იეჰოვას ოკო, ქიგებგათ თიშ ზეციერ ოჯახიშ გურშენ. თე ოჯახშა მიშულა ანგელოზეფ, ნამდგას „ღორონთიშ სქუალეფ“ ჯოხონა (იობი 38:7). მუს იჩიებ ბიბლია ანგელოზეფიშ გურშენ? მუნერ გავლენა უღნა თინეფს ადამიანეფწკუმა? არძა ანგელოზ რენო ღორონთიშ ოჯახიშ წევრ?

1. მი რენა ანგელოზეფ?

იეჰოვაქ დიო ანგელოზეფ გაჭყჷ დო უკულ დედამიწა. ღორონთცალო თინეფ ხოლო უხილავ სულიერ არსებეფ რენა დო ზეცას ცხოვრენა (ებრაელები 1:14). მილიონობით ანგელოზ არსებენს დო თითოულ ინდივიდუალურ პიროვნება რე (გამოცხადება 5:11). თინეფ ასრულენა იეჰოვაშ სიტყვას დო ომორჩილნა თიშ ნარაგადის (ფსალმუნი 103:20). ჯვეშ დროს, იეჰოვა ნამთინე ანგელოზის გიმირინუანდჷ, ნამდა ცნობა გეგნოჩკო მუშ ხალხის, ქიმეხვარკო თინეფს ვარდა გასაჭირშე დერსხკო. ამდღა ანგელოზეფ ხემძღვანელენა ქრისტიანეფს, ნამდა დოგორან თიცალ ხალხ, მიდგას ღორონთიშ გაჩინებაფა ოკო.

2. მი რენა სატანა დო თიშ დემონეფ?

ნამთინე ანგელოზიქ ვა დოსქიდ ღორონთიშ ართგურქ. პირველ ანგელოზის, მიდგაქ ღორონთიშ წინააღმდეგ იდჷ, „ეშმაკ დო სატანა ჯოხო დო . . . ოჩილითუანს მთელ მსოფლიოს“ (გამოცხადება 12:9). თის ოკოდ, ირკოჩიქ თის დემორჩილკო, ათეშენ დაღორ პირველ ადამიანეფ. უმოს გვიანო თის შხვა ანგელოზეფქ ხოლო ქაკათეს, ნამუთ ბიბლიას დემონეფიშ სახელით რენა მოშინაფილ. იეჰოვაქ ზეცაშე გეგმარღვჷ თინეფ დო საბოლათ გენადგურებნა (წეკითხით გამოცხადებაშ 12:9, 12).

3. მუჭო ოცადნა სატანა დო დემონეფ, მიმოჩილითუან?

სატანა დო დემონეფ ბრელ ადამიანს ოჩილითუანა სპირიტიზმიშ საშვალებათ, მუდგაშა მიშურს შურეფწკუმა დაკავშირებაშ მცდელობა. მაგალთო, ნამთინე მოხვარას თხინს ასტროლოგეფს, მაკითხეეფს დო თინეფს, მით შელორსათ ვარდა ზებუნებრივ ძალეფით ოცადნა ხალხიშ სქილიდაფას. შხვეფ მკურნალობაშ თიშნერ მეთოდის გიშეგორნა, ნამუთ სპირიტიზმწკუმა რე დაკავშირებულ. თეს გეძინელ, ხალხის ჯერს, ნამდა შეულებნა ღურელეფშა დორაგადაფა. მარა იეჰოვა მაფრთხილენა: „ვემერთათ შურეფიშ გიმმაძახებელეფშა დო ვართ მაკითხეეფშა“ (ლევიანები 19:31). თინა თიშენ მაფრთხილენა, ნამდა დოფთხილუან სატანა დო თიშ დემონეფშე. თინეფ ღორონთიშ ნტერეფ რენა დო ოკონა ჩქინ ცილება.

 ქიგეგით უმოს

6. ქეწინააღმდეგით სატანა დო დემონეფს

დემონეფს სატანა ხემძღვანელენს. მარა ართგურ ანგელოზეფ ომორჩილნა იესოს, ნამდგას მთავარანგელოზ მიქაელ ხოლო ჯოხო. მუსხით ძალიერ რე მიქაელ? წეკითხით გამოცხადებაშ 12:7—9 დო უკულ გარჩით თუდო მოჩამილ კითხვეფ:

• ნამ უმოს ძალიერ რე — მიქაელ დო მუშ ანგელოზეფ დოვარ სატანა დო მუშ დემონეფ?

• მუჭო ფიქრენთ, ოკო ოშქურდანიო იესოშ მიმაჸუნალეფს სატანა დო თიშ დემონეფშა?

თქვა შეილებნა, გიორჯგინათ სატანა დო თიშ დემონეფს. წეკითხით იაკობიშ 4:7 დო გარჩით თუდო მოჩამილ კითხვა:

• მუჭო შეილებნა დუდ დითხილუათ სატანა დო დემონეფშე?

 დასკვნა

ართგურ ანგელოზეფ მოხვარნა. სატანა დო მუშ დემონეფ იეჰოვაშ ნტერეფ რენა დო თინეფ ხალხიშ ოჩილითაფარო სპირიტიზმის ირინუანა.

გამეორებელ კითხვეფ

• მუჭო ოხვარნა იეჰოვაშ ანგელოზეფ ხალხის, ნამდა ქიგეგან ღორონთიშ გურშენ?

• მი რენა სატანა დო დემონეფ?

• მუშენ გოკონა, სპირიტიზმშე შორს დეკინათ დუდ?