DILONGI 24
Kiedika kitadidi Bambasi
Ku diyilu, Yehova widi ayi dikanda. Bambasi mu dikanda di Nzambi badi. Mu buela, Bibila kieta batedila “bana ba Nzambi.” (Yobi 38:7) Mambu mbi Bibila kitulongidi mu diambu di bambasi? Mfunu mbi badi kuidi batu? Vayi Bambasi boso mu dikanda di Yehova bakala?
1. Bambasi ba nani badi?
Yehova wuvanga bambasi tuamina kavanga batu. Banga niandi, bambasi badi bivangu bi kipheve bio kabimonikanga ko. (Ebelewo 1:14) Kuidi ayi zimilio zi bambasi ayi kadika mbasi, widi na dizina diandi. (Tsongolo 5:11) Beta ‘wa phova yi Yehova ayi beta tumukina mambu mandi.’ (Minkunga 103:20) Mu thangu thama, Yehova weba sadilanga bambasi mu diambu di nata minsamu miandi ayi mu sadisa ayi vukisa batu. Mu lumbu kiaki bambasi beta sadisa bakristu, muingi besamunina batu bobo batidi zaba Nzambi.
2. Satana ayi zipheve zimbimbi ba nani badi?
Bambasi bankaka basi tatamana ko ba bakuikama kuidi Yehova. Mbasi yi theti wutonisa kimbeni “nioni beta tedila Diabulu ayi Satana, niandi weta zimbikisa ntoto woso widi batu.” (Tsongolo 12:9) Satana weta zola yadila batu, diawu kavukumunina batu batheti ayi ku manima wuyiza bue vukumuna bambasi bankaka balandakana kimbeni beni. Beta batedila bambasi zimbimbi voti “ziphevi zimbimbi.” Yehova wubakuka ku diyilu. Badi yeto pfika pfika va ntoto ayi weka nduka babunga.—Tanga Tsongolo 12:9, 12.
3. Phila mbi Satana ayi zipheve ziandi zimbimbi beta zola tuvunina?
Satana ayi ziphevi ziandi zimbimbi beta vuna batu bawombo, mu nzila yi mavanga ma ziphevi zimbimbi, voti mu mazi yo yidi phila yintomba busoludila na ziphevi zimbimbi. Mu kifuani, batu bankaka beta kue bata batu bantalanga zimbuetila, batu bobo bam’bikulanga phila luzingu luela bela kuntuala, batu bobo bamvovilanga mu ziphevi zimbimbi, mim’bikudi, banganga ayi bandoki. Batu bankaka beta kue tomba lusadusu lukimbevo kuidi batu bo beta sadila mu ziphevi zimbimbi. Batu bankaka beta banzila ti balenda kuawu solula ayi batu bafua. Vayi Yehova wutuveni nsiku wa wutubidi ti: “Kadi kuenda kuidi bobo bamvovilanga mu ziphevi zimbimbi ayi kuidi banganga zi minkisi.” (3 Mose 19:31) Diawu katuvanini nsiku beni wowo mosi katutanina. Satana ayi ziphevi ziandi zimbimbi badi bambeni ba Nzambi.
TUVISA MBOTI MBOTI
Tutubila kiyeku ki bambasi mu kisalu kitsamununu, bivonza bi mavanga ma ziphevi zimbimbi voti mazi, ayi mambu mo tulenda vanga muingi tukitanina kuidi Satana ayi ziphevi zimbimbi.
4. Bambasi beta sadisa batu bo bantomba zaba Yehova
Bambasi basamunanga ko vayi beta tomba sadisa batu bo beta samuna nsamu wumboti wu Kimfumu ki Nzambi, mu diambu di bamona batu bo batidi zaba Nzambi. Tanga Tsongolo 14:6, 7 ayi vana mimvutu mu biuvu biabi:
-
Bila mbi tuididi mfunu wu lusadusu lu bambasi mu thangu tulembu samuna?
-
Bambasi balenda kutusadisa mu mmona batu bo batidi wa nsamu wo widi mu Bibila? Bila mbi?
