CƐ̃́Ɛ́-ÐƐ̀ 25
Ðɛ́ Mɔ̀ Geɖepɔɔ Hwòɖòɛ̀-Gbɔ-Po-Ðɛ̀ Ɓó À Bììɛ́?
Baɓoɔ cɛ̃ɛ wáɖáá kà ɓɛ́ nyɔùn-dyùɛ̀ fɛ̀ɛ̀ ‘xwã́ ɓoún, ké fũ̀à-fṹá-ɖɛ̀ dyíɛ̀n múin kánáá puɛ.’ (Jóɓò 14:1) Ðɛ nìà kɛ ɖé Geɖepɔɔ mɔ́ ɓó à bìì cáà? Ɔ se ná nììn, nìí, ɖɛ́ mɔ̀ ɔ hwòɖòɛ̀-gbɔ-po-ɖɛ̀ ɓó à bììɛ́? Ɔ mu náá jàà kpáùnǹ? Dyé Baɓoɔ gɔ̃̀-jù-wùɖù ɓɛ́ ɔ dè nyɔ hwòɖò dyiɛ.
1. Cĩ́-cĩ́ɔ̀ nyɛ́ Jɛhova mɔ́ ɓó à bììɛ́?
Jɛhova mɔ́ ɓɛ́ à ké cĩ́-cĩ́ nɔ̀mɔ̀ dyíin ɓéɖé. Ti ɔ mɛ ma nyɔùn-dyù kĩ́ín-kĩ́ín ɓè mɔ̀à Áɖɔ̀ùn kè Íì kɛɛ, ɔ po ma wa páɖédà nɔ̀mɔ̀ dyíin mɔ̀à Íídɛ̃̀ìn-ɓàà-ɖɛ̀-gbàɔ̀ kɛɛ mú. Puɛɛ, “[Geɖepɔɔ] po ma wa mana kɔ̃, ké ɔ ɖá, ‘Ɓè mu dúún zaìn, ɓɛ́ ɓè ké dyí vò, ɓɛ́ ɓè ké ɓóɖó-kpàɔ̀ kɔ̃ dyi dyíìn, . . . Ɓè mu ɓóɖó-kpà gànáɔ̀ wuɖuí kɔ̃̀ùn.’” (Jɛ́nɛ́sì 1:28) Jɛhova mɔ́ ɓɛ́ wa ké ma dyú ɓè wóɖóìn kè ɓɛ́ wa ké ma ɓóɖó-kpà gànáɔ̀ páɖédà mú nyu ɔ kè ɓɛ́ wa ké ma nimii ɓèɔ̀ gbo gmɔ̀. Ɔ hwòɖòɛ̀-gbɔ-po-ɖɛ̀ mɔ̀ ɓɛ́ nyɔ séín ké ma dyi-káná-káná kè sè-ná-sèɛ̀ fɛ̀ɛ̀ múàùn dyi kpáìn.
Ðɛ ɓè se ma kàa kpá dyɛo, a kɛɛ Geɖepɔɔ hwòɖòɛ̀-gbɔ-po-ɖɛ̀ séè gbo zĩàìn. (Àzédyà 46:10, 11) Ɔ nìɛ̀ mɔ́uń ke, ɓɛ́ nyɔ ɓè nyu ɔ wuɖuɛɛ ké cĩ́ ɓó sè-ná-sèɛ̀ tiín ɖé dyi-káná-káná mú.—Zà Wɛ̀ɖɛ̀ɓèɖésĩ̀ɔ̀ 21:3, 4 wuɖuún.
