PELAJAREN 25
Kai nge Sura-Sura Dibata Nandangi Manusia?
Bas Pustaka si Badia ikataken uga kegeluhen manusia. Nina, “Gendek umurna janah dem kesusahen.” (Jop 14:1) Bage kin situhuna sura-sura Dibata nandangi manusia? Adi lang, kai sura-suraNa nandangi manusia? Terjadi nge pagi sura-sura Dibata e? Mari siperdiateken kai jawapen Pustaka si Badia. Jawapenna banci erban meriah ukurta.
1. Uga situhuna sura-sura Jahwe nandangi manusia?
Ate Jahwe meriah min siakap ndalani kegeluhenta. Sanga iciptakenNa manusia si pertama Adam ras Hawa, ibanNa kalak e tading i bas ingan si seh kel jilena eme Taman Eden. Kenca si e “pasu-pasu Dibata kalak e. Nina Dibata man kalak e, ‘Ertambah-tambahlah janah reh teremnalah, demilah doni ras kuasailah.’” (Kejadin 1:28) Ate Jahwe lit min keturunen kalak e, iban kalak e doni jadi pardis, janah iurusna binatang-binatang. TujunNa gelah kerina kalak ngenanami kegeluhen si sempurna janah nggeluh seh rasa lalap.
Gundari, kegeluhen manusia lenga bagi sura-sura Dibata. a Tapi sura-suraNa e la berubah. (Jesaya 46:10, 11) AteNa kalak si patuh nggeluh rasa lalap i bas keadan si sempurna.—Baca Ketangkasen 21:3, 4.
2. Uga carana gelah lit tujun kegeluhenta gundari?
Sanga kita iciptaken Dibata Jahwe, itamaNa bas pusuhta sura-sura guna ndatken “keperlun rohani,” maksudna lit sura-surata nandai Dibata ras nembah Ia. (Baca Matius 5:3-6, cataten i teruh.) AteNa rembak kita ras Ia, ‘erdalan kita bas dalan-dalanNa, sikelengi Ia,’ janah silayani Ia “alu bulat ukur.” (Ulangen 10:12; Masmur 25:14) Adi silakoken e, banci tuhu-tuhu meriah ukurta amin pe lit masalahta. Adi silayani Jahwe, silakoken me kai si ngena ateNa, e erban lit tujun kegeluhenta.
PELAJARI TERBAGESEN
Sipelajari kari uga belinna kekelengen si icidahken Jahwe sanga isikapkenNa doni enda man banta. Sipelajari ka kari kai si ajarken Pustaka si Badia kerna tujun kegeluhen enda.
3. Luar biasa kel sura-sura Jahwe nandangi manusia
Putar VIDEO, kenca si e bahas penungkunen enda:
-
Engkai maka ciptaken Dibata doni si mejile enda?
Bacalah Pengerana 3:11, kenca si e bahas penungkunen enda:
-
Arah ayat enda, kai si banci tehndu kerna sura-sura Jahwe man manusia?
4. Sura-sura Jahwe la berubah
Bacalah Masmur 37:11, 29 ras Jesaya 55:11, kenca si e bahas penungkunen enda:
-
Janari siteh sura-sura Jahwe man manusia la berubah?
Rumah si enggo ceda banci denga ipekena. Doni si enggo ceda iban manusia enda pe, banci ka ipekena Dibata man ingan tading kalak si engkelengi Ia.
5. Ngelayani Jahwe erban lit tujun geluhta
Adi siteh tujun kegeluhen enda, banci meriah ukurta. Putar VIDEO, kenca si e bahas penungkunen enda:
-
Kai manpaatna man Terumi kenca itehna kai tujun kegeluhen?
Bacalah Pengerana 12:13, kenca si e bahas penungkunen enda:
-
Uga carata ngata bujur man Jahwe perban melala kel si enggo ilakokenNa man banta?
LIT SI NGATAKEN: “Engkai maka ciptaken Dibata manusia adi mate ka nge dungna?”
-
Uga nge nindu njawapsa?
KESIMPULEN PELAJAREN ENDA
Ate Jahwe kita nggeluh seh rasa lalap i doni enda i bas keadan si sempurna. Adi silayani Jahwe alu bulat ukurta, gundari pe banci sidat keriahen ukur.
Kai si Enggo Sipelajari?
-
Kai nge tangtangna tujun Jahwe nciptaken Adam ras Hawa?
-
Janari banci siteh maka sura-sura Dibata man manusia la berubah?
-
Uga carana gelah tuhu-tuhu meriah ukurta?
DARAMI TERBUEN
Nenlah kai buktina maka Taman Eden pernah lit bas doni enda.
“Taman Eden—Mitos atau Fakta?” (Menara Pengawal 1 Januari 2011)
Nenlah engkai maka banci kita tek maka doni enda pasti lit seh rasa lalap.
Pereksalah kai nina Pustaka si Badia kerna tujun geluhta.
Nenlah pengalamen sekalak dilaki si lit kapna si kurang bas geluhna aminna pe bayak ia.
a Bas pelajaren seterusna, sipelajari engkai maka kegeluhenta lenga bagi sura-sura Dibata.