5. Tina mavanga ma ziphevi zimbimbi
Satana ayi ziphevi zimbimbi badi bambeni ba Yehova. Tanga Luka 9:38-42 ayi vana mvutu mu kiuvu kiaki:
-
Bue ziphevi zimbimbi zieta vangila batu mambu mambimbi?
Tuedi tia ko ziphevi zimbimbi zituvukumuna. Tanga 5 Mose 18:10-12 ayi vana mimvutu mu biuvu biabi:
-
Mu ziphila mbi ziphevi zimbimbi zieta tombila kutuvukumunina ayi tomba solula ayi beto? Tsadulu mbi yi mavanga ma ziphevi zimbimbi yeta luta monika ku buala bo wukala?
-
Bue wummuena, bufueni kuandi Yehova kakandika ntindu woso wu mavanga ma ziphevi zimbimbi?
Tala VIDEO ayi vana mimvutu mu biuvu biabi bilandikini.
-
Bue wummuena, Palesa diambu dimbimbi kavanga bo kavuatisa muan’andi nsinga mu diambu di wuntanina? Bila mbi?
-
Palesa mbi katula mu diambu di kakitanina mu ziphevi zimbimbi?
Tona thama, bakristu bakiedika ba tianga ko ba nguizani ayi ziphevi zimbimbi. Tanga Mavanga 19:19 ayi 1 Kolinto 10:21 ayi vana mvutu mu kiuvu kiaki:
-
Enati kima kidi yaku kio kikutula wuba nguizani ayi ziphevi zimbimbi, bila mbi yididi mfunu mu kuki yoka?
6. Phila banungina Satana ayi ziphevi zimbimbi
Satana niandi mfumu yi ziphevi zimbimbi. Vayi mfumu yi bambasi bakuikama dizana diandi Misiela nkulutu bambasi yinsundula Yesu. Misiela nkulutu bambasi zingolo kadi? Tanga Tsongolo 12:7-9 ayi vana mimvutu mu biuvu biabi:
-
Ba na balutidi ngolo? Misiela ayi bambasi bandi voti Satana ayi ziphevi ziandi zimbimbi?
-
Ngeyo bue wummuena, balonguki ba Yesu bafueti mona Satana ayi ziphevi ziandi zimbimbi tsisi?
Wulenda nuana ayi nunga Satana ayi ziphevi ziandi zimbimbi. Tanga Zaki 4:7 ayi vana mvutu mu kiuvu kiaki:
-
Bue wulenda nungina mambu mambimbi ma Satana ayi ziphevi ziandi zimbimbi?
BATU BANKAKA BETA TUBA TI: “Viokisa thangu mu tala zifilme zintubila mavanga ma ziphevi zimbimbi voti ma kindoki yisiandi mbimbi ko. Beta tuba diaka yidi kuandi phila yi phiokosolo thangu.”
-
Bila mbi yididi vonza kinneni tuba phila beni yoyi?
MU BUKHUFI
Bambasi bakuikama beta kutusadisa. Satana ayi ziphevi zimbimbi badi zimbeni zi Yehova ayi beta sadila kindoki ayi mazi mu diambu di vuna batu.Phutukulu
-
Bue bambasi beta sadisila batu bo batidi zaba Nzambi?
-
Mambu mbi Bibila kitubidi mu diambu di Satana ayi ziphevi zimbimbi?
-
Bila mbi bakidi nzengolo yi tina mambu ma ziphevi zimbimbi voti mazi?
TALA MAMBU MANKAKA
Bila mbi tufueti kikinina ti Misiela nkulutu bambasi niandi Yesu?
“Nani azali Mikaele anzelu-mokonzi?” (Lisolo oyo ezali na Internet)
Bukiedika Diabulu widi? Voti madi kuandi mayindu mambimbi makala mu kadika mutu?
Bue nketo mosi kanungina botukila mu thuadi ayi mavanga ma ziphevi zimbimbi?
“Azwi ntina kati na bomoi” (Linɔ́ngi ya Mosɛnzɛli ya 01/07/1993)
Bue Satana keta sadila mavanga ma ziphevi zimbimbi mu diambu di vuna batu?
“Solo na likambo etali nkisi, bondɔki, mpe bonganga-nkisi” (Nzela ya bomoi ya seko, eteni 5)