2. Xwɛ̀ à ɓɛ́ìn cĩ́-cĩ́ nɔ̀mɔ̀ dyíin múàùn dyi kpáìn kàùn wɛ̃́?
Jɛhova mɛ ma à, ɓɛ́ ɔ ké à hwìè da zàìn. Ɔ xwíníín mɔ̀, ɔ poɛ ɖé à hwòɖòɔ̀ bũ̀ ɓɛ́ à ké ɔ dyí dyuò kè ɓɛ́ à ké ɔ ɓiè. (Zà Máfíò 5:3-6 wuɖuún.) Ɔ mɔ́ ɓɛ́ à ké ɔ bũ̀in xwɛ̃́ìn, ‘ɓɛ́ à ké ɔ kpeɖe séín ɓèɔ̀ kíɖíí sí, ɓɛ́ à ké ɔ mú ɖɛ̀ɓɛ̀,’ ɔ kè ɓɛ́ à ké ɔ ɓiè “hwòɖòɛ̀-ɖé-hwɛ̀-kà.” (Dìtɔ̀wáɖánámɛ̀ 10:12; Wɛ́ɖɛ́ 25:14) À dyiɛ náa nyu ní, nìí, à ɓɛ́ìn múàùn kpáa jàà kɛbì à mɛ nì fũ̀à-fṹá múɛ. Jɛhova ɓiè-ɓiè nyuɛ ké à cĩ́-cĩ́ɔ̀ ɓéɖé xwíníín, sepoɛɖe à cĩ́-cĩ́ɔ̀ kè ɔ mɔ́ɔ́-ɖɛ̀ muìn gbo.
ÐE ÐƐ MÚIN CÁ
Cɛ̃́ ɖɛ̀ɓɛ̀ìn-ɖɛ̀ɓɛ̀ìn zi dyi ɓúáùn ɓɛ́ Jɛhova tɛ̀mɛ̀ìn ma ti ɔ nì ma ɓóɖó-kpàà ti dyéɛ̀n ɓó à bììɛ jè kè ɖɛ ɔ Wuɖuɔ̀ tɛ̀mɛ̀ìn ɓá ɖɛ mɔ̀ cĩ́-cĩ́ xwíníín nyɛɛ jè dyíɛ.
3. Jɛhova mɔ́ ɓɛ́ nyɔùn-dyù ké cĩ́-cĩ́ nɔ̀mɔ̀ dyíin ɓéɖé
Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Xwíníínɔ̀ nyɛ́ kɔ̃̀ jè Geɖepɔɔ mɛà à ɓóɖó-kpà nɔ̀mɔ̀ dyíinɔ̀ kɛ́?
Zà Ìkíɖísìásì 3:11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðɛ́ ɖɛ nìà kɛ tɛ̀mɛ̀ìn m̀ ɓá Jɛhova jè dyíɛ́?
4. Jɛhovaa hwòɖòɛ̀-gbɔ-po-ɖɛ̀ séè gbo zĩàìn
Zà Wɛ́ɖɛ́ 37:11, 29 kè Àzédyà 55:11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwɛ̀ à nyuɛ dyí dyuòɛ̀ kà Jɛhovaa hwòɖòɛ̀-gbɔ-po-ɖɛ̀ ɓó à bììɛɛ séè gbo zĩàìn keɛ́?
Wa ɓɛ́ìn gbò ɖò ɓɛ́ ɔ ɖà wáɖá, ké ɔ mɔ̀ kpùùn wɛ̃ɛ poɛ ɖe. Kà dyúáɖòɔ̀ kàà Geɖepɔɔ mu ɓóɖó-kpà ɓɛ́ nyɔùn-dyù ɖà dyíin nyìnììn nyɛɛ xwa nɔ̀mɔ̀ìn ɖe ɓó nyɔ ɓè ɖɛ̀ɓɛ̀ ɔ múɛɛ bìì
5. Jɛhova ɓiè-ɓiè nyuɛ ké à cĩ́-cĩ́ɔ̀ ɓéɖé xwíníín
Ðɛ mɔ̀ cĩ́-cĩ́ xwíníín nyɛɛ dyí-dyuò-dyuò dyà nyɔ múà. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Xwɛ̀ Tɛ̀wúɖúmì nyu ma ɖɛ mɔ̀ cĩ́-cĩ́ xwíníín nyɛɛ jè cɛ̃́-cɛ̃́ kpáná kɔ̃ún dyéɛ kɛ́?
