GURUY NI 24

Mang e Tin Riyul’ u Murung’agen e Pi Engel?

PLAY

Baadag Jehovah ni ngad filed murung’agen e tabinaw rok u tharmiy. Pi engel e yad bang ko tabinaw rok Got ma yima yog “pi fak Got” ngorad. (Job 38:7) Mang e be yog e Bible u murung’agen e pi engel? Mang e yad ma rin’? Ma gubin e engel ni yad bang ko tabinaw rok Got fa danga’?

1. Mang e pi engel?

I sunmiy Jehovah e pi engel u m’on ni nge sunmiy e fayleng. Yad bod Jehovah ndabiyog ni ngan guyrad ma yad ma par u tharmiy. (Hebrews 1:14) Bokum milyon e engel ni bay mab thilthil rarogorad. (Revelation 5:11) Yad ma ‘fol ko tin ni ke yog [Jehovah] ni nguun rin’, ma yad ma rung’ag e tin ni ma yog.’ (Psalm 103:20) Immoy yu ngiyal’ kakrom ni i l’og Jehovah e pi engel ni nga rogned e thin rok ko girdi’ rok mar ayuweged yad. Ngiyal’ ney e ma pow’iy e pi engel e piin Kristiano ngak e piin yad baadag ni ngar filed murung’agen Got.

2. Mini’ Satan nge pi moonyan’ rok?

Immoy boch e engel ndar pared ni yad ba yul’yul’ ngak Jehovah. Bin som’on e engel ni togopuluw e ni “tunguy fithingan ni Moonyan’, ara Satan, ni ir faanem ni bannag e girdi’ nu fayleng ni polo’.” (Revelation 12:9) Bochan ni baadag ni nge mang ir e gagiyeg, ma aram me waliy e gal nsom’on e girdi’ me boch nga tomuren miki waliy boch e engel ni ngar uned ngak ko togopuluw. Pi engel nem nra togopuluwgad e yima yog e pi moonyan’ ngorad. I chuwegrad Jehovah u tharmiy nge yon’rad nga fayleng, ma ra boch nga m’on ma yira thangrad.—Mu beeg e Revelation 12:9, 12.

3. Uw rogon ni ma guy Satan nge pi moonyan’ rogon ni ngar bannaged gadad?

Boor e girdi’ ni ma bannagrad Satan nge pi moonyan’ u daken ngongolen e pig. Pig e aram reb e ngongol nib kireb, ya ra un be’ ngay ma aram e be guy rogon ni nge non ko pi kan nib kireb. Bod ni bay boch e girdi’ ni yad ma yan ra guyed e piin yad ma fanay e pi n’en bay u lan e lang ni nga rogned e n’en nra buch nga m’on, nge piin yad ma yog e n’en nra buch ko girdi’ nga m’on, nge yugu boch e girdi’ ni yad ma pig. Ku bay boch e girdi’ ni yad ma fanay boch e falay ara yad ma un nga boch e tafalay ni bay rogon ko pig. Ku bay boch e girdi’ ni yima bannagrad ngar lemnaged nrayog ni ngar nonad ngak e piin kar m’ad. Be ginangdad Jehovah ni be gaar: ‘Dab marod ngak e sothuw ni ngar pininged e thagith.’ (Levitikus 19:31) Ke yog e re n’ey ni nge ayuwegdad rok Satan nge pi moonyan’. Yad e toogor rok Got ma yad baadag ni ngar gafgownaged gadad.

KUM FIL BOCH BAN’EN U MURUNG’AGEN

Mu fil murung’agen boch ban’en nib fel’ ni ma rin’ e pi engel, nge riy’en e pig, nge rogon ni ngad ayuweged gadad rok Satan nge pi moonyan’.

4. Pi engel e yad ma ayuweg e girdi’ ni ngar filed murung’agen Jehovah

Pi engel rok Got e darur machibnaged e girdi’. Machane rayog ni ngar pow’iyed e pi tapigpig rok Got ngak e piin yad baadag ni ngar filed murung’agen. Mu beegew e Revelation 14:6, 7, mi gimew weliy e fulweg ko pi deer ni baaray:

Mang fan nib t’uf ni nge ayuwegdad e pi engel ni ngad machibgad?
Chiney ni kam nang nrayog ko pi engel ni ngar pow’iyed gur ngak e piin nib t’uf ni ngar rung’aged e thin nu Bible e be pi’ e athamgil nga lanin’um, fa? Mang fan?

