LESON 24
Ino ma Ny Marin̈y Momba Anjely aby Io?
Tiany Jehovah atsika hianatra raha momba fianakavian̈anany andan̈itry an̈y, an̈isanizen̈y iro anjely aby io. “Zanaka Zan̈ahary” ikahian̈a iro io. (Joba 38:7) Ino ma raha koran̈iny Baiboly momba iro anjely aby io? Misy vokany aminolo ma fisiandro io? Avio, mbala fianakavian̈any Zan̈ahary ma anjely jiaby?
1. Azovy ma iro anjely aby io?
Talohany Jehovah niasa tany ty, izy niasa iro anjely aby io. Iro tsy hitany masontsika, mira Jehovah fo. Andan̈itry an̈y iro mipetraka. (Hebreo 1:14) Iro io samy amy toetrindro. Misy antapitrisany iro io. (Apokalypsy 5:11) Iro “man̈araka volan̈any [Jehovah] ndreky mitandren̈y feonany.” (Salamo 103:20) Taloha tan̈y, Jehovah matetiky nan̈iraka anjely aby io nitondra hafatranany, nankahery ndreky namonjy olonany aby io. Izioty, anjely aby io mitariky Kristianin̈y aby io aminolo tihianatra raha momba Zan̈ahary.
2. Azovy ma Satana ndreky iro demoninany aby io?
Anjely sasany nivadiky tamy Jehovah. Fa anjely voanalohany nivadiky ndraiky, “Devoly ndreky Satana, araiky mamitaka tany jiaby misy olo.” (Apokalypsy 12:9) Satana tihanjaka aminolo, ke izy namitaka olombelon̈o voanalohany niasainy Zan̈ahary. Tafaranizen̈y, nisy anjely sasany mbala navoafitany fo, ke nanjary nivadiky tamy Zan̈ahary koa. Demony ikahian̈a iro anjely aby zen̈y. Jehovah nandroaka iro baka tandan̈itry tan̈y nandeha ambony tany. Efa tsy ela haripany koa iro io.—Vakia Apokalypsy 12:9, 12.
3. Karakory ataony Satana ndreky iro demony aby io mamitaka atsika?
Satana ndreky iro demony aby io mamitaka olo maro. Iro man̈ano raha ifandraisanolo amindro mivantan̈a na ankolaka. Ohatra, olo sasany mandeha amy moasy, pisikidy, mamaky soritry tan̈ana, man̈ano aody fiambin̈y ain̈y. Olo sasany koa mitaha amy gasy. Misy koa olo avoafitaka, fotony iro mino fa olo maty mbala mety ikoran̈ana. Fa Jehovah mampitandrin̈y atsika karaha ty: “Aza mandeha aminolo pikoran̈a aminolo maty ndreky olo pisikidy.” (Levitikosy 19:31) Mampitandrin̈y atsika izy baka atsika tsy ho azony Satana ndreky demony aby io. Iro io fahavalony Zan̈ahary ke mitady handrobaka fiain̈anantsika.
ALEVA ONON̈O
Zahava raha tsara ataondro anjely aby io, avio ino maharatsy fifandraisan̈a amy fan̈ahy ratsy, avio akory tokony hataontsika baka atsika tsy voafitakany Satana ndreky demony aby io.
4. Anjely aby io man̈ampy olo hianatra raha momba Jehovah
Iro anjely aby io tsy mitory mivantan̈a aminolo, fa iro mitariky panompony Zan̈ahary handeha aminolo tihianatra raha momba izy. Vakia Apokalypsy 14:6, 7, avio iaraha dinihin̈y fan̈ontanian̈a aby ty:
-
Nan̈ino ma atsika mila fan̈ampiany anjely izikoa fa mitory?
-
Nan̈ino mankahery anao fahaizanao fa anjely aby io mitariky anao amindro olo tihianatra Baiboly?
