ADZESUA 25
Ebɛnadze Ntsi Na Nyankopɔn Bɔɔ Hɛn Baa Asaase Yi Do?
Bible no ka dɛ nyimpa no nkwa nda yɛ ‘kumaabi, na ɔfona ahyɛ mu ma.’ (Job 14:1) Naaso, aso dɛmara na Nyankopɔn pɛ dɛ hɛn asetsena yɛ anaa? Sɛ nnyɛ ne pɛ nye no a, nna ɔno ebɛnadze paa ntsi na ɔbɔɔ hɛn baa asaase yi do? Ehwɛ a, siantsir a ɔbɔɔ hɛn no bɛba mu? Mbuae a Bible no dze ma wɔ asɛm yi ho no yɛ awerɛkyekyer paa, ntsi ma yɛnhwɛ.
1. Ebɛn asetsena na Jehovah pɛ dɛ yenya?
Jehovah pɛ dɛ yenya asetsena papa bi. Nyimpa a wodzi kan a Jehovah bɔɔ hɔn nye Adam na Eve. Ɔbɔɔ hɔn wiei no, ɔmaa wɔkɛtsenaa paradise fɛɛfɛw bi mu. Wɔfrɛ dɛm paradise no Eden ture. Afei “Nyankopɔn hyiraa hɔn: na Nyankopɔn see hɔn dɛ, Hom nwo, na wɔndɔr, na wɔnhyɛ asaase do ma, na wɔnhom do.” (Genesis 1:28) Nna Jehovah pɛ dɛ wɔwo mba, wɔma asaase no nyina dan Paradise, na wɔhwɛ mbowa no do. Nna ɔpɛ dɛ osi adasamba nyina yie, na wonya apɔwmudzen a odzi mu na wɔtsena ase daa.
Ɔwɔ mu, ndzɛmba annkɔ yie dɛ mbrɛ nna Nyankopɔn hwɛ kwan no dze, a naaso adwen a ɔwɔ ma nyimpa no nnsesae. (Isaiah 46:10, 11) Ɔda ho ara da n’akoma do dɛ ɔbɛma nyimpa a wotsie n’asɛm no atsena ase daa wɔ enyigye mu.—Kenkan Nyikyerɛ 21:3, 4.
2. Yebesi dɛn abɔ bra a ɔbɛma hɛn enyi agye ndɛ?
Mbrɛ Jehovah sii bɔɔ hɛn no ntsi, yehia ‘n’asɛm’ anaa n’akwankyerɛ. Ɔno ntsi na yɛpɛ dɛ yehu no yie na yɛsom no no. (Kenkan Matthew 4:4; 5:3-6.) Ɔpɛ dɛ yɛnye no nya anyɛnkofa a no mu yɛ dzen, ‘yɛnantsew n’akwan nyinara do, na yɛdɔ no,’ na yefi “[hɛn] akoma nyinara” mu som no. (Deuteronomy 10:12; Ndwom 25:14) Sɛ yɛyɛ dɛm a, ɔmmfa ho ɔhaw biara a yɛwɔ no, hɛn enyi bɛgye paa. Sɛ yɛsom Jehovah a, hɛn enyi gye wɔ abrabɔ mu, osiandɛ yɛbɔ hɛn bra dɛ mbrɛ ɔpɛ.
PƐNSAPƐNSA MU KƆ EKYIR
Wɔ ɔfa yi mu no, yebohu dɛ kwan a Jehovah faa do siesiee asaase no ma yehu dɛ ɔdɔ hɛn paa. Afei, yebohu dza Bible no ka fa siantsir a yɛbaa wiadze no ho.
3. Jehovah pɛ dɛ nyimpa nya asetsena papa bi
Ma yɛnhwɛ VIDEO yi, na yensusu asɛmbisa a odzi do no ho.
-
Ebɛnadze ntsi na Nyankopɔn bɔɔ hɛn asaase fɛɛfɛw yi?
Ma yɛnkenkan Ɔsɛnkafo 3:11, na yensusu asɛmbisa yi ho:
-
Kyerɛwsɛm yi ma ihu ebɛnadze fa Jehovah ho?
4. Siantsir a Jehovah bɔɔ hɛn baa wiadze no nnsesae
Ma yɛnkenkan Ndwom 37:11, 29 na Isaiah 55:11, na yensusu asɛmbisa yi ho:
-
Yesi dɛn hu dɛ siantsir a Jehovah bɔɔ hɛn baa wiadze no nnsesae?
Sɛ fie bi sɛɛ a, wobotum esiesie no bio. Ɔnnkɛkyɛr, Nyankopɔn so besiesie asaase a nyimpa asɛɛ no yi, na ɔdze aama hɔn a wɔdɔ no no
5. Sɛ yɛsom Jehovah a, hɛn enyi gye wɔ abrabɔ mu
Sɛ yehu siantsir a yɛwɔ wiadze a, obotum ama hɛn enyi aagye. Ma yɛnhwɛ VIDEO yi, na yensusu asɛmbisa a odzi do no ho.
-
Aber a Terumi hun siantsir a yɛwɔ wiadze no, ɔboaa no dɛn?
Ma yɛnkenkan Ɔsɛnkafo 12:13, na yensusu asɛmbisa yi ho:
-
Osiandɛ Jehovah ayɛ pii ama hɛn ntsi, ebɛnadze na ɔsɛ dɛ yɛyɛ dze da no ase?
BI A OBI BEBISA DƐ: “Yɛbɛyɛɛ dɛn koraa wɔ wiadze?”
-
Sɛ obi bisa dɛm a, ibeyi no ano dɛn?
DZA ESUA
Jehovah pɛ dɛ yɛdze enyigye tsena asaase yi do daa. Ndɛ mpo, sɛ yefi hɛn akoma nyinara mu som no a, hɛn enyi bɛgye wɔ hɛn abrabɔ mu.
Mbobɔdo
-
Ebɛnadze paa ntsi na Jehovah bɔɔ Adam na Eve?
-
Yesi dɛn hu dɛ siantsir a Nyankopɔn bɔɔ hɛn baa wiadze no nnsesae?
-
W’enyi besi dɛn agye wɔ asetsena mu?
HWEHWƐ PII KA HO
Hwɛ siantsir a yebotum agye edzi dɛ nna Eden ture no wɔ hɔ ankasa.
“Eden Ture No—Ɔyɛ Anansesɛm Anaa Nna Ɔwɔ Hɔ Ankasa?” (Ɔweɔn-Aban, January 1, 2011)
Kenkan asɛm yi, na ibohu siantsir a yebotum aka dɛ asaase yi bɔwɔ hɔ daa, na wɔrennsɛɛ no da.
Ebɛnadze ntsi na yɛwɔ wiadze? Kenkan asɛm yi, na ibohu dza Bible no ka wɔ ho.
Nna papa bi dwen dɛ hwee nnhia no wɔ n’asetsena mu. Naaso, ekyir yi ohun dɛ saana ɔahwer biribi wɔ n’asetsena mu. Hwɛ video yi, na ibohu dza nna ɔahwer wɔ n’asetsena mu no.
a Wɔ adzesua a odzi hɔ no mu no, yebohu mbrɛ ɔyɛe a ndzɛmba sɛɛe.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
