THUTO 25
Ke ka Baka la Eng Modimo a re Bopile?
Beibele e re bophelo bja batho ke bjo ‘bokopana e bile bo tletše ka mathata.’ (Jobo 14:1) Na ge Modimo a be a re bopa o be a nyaka gore re tle re phele ka yona tsela yeo? Ge e ba go se bjalo, gona ke ka baka la’ng a re bopile? Na re ka tla ra tsoga re phetše ka tsela yeo Modimo a nyakago re phela ka yona? Ekwa gore Beibele e araba dipotšišo tše bjang ka tsela yeo e kgahlišago.
1. Jehofa o nyaka gore re phele bjang?
Jehofa o nyaka gore re ipshine ka bophelo. Ge Modimo a be a bopa batho ba mathomo e lego Adama le Efa, o be a ba beile phakeng e botse yeo e bego e le lefelong leo le bitšwago Edene. Ke moka o ile “a ba šegofatša gomme a re go bona: ‘Tswalang le ate le tlale lefase le be le le fenye.’” (Genesi 1:28) Jehofa o be a nyaka gore Adama le Efa ba be le bana, ba dire lefase ka moka paradeise, goba phaka e botse, e bile ba hlokomele le diphoofolo. Jehofa o be a nyaka gore ba ipshine ka bophelo ba sa babje, e bile ba phele go ya go ile.
Le ge dilo di ile tša senyega, eupša Modimo o sa nyaka gore batho ba tle ba phele ka tsela yeo. a (Jesaya 46:10, 11) Modimo o sa nyaka gore batho bao ba mo kwago ba phele go ya go ile, ba ipshine e bile ba se be le mathata.—Bala Kutollo 21:3, 4.
2. Re ka dira eng gore re ipshine ka bophelo gona bjale?
Jehofa o re bopile re na le kganyogo ya go nyaka go mo tseba le go mo hlankela. (Bala Mateo 5:3-6.) O nyaka gore re be le segwera se sebotse le yena, re ‘sepele ditseleng tša gagwe ka moka, re mo rate,’ le go mo hlankela ‘ka dipelo tša rena ka moka.’ (Doiteronomio 10:12; Psalme 25:14) Ge re ka dira dilo tše, re tlo ipshina ka bophelo le ge re na le mathata. Ge re hlankela Jehofa, re a tseba gore re phelela eng.
ITHUTE KA MO GO TSENELETŠEGO
Ekwa gore tsela yeo Jehofa a bopilego lefase ka yona e bontšha bjang gore o re rata kudu, o be o kwe le gore Beibele e re ke ka baka la eng a re bopile.
3. Jehofa o nyaka gore re ipshine ka bophelo
Bapalang BIDIO ye, gomme le boledišaneng ka potšišo e latelago:
-
Ke ka baka la’ng Modimo a ile a bopa lefase?
Balang Mmoledi 3:11, gomme le boledišaneng ka potšišo e latelago:
-
Ge Jehofa a be a bopa batho o be a nyaka gore ba phele nako e kaakaa’ng, le gore ba phele bjang?
4. Jehofa o sa nyaka gore batho ba ipshine ka bophelo
Balang Psalme 37:11, 29 le Jesaya 55:11, gomme le boledišaneng ka potšišo e latelago:
-
Re tseba bjang gore Jehofa o sa nyaka gore re ipshine ka bophelo?
Ntlo yeo e senyegilego kudu e ka lokišwa gape. Ka mo go swanago, ka ge batho ba sentše lefase, Modimo o tlo le lokiša gape gore batho bao ba mo kwago ba phele go lona
5. Go hlankela Jehofa go dira gore re tsebe gore re phelela eng
Go tseba gore re phelela eng go dira gore re thabe kudu. Bapalang BIDIO ye, gomme le boledišaneng ka potšišo e latelago:
-
Bidiong ye, Terumi o ile a holega bjang ka morago ga gore a tsebe gore re phelela eng?
Balang Mmoledi 12:13, gomme le boledišaneng ka potšišo e latelago:
-
Ka ge Jehofa a re diretše dilo tše dintši kudu, re ka bontšha bjang gore re a mo leboga?
MOTHO YO MONGWE A KA GO BOTŠIŠA GORE: “Botsebotse re phelela eng ka gore go a swana re a hwa?”
-
O ka mo araba bjang?
O ITHUTILE ENG?
Jehofa o nyaka re thabela bophelo go ya go ile gona mo lefaseng, e bile re se na mathata. Ge re mo hlankela ka dipelo tša rena ka moka, re kgona go tseba gore re phelela eng le ge re na le mathata.
Dipotšišo
-
Ge Jehofa a be a bopa Adama le Efa o be a nyaka gore ba phele bjang?
-
Re tseba bjang gore Modimo o sa nyaka gore batho ba ipshine ka bophelo?
-
O ka dira’ng gore o thabele bophelo?
ITHUTE KA MO GO OKETŠEGILEGO
Ekwa gore ke ka baka la eng re tshepa gore serapa sa Edene, se be se le gona e le ka nnete.
“Serapa sa Edene—Na ke Nonwane Goba ke sa Kgonthe?” (Morokami wa January 1, 2011.)
Ekwa gore ke ka baka la eng re tshepa gore lefase le tla dula le le gona.
“Na Polanete ya Lefase e tla Fedišwa?” (Sehlogo seo se lego wepesaeteng)
Ekwa gore Beibele e re ke ka baka la eng re phela.
“Morero wa Bophelo ke Ofe?” (Sehlogo seo se lego wepesaeteng)
Ekwa ka monna yo mongwe yoo a bego a nagana gore o na le dilo ka moka tšeo di mo dirago gore a ipshine ka bophelo.
a Thutong yeo e latelago, o tlo kwa gore go senyegile go etla kae.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
