NGUDO 24
Ndi Ifhio Ngoho Nga Ha Vharuṅwa?
Yehova u ṱoḓa ri tshi ḓivha nga ha muṱa wawe u re ṱaḓulu. Wonoyo muṱa u katela vharuṅwa vhane vha vhidzwa “vharwa . . . vha Mudzimu.” (Yobo 38:7) Bivhili i ri mini nga ha vharuṅwa? Vharuṅwa vha na ṱhuṱhuwedzo ifhio kha vhathu? Naa vharuṅwa vhoṱhe ndi tshipiḓa tsha muṱa wa Mudzimu?
1. Vharuṅwa ndi vhonnyi?
Yehova o sika vharuṅwa a sa athu sika ḽifhasi. U fana na Yehova, vharuṅwa vha dzula ṱaḓulu nahone a ri koni u vha vhona. (Vhahevheru 1:14) Hu na vharuṅwa vhanzhi-vhanzhi nahone a vha fani. (Nzumbululo 5:11) Vha “ita zwine [Yehova] a amba,” vha ‘thetshelesa ipfi ḽawe.’ (Phisalema 103:20) Zwifhingani zwa kale, nga zwiṅwe zwifhinga Yehova o ruma vharuṅwa vhawe u itela u ḓivhadza mulaedza wawe, u thusa vhathu vhawe na u vha tshidza. Ṋamusi vharuṅwa vha livhisa Vhakriste kha vhathu vhane vha ṱoḓa u guda nga ha Mudzimu.
2. Saṱhane na madimoni awe ndi vhonnyi?
Vhaṅwe vharuṅwa vho shandukela Yehova. Muruṅwa wa u thoma we a shandukela Mudzimu ndi Diabolo ane a vha ‘Saṱhane, ane a khou xedza ḽifhasi ḽoṱhe.’ (Nzumbululo 12:9) Saṱhane o vha a tshi ṱoḓa u vhusa zwiṅwe zwivhumbiwa, ndi ngazwo o ṱuṱuwedza Adamu na Eva uri vha si thetshelese Yehova. Nga murahu, o ṱuṱuwedza na vhaṅwe vharuṅwa uri vha si thetshelese Yehova. Vhenevho vharuṅwa vhe vha shandukela Mudzimu vha vhidzwa madimoni. Yehova o vha pandela ṱaḓulu, vha poselwa kha ḽifhasi nahone vha ḓo fheliswa.—Vhalani Nzumbululo 12:9, 12.
3. Saṱhane na madimoni awe vha lingedza hani u ri xedza?
Saṱhane na madimoni awe vha shumisa vhudimoni kana vhungome u itela u xedza vhathu vhanzhi. Zwenezwo ndi u shumisana na madimoni nga ho livhaho kana nga hu songo livhaho. Fhedzi vhathu vhanzhi vhane vha ita zwa vhungome, a vha zwi ṱhogomeli uri vha khou shumisana na madimoni. Sa tsumbo, vhaṅwe vha ya kha vhathu vhane vha bvumba, vhane vha bvumba nga dziṋaledzi, vhaporofita na kha dziṅanga. Vhaṅwe vha ṱoḓa u lafhiwa nga zwithu zwine zwa katela vhudimoni. Vhathu vho dovha vha fhurwa uri vha tende uri zwi a konadzea u amba na vhathu vho lovhaho. Fhedzi Yehova u a ri tsivhudza uri: “Ni songo pambutshela kha mingome, ni songo ya kha vhabvumbi.” (Levitiko 19:31) U ri vhudza zwenezwi u itela u ri tsireledza kha Saṱhane na madimoni awe. Ndi maswina a Mudzimu nahone vha ṱoḓa u ri huvhadza.
GUDANI ZWO ENGEDZEAHO
Gudani nga ha zwithu zwavhuḓi zwine zwa itwa nga vharuṅwa, khombo dza u shumisana na madimoni na uri ri nga ḓitsireledza hani kha Saṱhane na madimoni awe.
4. Vharuṅwa vha thusa vhathu uri vha gude nga ha Yehova
Vharuṅwa vha Mudzimu a vha ḓivhadzi mafhungo maḓifha nga ho livhaho kha vhathu. Fhedzi vha livhisa vhashumeli vha Mudzimu kha vhathu vhane vha ṱoḓa u guda nga hae. Vhalani Nzumbululo 14:6, 7, ni kone u fhindula mbudziso dzi tevhelaho:
-
Ndi ngani ri tshi ṱoḓa uri vharuṅwa vha ri thuse musi ri tshi ḓivhadza mafhungo maḓifha?
-
Naa zwi a ni khuthadza u ḓivha uri vharuṅwa vha nga ni livhisa kha vhathu vhane vha ṱoḓa u pfa mulaedza u re Bivhilini? Ndi ngani ni tshi ralo?