5. Mu siyeg ngongolen e pig

Satan nge pi moonyan’ e yad e toogor rok Jehovah, maku yad e toogor rodad. Mu beegew e Luke 9:38-42, mi gimew weliy e fulweg ko re deer ni baaray:

Mang e ma rin’ e pi moonyan’ ko girdi’?

Dubdad ni ngad paged e pi moonyan’ ni ngar gagiyegnaged gadad. Mu beegew e Deuteronomy 18:10-12, mi gimew weliy e fulweg ko pi deer ni baaray:

Mang boch e kanawo’ ni ma guy e pi moonyan’ rogon ni ngar gagiyegnaged gadad riy mu ur nonad ngodad? Mang boch e pi ngongol ney nib ga’ ni ma rin’ e girdi’ ko gin ga ma par riy?
Ga be lemnag nib puluw ni nge yog Jehovah nthingar dab da uned nga ngongolen e pig, fa? Mang fan?

Mu yaliyew e re VIDEO ney, mi gimew weliy e fulweg ko pi deer ni baaray.

VIDEO: “Oppose the Devil” (5:02)

Ga be lemnag nib kireb fare bachal ni immoy u pa’ fachi tir ni fak Palesa, fa? Mang fan?
Mang e ba t’uf ni nge rin’ Palesa ni nge ayuweg ir ko pi moonyan’?

Kab kafram i yib ni ma togopuluw e tin riyul’ e Kristiano ko pi moonyan’. Mu beegew e Acts 19:19 nge 1 Korinth 10:21, mi gimew weliy e fulweg ko re deer ni baaray:

Mang nib ga’ fan ni ngam kirebnag urngin ban’en ni bay rom nib l’ag rogon nga ngongolen e pig?

6. Mu gel ngak Satan nge pi moonyan’ rok

Satan e ir e be gagiyegnag e pi moonyan’. Machane Mikael ni pilungen e engel, ni ku aram reb i fithingan Jesus e ir e be pow’iy e pi engel ni yad ba yul’yul’. Uw feni gel gelngin Mikael? Mu beegew e Revelation 12:7-9, mi gimew weliy e fulweg ko gal deer ni baaray:

Mini’ e kab gel gelngin, Mikael nge pi engel rok ara Satan nge pi moonyan’ rok?
Ga be lemnag ni bay rogon ni nge rus pi gachalpen Jesus ngak Satan nge pi moonyan’ rok, fa?

Rayog ni ngam gel ngak Satan nge pi moonyan’ rok. Mu beegew e James 4:7, mi gimew weliy e fulweg ko re deer ni baaray:

Uw rogon ni ngam ayuwegem rok Satan nge pi moonyan’?

MA GAAR BOCH E GIRDI’: “De kireb ni ngan un nga boch e gosgos ara un yaliy boch e kachido ni murung’agen ngongolen e pig, ya re n’ey e kemus ni ban’en ni yima rin’ ni nge chuweg e chalban.”

Mang fan ni bay riy’en e biney e lem?

N’EN KAN FIL

Pi engel ni yad ba yul’yul’ e yad ma ayuwegdad. Satan nge pi moonyan’ rok e yad e toogor rok Jehovah, ma yad ma fanay ngongolen e pig ni ngar bannaged e girdi’.

Ngan Sul u Daken

Uw rogon ni be ayuweg e pi engel rok Jehovah e girdi’ ni ngar filed murung’agen?
Mini’ Satan nge pi moonyan’ rok?
Mang fan ni ga baadag ni ngam par ni gab palog u gubin ban’en ni bay rogon nga ngongolen e pig?

Kan mu’nag e re guruy ney ko:

N’en Ngam Nameg

Mu lemnag ko bay ban’en ni fanam nib l’ag rogon nga ngongolen e pig fa danga’, mag meybil ni ngan pi’ e gonop ngom ya nge yag nim nang e n’en ngam rin’ ngay.

Yugu boch ban’en:

Your other goal