TOLUMỌYE 25

Ọkpọnanaowei Tetuu Kị Duonị Wó Tẹmẹ Ma O?

FARỊ

Kịmị-tọbọụ ‘alaghatimi fịị mịnị, má biin bụụdọọnyeama kị nana wẹrị emi’ bara kị Bible mọ gbaa mị. (Job 14:1) Omịnị bịsẹ bara timi kị Ọkpọnanaowei mọ dọụ wẹrị emi a o? Ọkpọnanaowei bịsẹ bara dọụghaba, tetuu kị duonị omịnị wó tẹmẹ ma o? Ọkpọnanaowei dọụ wẹrị emi bara bị paa mịnị a o? Wẹrị Bible akị bei biibịbịbo paraị wẹrị emi bara dii.

1. Jehovah tetuu kị duonị wó tẹmẹ ma o?

Omịnị ebiụndụ inyenrin kị Jehovah mọ dọụ emi. Omịnị Adam mọ Eve mọ tẹmẹ mị, anị akị garden of Eden bolou ka tụa mị. “Ọkpọnanaowei tarịama akị a pịrị mị, má gbaa a pịrị mị: ‘Awọụama zii biinmọ má kịrịogbo bọọ emi yemọse dii.’” (Genesis 1:28) Jehovah dọụ bara mị, Adam mọ Eve mọ awọụama zii, kiriogbosẹ tọlọmọ paradise a paa, má namamọsẹ dii. Jehovah kịmịama dọọngha má fịịgha fa bara inyenrintimi bẹseri bẹseri laa kị dọụ wẹrị emi. Kịmịsẹ angọ kụrọ má ụndụtimi bẹseri bẹseri laa kị Jehovah mọ dọụ wẹrị mị.

Bei tịẹkiri mị, akpọ bị Ọkpọnanaowei dọụbara fa. a Anịa Ọkpọnanaowei dọụbara bị paa mịnị. (Isaiah 46:10, 11) Anị duonị Jehovah gbaaye pei mịnị kịmịmọ fagha fagha ụndụ nana mịnị má ebi dẹịn akpọ ka timi mịnị.—Revelation 21:3, 4 goo.

2. Omịnị bei tịẹkiri mị tebara kị mịẹ wẹrị ebiụndụ nana mịnị a o?

Jehovah kị wó inyenrin mụ bara gbaa wó pịrị agbẹị emi, tuubi Ọkpọnanaowei bịsẹ bara ka kị wó tẹmẹ mi. Anị duonị kịmịawọụ Ọkpọnanaowei nimi má ụ karị dịsẹ nana emi. (Matthew 5:3-6 goo.) Jehovah, omịnị wo ikieotu a paa, “wo gbaaye pei, ụ tarị,” má “[wó] adụdụsẹ akị” ụ karị kị dọụ emi. (Deuteronomy 10:12; Psalm 25:14) Bụụdọọnyeama k’emi kpọ, Jehovah dọụbara wó mọ inyenrin daba, omịnị gesii pọwẹị nana má ebiụndụ inyenrin mịnị.

EBIBARA TUUDỌỤ

Jehovah kiriogbo tẹmẹ timi ifie bọọ tarị mịẹdịa bara dii. Má Bible duo Jehovah kịmị-tọbọụ tẹmẹ tuu kpọ tolumọ.

3. Kịmịawọụ ebiụndụ inyenrin kị Jehovah mọ dọụ wẹrị emi

VIDIO farị dá, bei biibịbị kẹrị ẹrẹtei.

VIDIO: Tetuu Kị Duonị Ọkpọnanaowei Kiriogbo Tẹmẹ Ma O?—Dọlọyọ (1:41)

Tetuu kị duonị Ọkpọnanaowei kiriogbo tẹmẹ ma o?

Ecclesiastes 3:11 goo dá, bei biibịbị kẹrị ẹrẹtei:

Mị gooyọ mị, Jehovah gbelemọ yọmị, ị́mịnị teeki tolumọ akị ma o?

4. Jehovah dọụbara kị paa mịnị

Psalm 37:11, 29 mọ Isaiah 55:11 mọ goo dá, bei biibịbị kẹrị ẹrẹtei:

Omịnị tebara kị mịẹtimi Jehovah dọụbara bị mọkpọ paa mịnị bara nimi ma o?

Seidẹ warị mịẹ ebimọ a paa emi bara bị, Jehovah kpọ mị kiriogbo tọlọmọ ụ karị mịnị kịmịbo pịrị mịnị

5. Jehovah karị mịnị mị wó ụndụmọ mịẹ ebimọ mịnị

Jehovah wó tẹmẹ tuubi wó mọ nimi yọmị, wó mịẹ pọwẹị mịnị. VIDIO farị dá, bei biibịbị kẹrị ẹrẹtei.

VIDIO: Ọkpọnanaowei Wó Tẹmẹ Tuubi Ị Mọ Nimi Mị (5:03)

Terumi, Ọkpọnanaowei wó tẹmẹ tuubi nimi yọ duo tẹ arere-ama kị nana ma o?

Ecclesiastes 12:13 goo dá, bei biibịbị kẹrị ẹrẹtei:

Jehovah mịẹ akị wó pịrịdẹ yemọ dii daba, omịnị teeki mịẹ agbẹị emi a o?

KỊMỊ BII A PAA EMI: “Tetuu kị duonị Jehovah wó tẹmẹ ma o?”

Tebara kị ị́ mọ paraị mịnị a?

KỊLỌỌBARA

Bei tịẹkiri kpọ omịnị wó adụdụsẹ akị Jehovah karị daba, omịnị gesii ụndụ inyenrin mịnị. Omịnị fagha fagha ụndụ nana bá ebidẹịn akpọ inyenrin kị Jehovah mụ dọụ—emi.