5. Aza man̈eky hifandray amy fan̈ahy ratsy
Satana ndreky demony aby io fahavalony Jehovah sady fahavalonao koa. Vakia Lioka 9:38-42, avio iaraha dinihin̈y fan̈ontanian̈a ty:
-
Ino aby ma raha ataondro demony aby io aminolo?
Tsy tiantsika han̈ano raha hifandraisan̈a amindro demony aby io. Vakia Deoteronomia 18:10-12, avio iaraha dinihin̈y fan̈ontanian̈a aby ty:
-
Ino aby raha ampiasaindro demony aby io, baka handrikianan̈a atsika ndreky hifandraisantsika amindro? Ino amindro io fataonolo amy tany misy anaro?
-
Fahitanao izy, mahatsara atsika ma Jehovah tsy man̈omba atsika han̈ano raha aby io? Nan̈ino?
Alifasa VIDEO io, avio iaraha dinihin̈y fan̈ontanian̈a aby ambany io.
-
Fahitanao izy, ten̈a ratsy ankitin̈y ma aody tamy zanakany Palesa in̈y? Nan̈ino?
-
Ino raha nila nataony Palesa, baka izy tsy azondro demony aby io?
Olo ten̈a kristianin̈y manohitry iro demony aby io fo. Vakia Asan’ny Apostoly 19:19 ndreky 1 Korintianina 10:21, avio iaraha dinihin̈y fan̈ontanian̈a ty:
-
Nan̈ino ma anao mila man̈oro raha jiaby misy ifandraisany amindro demony aby io?
6. Mifen̈a fo baka anao hahavita handresy Satana ndreky iro demony aby io
Satana mifehy iro demony aby io. Fa Mikaela arkanjely na Jesosy ndraiky, mitariky iro anjely tsy mivadiky aby io. Karakory ma angovony Mikaela io? Vakia Apokalypsy 12:7-9, avio iaraha dinihin̈y fan̈ontanian̈a aby ty:
-
Azovy ten̈a matanjaka? Satana ndreky iro demony aby io sa Mikaela ndreky iro anjelinany aby io?
-
Tokony havozo Satana ndreky iro demony aby io ma pianatrany Jesosy?
Izikoa anao mifen̈y fo, mety handresy Satana ndreky iro demony aby io koa anao. Vakia Jakoba 4:7, avio iaraha dinihin̈y fan̈ontanian̈a ty:
-
Akory hiarovanao ten̈a amy Satana ndreky iro demony aby io?
MISY OLO MIVOLAN̈A: “Tsisy maharatsy misoma jeux na filma misy mazy. Izio raha zisty fangalan̈a diandian̈a fo.”
-
Nan̈ino ten̈a ratsy mieritreritry karaha zen̈y?
INO RAHA NIANARANAO TATO?
Man̈ampy atsika iro anjely tsy mivadiky aby io. Satana ndreky demony aby io ndraiky fahavalony Jehovah. Iro mampiasa fifandraisan̈a amy fan̈ahy ratsy hamitahan̈a olo.
Fan̈ontanian̈a Fameren̈ana
-
Akory ataondro anjeliny Jehovah aby io man̈ampy olo hianatra momba Jehovah?
-
Azovy ma Satana ndreky iro demony aby io?
-
Nan̈ino ma atsika tsy tokony hibidabida raha misy ifandraisany amy fan̈ahy ratsy?
ZAHAVA
Zahava ino antony ivolan̈ana fa Jesosy ankitin̈y Mikaela arkanjely io.
“Azovy ma Mikaela Arkanjely Io?” (Lahatsoratra aminy Internet)
Diniha iro porofo ivolan̈ana fa Devoly io tsy jery ratsy fa raha ten̈a misy ankitin̈y.
“Devoly Zen̈y ma Ten̈a Misy Ankitin̈y?” (Lahatsoratra aminy Internet)
Zahava akory nataony man̈angy araiky niala tamy demony aby io.
“Nanjary Hainy Dikany Niasany Zan̈ahary Atsika” (Tilikambo Fiambesan̈a 1 Zie 1993)
Zahava akory ataony Satana mamandriky olo.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
