ƐZUKOALƐDEƐ 25
Bodane Boni A Nyamenle Lɛ Maa Yɛ A?
Baebolo ne ka kɛ sonla mekɛ le ‘ezinra yɛɛ nuhua le ngyegyelɛ ngome.’ (Dwobu 14:1) Asoo ɛhye a amgba Nyamenle kpondɛ kɛ ɔto yɛ a? Saa ɔnle zɔ a, ɛnee bodane boni a ɔlɛ ɔmaa yɛ a? Asoo ɔbara nu? Nea mualɛ mɔɔ ɔyɛ anyelielɛ mɔɔ Baebolo ne fa maa la.
1. Ɛbɛlabɔlɛ boni a Gyihova kpondɛ kɛ yɛnyia a?
Gyihova kpondɛ kɛ yɛ nye die wɔ ɛbɛlabɔlɛ nu. Mekɛ mɔɔ ɔbɔle alesama mɔɔ limoa, Adam nee Yive la, ɔvale bɛ ɔguale Yidɛn tola, paladaese kɛnlɛma ne anu. Akee “Nyamenle yilale bɛ na ɔzele bɛ kɛ: ‘Bɛwo bɛmaa bɛ nwo ɛzo, bɛyi azɛlɛ ne na bɛnlea zolɛ.’” (Gyɛnɛsese 1:28) Ɛnee Gyihova kulo kɛ bɛwo mralɛ, bɛmaa azɛlɛ ye amuala yɛ paladaese na bɛnea nane ne mɔ. Ɛnee ye bodane a le kɛ menli kɔsɔɔti banyia kpɔkɛdelɛ kpalɛ na bɛadɛnla aze dahuu.
Ninyɛne angɔ ye kɛ mɔɔ Nyamenle kpondɛ la ɛdeɛ, a noko Nyamenle bodane ne ɛtɛkakyile. (Ayezaya 46:10, 11) Ɔkulo kɛ alesama mɔɔ yɛ tieyɛ la tɛnla aze dahuu wɔ anyelielɛ nu.—Kenga Yekile 21:3, 4.
2. Kɛzi yɛ nye kola die wɔ ɛbɛlabɔlɛ nu kɛkala ɛ?
Gyihova bɔle yɛ la ɔmaanle yɛnyianle “sunsum nu ngyianlɛ,” ɛhye a le ɛhulolɛ mɔɔ yɛlɛ kɛ yɛbanwu Nyamenle na yɛazonle ye la. (Kenga Mateyu 5:3-6.) Ɔkulo kɛ yɛ nee ye nyia agɔnwolɛvalɛ kyengye, ‘yɛdua ye ndenle kɔsɔɔti anu, yɛkulo ye,’ na yɛfa yɛ “ahonle muala” yɛsonle ye. (Ditilɔnomi 10:12; Edwɛne 25:14) Saa yɛyɛ zɔ a, yɛ nye balie kpalɛ ɔnva nwo kɛ yɛlɛ ngyegyelɛ la. Saa yɛsonle Gyihova a ɔmaa yɛ nye die wɔ ɛbɛlabɔlɛ nu ɔluakɛ yɛze kɛ yɛlɛyɛ mɔɔ ɔkulo la.
SUKOA DƆƆNWO
Sukoa ɛlɔlɛ kpole mɔɔ Gyihova vale zieziele azɛlɛ ye maanle yɛ nee mɔɔ ye Edwɛkɛ ne ka ye wɔ bodane mɔɔ ɔti ɔbɔle yɛ la anwo debie.
3. Gyihova lɛ bodane kpalɛ maa alesama
Ye VIDIO ne, na akee bɛzuzu kpuya ɛhye anwo.
-
Duzu ati a Nyamenle bɔle azɛlɛ kɛnlɛma ɛhye a?
Kenga Nolobɔvo 3:11, na akee bɛzuzu kpuya ɛhye anwo:
-
Duzu a ɛhye maa ɛnwu ye wɔ Gyihova anwo a?
4. Gyihova bodane ne ɛtɛkakyile
Kenga Edwɛne 37:11, 29 yɛɛ Ayezaya 55:11, na akee bɛzuzu kpuya ɛhye anwo:
-
Kɛzi yɛkola yɛnwu ye kɛ bodane mɔɔ Gyihova lɛ maa yɛ la ɛtɛkakyile ɛ?
Bɛkola bɛyɛ sua mɔɔ ɛzɛkye la boɛ. Zɔhane ala a Nyamenle bayɛ azɛlɛ ne mɔɔ alesama ɛnnea zolɛ boɛ la boɛ yeamaa menli mɔɔ kulo ye la a
5. Yɛsonle Gyihova a yɛ nye die wɔ ɛbɛlabɔlɛ nu
Yɛnwu deɛmɔti bɛbɔle yɛ la a ɔmaa yɛ nye die. Ye VIDIO ne, na akee bɛzuzu kpuya ɛhye anwo.
-
Kɛzi bodane mɔɔ ɔti bɛbɔle yɛ mɔɔ Terumi nwunle ye la boale ye ɛ?
Kenga Nolobɔvo 12:13, na akee bɛzuzu kpuya ɛhye anwo:
-
Kɛmɔ Gyihova ɛyɛ dɔɔnwo ɛmaa yɛ la ati, duzu a ɔwɔ kɛ yɛdayɛ noko yɛyɛ yɛmaa ye a?
BIE A AWIE BABIZA KƐ: “Bodane boni ati a bɛbɔle yɛ a?”
-
Kɛzi ɛbaye ɔ nloa ɛ?
EDWƐKƐ TITILI
Gyihova kulo kɛ yɛ nye die dahuu wɔ azɛlɛ ye azo. Saa yɛfa yɛ ahonle muala yɛsonle ye a, yɛ nye balie wɔ ɛbɛlabɔlɛ nu kɛkala bɔbɔ.
Ndinu
-
Bodane boni a ɛnee Gyihova lɛ maa Adam nee Yive a?
-
Kɛzi yɛkola yɛnwu ye kɛ bodane mɔɔ Gyihova lɛ maa alesama la ɛtɛkakyile ɛ?
-
Kɛzi ɛ nye bahola alie kpalɛ wɔ ɛbɛlabɔlɛ nu ɛ?
KPONDƐ DƆƆNWO
Nea daselɛ mɔɔ kile kɛ ɛnee Yidɛn tola ne wɔ ɛkɛ ne amgba la.
“Yidɛn Tola—Ɔle Nɔhalɛ Edwɛkɛ Ɔ?” (Ɛzinzalɛ Arane, January 1, 2011)
Sukoa deɛmɔti yɛbahola yɛalie yɛali kɛ azɛlɛ ne badɛnla ɛkɛ ne dahuu la.
Nea mɔɔ Baebolo ne ka ye wɔ kɛzi ɛbanyia anyelielɛ wɔ wɔ ɛbɛlabɔlɛ nu anwo la.
Nea kɛzi nrenyia bie mɔɔ ɛnee ɔdwenle kɛ ɔlɛ debie biala la nwunle debie mɔɔ ɔhyia nwolɛ wɔ ye ɛbɛlabɔlɛ nu la.
a Ɛbazukoa mɔɔ zile la anwo debie wɔ ɛzukoalɛdeɛ bieko anu.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