5. Iledzani Vhudimoni
Saṱhane na madimoni awe ndi maswina a Yehova. Na riṋe ndi maswina ashu. Vhalani Luka 9:38-42, ni kone u fhindula mbudziso i tevhelaho:
-
Madimoni a ita mini kha vhathu?
A ri ṱoḓi madimoni a tshi ṱuṱuwedza zwine ra zwi ita. Vhalani Dotoronomio 18:10-12, ni kone u fhindula mbudziso dzi tevhelaho:
-
Madimoni a lingedza hani u amba na riṋe na u ri ṱuṱuwedza uri ri shumisane nao? Ndi zwifhio zwithu zwo ḓoweleaho zwi tshimbidzanaho na vhudimoni zwine zwa itwa hune na dzula hone?
-
Naa ni vhona zwi zwavhuḓi uri Yehova u ṱoḓa ri tshi iledza zwithu zwine zwa tshimbidzana na vhudimoni? Ndi ngani ni tshi ralo?
Ṱalelani VIDIO, ni kone u fhindula mbudziso dzi tevhelaho.
-
Naa ni vhona u nga tshithu tshe Palesa a tshi ambadza ṅwana wawe u itela u mu tsireledza kha madimoni tshi na khombo? Ndi ngani ni tshi ralo?
-
Palesa o vha a tshi tea u ita mini u itela u tsireledzwa kha madimoni?
Ndi kale Vhakriste vha vhukuma vha tshi lwa na madimoni. Vhalani Mishumo 19:19 na 1 Vhakorinta 10:21, ni kone u fhindula mbudziso i tevhelaho:
-
Ndi ngani zwi zwa ndeme u laṱa tshiṅwe na tshiṅwe tshine tsha tshimbidzana na vhudimoni?
6. Ilwani na Saṱhane na madimoni awe ni vha kunde
Madimoni a vhuswa nga Saṱhane. Fhedzi vharuṅwa vha fhulufhedzeaho vha rangwa phanḓa nga Mikaele, ane a vha muhulwane wa vharuṅwa. Mikaele ndi ḽiṅwe dzina ḽa Yesu. Mikaele u na maanḓa mangafhani? Vhalani Nzumbululo 12:7-9, ni kone u fhindula mbudziso dzi tevhelaho:
-
Ndi nnyi a re na maanḓa u fhira muṅwe? Ndi Mikaele na vharuṅwa vhawe kana ndi Saṱhane na madimoni awe?
-
Naa ni vhona u nga vhatevheli vha Yesu vha tea u ofha Saṱhane na madimoni awe?
Ni nga kunda Saṱhane na madimoni awe. Vhalani Yakobo 4:7, ni kone u fhindula mbudziso i tevhelaho:
-
Ni nga ḓitsireledza hani kha Saṱhane na madimoni awe?
VHAṄWE VHATHU VHA AMBA URI: “A zwo ngo khakhea u thetshelesa muzika, u tamba mitambo kana u ṱalela mimuvi ine ya tshimbidzana na vhudimoni. Ndi zwa u ḓimvumvusa.”
-
Ndi ngani zwi khombo u humbula nga yeneyo nḓila?
NO GUDA MINI?
Vharuṅwa vha fhulufhedzeaho vha a ri thusa. Saṱhane na madimoni awe ndi maswina a Yehova nahone vha shumisa vhudimoni u itela u xedza vhathu.
Ni Kha Ḓi Zwi Humbula?
-
Vharuṅwa vha Yehova vha khou thusa hani vhathu uri vha gude nga hae?
-
Saṱhane na madimoni awe ndi vhonnyi?
-
Ndi ngani ni tshi ṱoḓa u iledza tshiṅwe na tshiṅwe tshine tsha tshimbidzana na vhudimoni?
WANANI ZWO ENGEDZEAHO
Gudani uri ndi ngani ri tshi ḓivha uri Yesu ndi Mikaele ane a vha muhulwane wa vharuṅwa.
“Mikaele Muhulwane Wa Vharuṅwa Ndi Nnyi?” (Thero i re kha jw.org)
Vhonani vhuṱanzi vhu sumbedzaho uri Diabolo ndi muthu wa vhukuma.
Vhonani uri muṅwe mufumakadzi o litsha hani u langiwa nga madimoni.
“O Wana Ndivho Vhutshiloni” (Tshiingamo, 1 July 1993)
Gudani nga ha uri Saṱhane u shumisa hani vhudimoni u itela u xedza vhathu.
“U Ḓivha Ngoho Nga Ha Manditi Na Vhuloi” (Nḓila I Yaho Vhutshiloni Vhu Sa Fheli, tshipiḓa 5)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
