelo va ku songuila komanu va yongola oku yeva ocili Cembimbiliya ci ku pamisa? Momo lie?
5. Yuvula umbanda
Satana kuenda olondele, ovanyãli va Yehova. Ovo ovanyãli vetuvo. Tanga Luka 9:38-42, noke konomuisa epulilo li kuãimo:
-
Nye olondele vi lingainga komanu?
Ka tu yongola okuti olondele vi tu yapuisa. Tanga Esinumuĩlo 18:10-12, noke konomuisa apulilo a kuãimo:
-
Volonjila vipi olondele vi seteka oku tu yapuisa loku sapela letu? Ovihilahila vipi via siata posongo o kasi?
-
Kokuove ca sunguluka hẽ okuti Yehova o pisa ovihilahila viumbanda? Momo lie?
Tala OVIDEO, noke konomuisa apulilo a kuãimo.
-
O sima hẽ okuti ocinunga cukolo ca walisiwa komõla a Palesa ci koka ohele? Momo lie?
-
Palesa, nye a sukilile oku linga oco a liteyuile kolondele?
Akristão vocili va siata oku tamalãla lolondele. Tanga Ovilinga 19:19 kuenda 1 Va Korindo 10:21, noke konomuisa epulilo li kuãimo:
-
Momo lie ci kuetele esilivilo oku kundula cosi o kuete okuti ci kuete elitokeko lumbanda?
6. Yula uyaki la Satana kuenda olondele viaye
Olondele via vialiwa la Satana. Pole, ovangelo vakuekolelo va songuiwa lungelo unene Mingeli okuti, onduko yikuavo ya Yesu. Unene upi Mingeli a kuete? Tanga Esituluilo 12:7-9, noke konomuisa apulilo a kuãimo:
-
Pokati ka Mingeli lovangelo vaye kuenda Satana lolondele viaye, helie o kuete unene wa velapo?
-
O sima hẽ okuti olondonge via Yesu vi sukila oku kuatela usumba Satana lolondele viaye?
Ove, o pondola oku yula uyaki la Satana kuenda olondele viaye. Tanga Tiago 4:7, noke konomuisa epulilo li kuãimo:
-
O liteyuila ndati ku Satana kuenda kolondele viaye?
OMANU VAMUE VA POPIA VATI: “Ka cĩviko oku linga olomapalo ale oku tala olofilme viatiamẽla kumbanda. Ocitalukilo cimue ño.”
-
Momo lie ocisimĩlo caco ka ca sungulukilile?
NYE WA LILONGISA?
Ovangelo vakuekolelo va tu kuatisa. Satana lolondele viaye ovanyãli va Yehova kuenda va talavaya lumbanda oco va yapuise omanu.
Oku Pitulula
-
Ovangelo va Yehova va kuatisa ndati omanu oku lilongisa catiamẽla kokuaye?
-
Helie Satana lolondele viaye?
-
Momo lie o yuvuila oku kuata ocina cimue cumbanda?
OCO O KŨLĨHE OVINA VIKUAVO
Tala uvangi u lekisa okuti Yesu eye Mingeli ungelo unene.
“Helie Mingeli Ungelo Unene?” (Ocipama ci sangiwa lika vo Internet)
Kũlĩhĩsa uvangi u lekisa okuti, Eliapu hacisimĩlo cimueko ale ocituwa cĩvi ci kasi vokati ketu.
“Anga hẽ Eliapu li Kasiko?” (Ocipama ci sangiwa lika vo Internet)
Tala ndomo ukãi umue a siapo ovina viumbanda.
“Eye wa Limbuka Okuti Omuenyo u Kuete Ocimãho” (Utala Wondavululi 1 Wevambi Linene 1993)
Kũlĩha ndomo Satana a talavaya lumbanda oco a yapuise omanu.
“Ocili Catiamẽla Kalumbu, Koku Tãha Kuenda Kumbanda” (Onjila yi tuala Komuenyo Ko Pui —Ove hẽ wa yi Sanga? Onepa 5)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
