EKIRAJAAYA 25
¿Kasa nüchekaka Maleiwa wapüleerua?
Saashin tü Bibliakat «motsoʼo neʼe namaa na wayuukana sünain katüin noʼu jee wainma kasa mojusü alataka namüin» (Job 14:1). ¿Shiache nüchekaka Maleiwa müinjatüin wakuwaʼipa? ¿Kasache niʼitaaka apüla waya? ¿Ekeraajeetche tü nüchekakat wapüleerua? Aneerü maʼin paaʼin pütüjaapa saaʼu tü sümakat tü Bibliakat süchiki tia.
1. ¿Kasa nüchekaka Maleiwa wapüleerua?
Nücheküin Jehová anainjatüin maʼin wakuwaʼipa. Wanaa sümaa nukumajüin Adán sümaa Eva, niʼitaain naya suluʼu tü apainkat Edén. «Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu tü kasa shirokujatkat palaa, saaʼu tü kasa waawatakat iipünaapünaa je saaʼu tü kasa mmapaʼajatkat süpüshuaʼale» müshi nia namüin (Génesis 1:28). Nücheka achikit Jehová kachooinjanain naya, anainjatüin maʼin sukuwaʼipa tü Mmakat natuma jee jülüjainjatüin naaʼin tü mürütkalüirua. Tü nüchekakat Maleiwa napüleerua na wayuukana shia nnojoluinjanain ayuulin naya jee katüinjatüin noʼu waneepia.
Mayaainjeʼe nnojoluin weʼrüin tia maaʼulu, a nikeraajeerü shia Maleiwa mapeena (Isaías 46:10, 11). Nnojotsü motuin naaʼin anainjatüin wakuwaʼipa nutuma jee katüinjatüin woʼu waneepia suluʼu wanee mma anasü (paashajeʼera Alateetkat Mapeena [Apocalipsis] 21:3, 4).
2. ¿Kasa aneetka atuma waaʼin maaʼulu yaa?
Aletüjülia wakuwaʼipa sümaa weʼraajeein nukuwaʼipa Jehová jee waʼwaajeein nia (paashajeʼera Mateo 5:3-6). Nücheküin Maleiwa aleewainjanain waya nümaa, waaʼinrüinjatüin süpüshuaʼa tü nümakat, alinjachin nia wapüla otta waʼyataainjanain nümüin süka süpüshuaʼa waaʼin (Deuteronomio 10:12; Salmo 25:14). Müle shia watuma, aneerü maʼin waaʼin jaʼitairü kasain alatüin wamüin. Waʼwaajüle Jehová, talatüsü naaʼin wamaa, talatüsü waaʼinya süka waaʼinrüin tü nüchekakat.
WEKIRAJAA SOOʼOMÜIN
Wekirajaa süchiki anain maʼin nutuma Maleiwa sukuwaʼipa tü Mmakat süka alin wayuu nüpüla otta kasapülajanain nukumajaka waya.
3. Nücheka achikit Jehová anainjatüin sukuwaʼipa wayuu
Jünaja tü VIDEOKOT otta yooto jia süchiki tüü:
-
¿Jamüsü anaka maʼin sukumajia tü Mmakat nutuma Maleiwa?
Jaashajeʼera Eclesiastés 3:11 otta yooto jia süchiki tüü:
-
Sünainjee tia pütchikat, ¿kasa pütüjaka süchiki tü nüchekakat Jehová wapüleerua?
4. Nnojotsü aʼwanajaain tü nüchekakat Jehová wapüleerua
Jaashajeʼera Salmo 37:11, 29 jee Isaías 55:11 otta yooto jia süchiki tüü:
-
¿Jamüsü watüjaaka saaʼu nnojoluin suʼwanajaain tü nüchekakat Jehová wapüleerua?
Sumojujaale wanee miichi eesü süpüla sunoutunuin süchikuaʼa, meeria sukuwaʼipa tü Mmakat. Mayaainjeʼe sumojujunüin, nunouteʼereerü shia Maleiwa süchikuaʼa napüla na wayuu aikana apüla nia.
5. Anasü waaʼin waaʼinrüle tü nüchekakat Jehová wapüleerua
Watüjaapa saaʼu tü nüchekakat Jehová wapüleerua, anasü waaʼin sutuma. Jünaja tü VIDEOKOT otta yooto jia süchiki tüü:
-
¿Kasa akaalinjaka Terumi süpüla sütüjaain saaʼu tü nüchekakat Jehová süpüleerua?
Jaashajeʼera Eclesiastés 12:13 otta yooto jia süchiki tüü:
-
Süka wainmain tü kasa naaʼinrakat Jehová wapüleerua, ¿kasa waaʼinrajatka süpüla kojutuin wamüin tia naaʼinrakat?
EESHII WAYUU EEKAI NASAKIRÜIN: «¿Niʼitaainche waya Maleiwa süpüla weʼrüin müliaa?».
-
¿Jameerü pünüiki pümünüle?
WATÜJAAITPAKA AAʼU
Nücheka achikit Jehová anainjatüin wakuwaʼipa waneepia yaa saaʼu tü Mmakat. Aneerü waaʼin waʼwaajüle nia maaʼulu süka süpüshuaʼa waaʼin.
Pusouta shiʼipajee
-
¿Kasapülajana nukumajaka Maleiwa Adán sümaa Eva?
-
¿Jamüsü watüjaaka saaʼu nnojoluin suʼwanajaain tü nüchekakat Jehová wapüleerua?
-
¿Kasa paaʼinrajatka süpüla anain pukuwaʼipa?
PÜNAʼLA SOOʼOMÜIN
Paashajeʼera süchiki jamüin watüjaaka saaʼu eejatüin tü apainkat Edén.
«¿Shiimainchejeʼe eejatüin tü apainkat Edén?» (Aapiria Wayuu, eneeroʼu 1, 2011)
Paashajeʼera süchiki jamüin watüjaaka saaʼu eejeerüin waneepia tü Mmakat.
Pikirajaa sünain tü sümakat tü Bibliakat süchiki kasapülajanain eeka waya.
Pünaja nüchiki wanee wayuu nnojoikai talatüin aaʼin mayaainjeʼe nnojoluin kasain choʼujaain nümüin.
a Sünain ekirajaaya 26, wekirajaajeerü anain jamüin nnojotka shikeraajüin paala tü nüchekakat Maleiwa wapüleerua.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