Zà Ìkíɖísìásì 12:13 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Sepoɛɖe Jɛhova ɖà à bìì ɖɛ pàɖà nyu jèɛɛ, ɖɛ́ à kɔ̃̀ à ké ɔ mɔ̀ùn bìì nyu kɛ́?
NYƆ ÐÒ ƁƐ́ÌN NÍIŃ: “Ðɛ́ mɔ̀ cĩ́-cĩ́ xwíníín nyɛ́?”
-
Xwɛ̀ nì mu ɔ gɔ̃̀ jùùn wɛ̃́?
SṸÌN-XWÍNÍÍN
Jɛhova mɔ́ ɓɛ́ à ké fɛ̀ɛ̀ múàùn dyi kpáìn ɓó sè-ná-sèɛ̀ tiín ɖé dyi-káná-káná mú dà ɓóɖó-kpàà kɔ̃. À dyi ɔ ɓiè hwòɖòɛ̀-ɖé-hwɛ̀-kà ní, nìí, à cĩ́-cĩ́ɔ̀ mu xwíníín nɔ̀mɔ̀ dyíin ɓéɖéìn—ɓó kàùn ɖekè.
Ðɛ-kɔ̃in-kpa-kpa
-
Ðɛ́ mɔ̀ ma Jɛhovaa hwòɖòɛ̀-gbɔ-po-ɖɛ̀ kĩ́ín ɓó Àɖɔ̀ùn kè Íì bììɛ́?
-
Xwɛ̀ à nyuɛ dyí dyuòɛ̀ kà Geɖepɔɔ hwòɖòɛ̀-gbɔ-po-ɖɛ̀ ɓó nyɔùn bììɛɛ séè gbo zĩàìn keɛ́?
-
Xwɛ̀ nì cĩ́-cĩ́ɔ̀ ɓɛ́ìn xwíníín nɔ̀mɔ̀ dyíin ɓéɖéɛ kɛ́?
CƐ̃́ ÐƐ PÀÐÀ
Cɛ̃́ ɖɛ ɓè tɛ̀mɛ̀ìn kà Ídɛ̃̀ìn-ɓàà-ɖɛ̀-gbàɔ̀ nì ma jàà kɛɛ jè.
“Ídɛ̃̀ìn-Ɓàà-Ðɛ̀-Gbàɔ̀ —Se-Nɔ̀ɔ̀ Mɔɔ Ɔ Mɔ̀ Jàà?” (Dyí-Gmɔ̀ìn-Gbò-Cèè-Ðɛ̀ɔ̀, Dùà-Dù 1, 2011)
Cɛ̃́ xwíníín kɔ̃̀ jè à ɓɛ́àìn dyí dyuòɛ̀ jɛ́ɛ́ kà ɓɛ́ ɓóɖó-kpàà mu nììn kánáá puɛɛ jè.
Gmɔìn ɖɛ Baɓoɔ cɛ̃ ɓá kà nì cĩ́-cĩ́ɔ̀ ké xwíníín nɔ̀mɔ̀ dyíin ɓéɖéɛ jè dyíɛɛ múin.
Dyé kà gàa ɖò ɓɛ́ ɔ hwòɖò ɖá ɔ ɓéɖé ma ɖɛ séín nyɛɛ nyu ma ɖɛ sè ma xwáɖáún ɖé ɔ cĩ́-cĩ́ɔ̀ múɛɛ dyéɛ kɛ.
a Ðé cɛ̃́ɛ́-ɖɛ̀ɔ̀ nyɔ kɔà ɓó dyíɛ múɛɛ, nì mu ɖɛ nyu ké à seà cĩ́-cĩ́ nì kà wɛ ɓéɖéɛɛ jè cɛ̃́ìn.
