Karuyag ni Jehova nga mahibaro kita mahitungod ha iya pamilya ha langit. Ito nga pamilya nag-uupod han mga anghel, nga gintatawag nga mga “anak han Dios.” (Job 38:7) Ano an ginsisiring han Biblia mahitungod ha mga anghel? Paonan-o hira nakakaapekto ha mga tawo? Ngan an ngatanan ba nga anghel bahin han pamilya han Dios?

1. Hin-o an mga anghel?

Ginlarang ni Jehova an mga anghel antes pa niya larangon an tuna. Pariho ha iya, diri hira nakikita nga mga espiritu nga naukoy ha langit. (Hebreo 1:14) Minilyon an mga anghel, ngan an tagsa ha ira iba-iba an personalidad. (Pahayag 5:11) ‘Gintutuman nira an pulong ni Jehova ngan nasugot ha iya tingog.’ (Salmo 103:20) Ha kadaan nga panahon, hi Jehova usahay nagsusugo hin mga anghel basi igsumat an iya mga mensahe ngan basi buligan ngan talwason an iya katawohan. Yana, gin-gigiyahan han mga anghel an mga Kristiano ngadto ha mga tawo nga naruruyag mahibaro mahitungod ha Dios.

2. Hin-o hi Satanas ngan an iya mga demonyo?

May mga anghel nga waray magpabilin nga matinumanon kan Jehova. An siyahan nga anghel nga nagrebelde “gintatawag nga Yawa ngan Satanas, nga nanlilimbong ha bug-os nga inuukyan nga tuna.” (Pahayag 12:9) Karuyag ni Satanas nga mandoan an iba, salit gin-impluwensyahan niya hira Adan ngan Eva, ngan ha urhi pati pa ngani an iba nga mga anghel nga umupod ha iya ha pagrebelde. An mga anghel nga nagrebelde gintatawag nga mga demonyo. Ginpaiwas hira ni Jehova ha langit ngan iginlabog nganhi ha tuna, ngan bubungkagon hira.—Basaha an Pahayag 12:9, 12.

3. Paonan-o hi Satanas ngan an mga demonyo nangangalimbasog ha paglimbong ha aton?

Ginlilimbongan ni Satanas ngan han mga demonyo an damu nga tawo pinaagi han demonismo, o espiritismo, nga amo an maraot nga buhat han pagtesting ha pakigkomunikar ha mga espiritu. Pananglitan, may mga tawo nga nakonsulta ha mga astrologo, parapanigo, saykik, ngan tambalan. An iba nagamit hin mga klase han pagtambal nga may upod nga espiritismo. Ginpapatoo liwat nira an mga tawo nga puydi makaistorya an mga patay. Pero hi Jehova nagpapahamangno ha aton: “Ayaw pagdangop ha mga espiritista, ngan ayaw pagkonsulta ha mga parapanigo.” (Levitico 19:31) Iginpapahamangno niya ini ha aton basi proteksyonan kita tikang kan Satanas ngan ha mga demonyo. Mga kaaway hira han Dios, ngan karuyag nira nga dauton kita.

 DUGANG NGA USISAHA

6. Magin madaugon ha imo pakig-away kan Satanas ngan ha iya mga demonyo

Ginmamandoan ni Satanas an mga demonyo. Pero an magtinumanon nga mga anghel ginpapangunahan han arkanghel nga hi Miguel, nga usa pa nga ngaran ni Jesus. Ano kagamhanan hi Miguel? Basaha an Pahayag 12:7-9, katapos, hisguti niyo ini nga mga pakiana:

• Hin-o an mas gamhanan? Hi Miguel ngan an iya mga anghel o hi Satanas ngan an iya mga demonyo?

• Ha imo hunahuna, angay ba mahadlok an mga sumurunod ni Jesus kan Satanas ngan ha iya mga demonyo?

Mahimo ka magdaog ha imo pakig-away kan Satanas ngan ha iya mga demonyo. Basaha an Santiago 4:7, katapos, hisguti niyo ini nga pakiana:

• Paonan-o mo mapuproteksyonan an imo kalugaringon tikang kan Satanas ngan ha mga demonyo?

 SUMARYO

An magtinumanon nga mga anghel nabulig ha aton. Hi Satanas ngan an iya mga demonyo mga kaaway ni Jehova, ngan ginagamit nira an espiritismo basi limbongan an mga tawo.

Repaso

• Paonan-o ginbubuligan han mga anghel ni Jehova an mga tawo basi mahibaro mahitungod ha iya?

• Hin-o hi Satanas ngan an iya mga demonyo?

• Kay ano nga karuyag mo likyan an espiritismo?