LESON 25
Ki Bondye i anvi pour nou?
Labib i dir ki lavi bann imen i “kourt e ranpli avek traka.” (Zob 14:1) Eski se sa ki Bondye i vreman anvi pour nou? Si non, ki i anvi pour nou? Eski sa ki i anvi pour nou pou arive en zour? Labib i donn bann larepons ki pou rekonfort nou. Annou vwar.
1. Ki kalite lavi Zeova i anvi pour nou?
Zeova i anvi ki nou viv sa pli bon lavi. Ler i ti kree sa premye koup imen, Adan ek Ev, i ti met zot dan en zoli paradi, sa se zarden Edenn. Apre, “Bondye ti beni zot e Bondye ti dir zot: ‘Fer zanfan e vin bokou, ranpli later e pran swen avek li.’” (Zenez 1:28, NWT) Zeova ti anvi zot annan zanfan, zot fer later antye vin en paradi e zot pran swen avek bann zannimo. I ti anvi tou dimoun annan en lasante parfe e viv pour touzour.
Kantmenm keksoz pa’n mars parey Bondye ti anvi, a i ankor anvi sa kalite lavi pour nou. (Izai 46:10, 11) I ankor anvi bann imen obeisan viv pour touzour dan bann kondisyon parfe.—Lir Revelasyon 21:3, 4.
2. Ki mannyer nou kapab annan en lavi ki fer sans konmela menm?
Zeova in kree nou avek en bezwen spirityel, setadir en dezir pour konn Bondye, rod son gidans e ador li. (Lir Matye 5:3-6.) Zeova i anvi ki nou vin son bon zanmi, ki nou “swiv son semen, kontan li” e servi li “avek tou [nou] leker.” (Deterononm 10:12; Psonm 25:14) Ler nou fer sa, nou pou santi nou vreman ere kantmenm nou kapab annan nou problenm. Ador Bondye i donn nou lavi en vre sans akoz nou pe viv sa lavi ki Bondye i anvi nou viv.
AL PLI O PROFON
Annou vwar ki kantite Zeova ti kontan nou ler i ti pe prepar later pour nou e sa ki son Parol i dir konsernan akoz nou la.
3. Zeova i anvi ki bann imen i annan en lavi merveye
Zwe sa VIDEO e apre reponn sa kestyon.
-
Akoz Bondye ti kree nou zoli plannet?
Lir Eklezyast 3:11 e apre reponn sa kestyon:
-
Ki sa i ansenny ou lo Zeova?
4. Sa ki Bondye i anvi pour nou pa’n sanze
Lir Psonm 37:11, 29 ek Izai 55:11 e apre reponn sa kestyon:
-
Ki mannyer nou konnen sa ki Zeova i anvi pour nou pa’n sanze?
5. Ador Zeova i donn nou lavi en vre sans
Ler nou konnen akoz nou la lo later, sa i fer nou ere. Zwe sa VIDEO e apre reponn sa kestyon.
-
Ki byenfe Terumi ti gannyen ler i ti aprann akoz i la lo later?
Lir Eklezyast 12:13 e apre reponn sa kestyon:
-
Vi ki Zeova in fer sitan bokou pour nou, ki mannyer nou montre nou rekonesans?
SI EN DIMOUN I DEMANDE: “Akoz nou la lo later?”
-
Ki mannyer ou ti pou reponn li?
REZIMEN
Zeova i anvi nou viv pour touzour lo later dan bann kondisyon parfe. Ler nou ador li avek tou nou leker, sa i donn nou lavi en vre sans konmela menm.
Revizyon
-
Ki Zeova ti anvi pour Adan ek Ev depi o konmansman?
-
Ki mannyer nou konnen sa ki Zeova ti anvi pour bann imen pa’n sanze?
-
Ki mannyer ou kapab donn ou lavi en vre sans?
FER PLIS RESERS
Vwar levidans ki zarden Edenn ti vreman egziste.
“Zarden Edenn en landrwa reel?” (Latour Veyer 1 Fevriye 2011)
Vwar akoz nou kapab asire ki sa later pou reste pour touzour.
Egzamin sa ki Labib i dir konsernan trouv sa vre sans dan ou lavi.
Vwar ki mannyer en msye ki ti krwar i annan tou keksoz ti santi i mank en keksoz dan son lavi.
a Dan sa lot leson, nou pou aprann kwa ki’n al mal.