UYONO 25

Me yẹ Ọhọre Osolobrugwẹ Harẹn Ọwan?

KPORIE

Baibol na ọ tare taghene ituakpọ ‘i vwa tọ-ọ, aye a ji mẹrẹn ebẹnbẹn buebun.’ (Job 14:1) Ọnana yi ghini ọhọre Osolobrugwẹ harẹn ọwan? Orho rhiẹ omara-an, me yẹ ọhọre Osolobrugwẹ harẹn ọwan? Ọnọ sabu rugba? Jene yono kpahen ẹkpahenrhọ i Baibol na rọ nọ bọn ọwan gbanhon.

1. Aruẹ enyerakpọ ọgo yi Jehova ọ guọlọre harẹn ọwan?

Jehova ọ guọlọre ne nyerakpọ rọ mai rhomu kparobọ. Ọye yọ ma ituakpọ erukaro na, nọyẹ, Adam ọrhẹ Eve, ji fi aye rhẹ i Paradais orhorhomu re se, ogba Eden. Omarana, “Osolobrugwẹ nọ ha ebrurhọ rẹn aye, Osolobrugwẹ nọ ta rẹn aye: ‘Are i vwiẹ nẹ are i bunrhọ, nẹ are i vuọn akpọ na jeghwai hẹrote yi.’ ” (Genesis 1:28) Jehova ọ guọlọre nẹ aye i vwiẹ emọ, nẹ aye i ruẹ ọsoso otọrakpọ na rhiẹ i paradais, jeghwai hẹrote eranmo na. Ọhọre ọnẹyen harẹn ihworho ephian yẹ, ọrẹ aye ina riamerhen omọkpokpọ jeghwai nyerẹn bẹmẹdẹ.

Dedevwo ekwakwa a nyalele oborẹ ọ guọlọre-e, a ọhọre Osolobrugwẹ o ji wene-e. (Isaiah 46:10, 11) Ọ ji guọlọ nẹ ituakpọ ra huvwele yi i nyerẹn bẹmẹdẹ uvuẹn erhirhiẹ ro fuoma.—Se Revelation 21:3, 4.

2. Marhẹ ene ru riamerhen obọdẹn akpenyerẹn vwana?

Jehova ọ maren ọwan rhẹ ‘ọdamẹ re ne yono kpahiẹn,’ nọyẹ, ọdamẹ re ne rhe yi jeghwai ga ye. (Se Matthew 5:3-6.) Ọ guọlọre ne rhiẹ obọdẹn ugbehian yen, na “nya uvuẹn ọsoso izede enẹyen, vwo ẹguọlọ kpahiẹn,” jeghwai ga ye “rhẹ ọsoso ọmudu [ọwan].” (Deuteronomy 10:12; Psalm 25:14) Ọwan i rhe ru te omaran, oma ọnọ ghini merhen ọwan dedevwo a mẹrẹn ebẹnbẹn buebun. Arha ga i Jehova, ana mẹrẹn omamerhomẹ uvuẹn akpenyerẹn ọwan, fọkime e nyerẹn lele oborẹ ọ guọlọre.

YONO KODO RHỌ

Yono kpahen oborẹ ẹguọlọ i Jehova ọ do te, ọke rọ ma otọrakpọ na ọrhẹ oborẹ Ẹmro ọnẹyen o yonorin ọwan kpahen oborẹ ọsoriẹ ọ ma arhọ.

3. Jehova ọ guọlọre nẹ ituakpọ i vwo obọdẹn akpenyerẹn

Kporo IVIDIO na, orho ru, are i gba kpahenrhọ onọ ọnana.

IVIDIO: Mesoriẹ Osolobrugwẹ ọ Ma Akpọ Na?—Ekete ezẹko vwọye (1:41)

Mesoriẹ Osolobrugwẹ ọ ma otọrakpọ orhorhomu rẹn ọwan?

Se Ecclesiastes 3:11, orho ru, are i gba kpahenrhọ onọ ọnana:

Me yẹ ọnana o yoniruon kpahen i Jehova?

4. Ọhọre i Jehova o ji wene-e

Se Psalm 37:11, 29 ọrhẹ Isaiah 55:11, orho ru, are i gba kpahenrhọ onọ ọnana:

Marhẹ e ru rhe taghene ọhọre i Jehova harẹn ọwan o ji wene-e?

Oghwa re lẹro riẹn, rọ ji joma ghwọghọ ne, ana ji sabu rharhumu kwaphiẹ ye. Omaran ọ ji havwọ, otọrakpọ na rẹ ituakpọ i lẹro riẹn, Osolobrugwẹ ọnọ rharhumu kwaphiẹ ye harẹn ihworho ri vwo ẹguọlọ kpahiẹn

5. Arha ga i Jehova, ọnọ yẹ ọwan obọdẹn akpenyerẹn

Ọwan i rhe rhe oborẹ ọsoriẹ a ma arhọ, ọnọ yẹ ọwan obọdẹn omamerhomẹ. Kporo IVIDIO na, orho ru, are i gba kpahenrhọ onọ ọnana.

IVIDIO: Mi Yono Kpahen Oborẹ Ọsoriẹ e Nyerẹn (5:03)

Marhẹ i Terumi o ru mẹrẹn erere nẹ oborẹ o yonorin kpahen oborẹ ọsoriẹ e nyerẹn?

Se Ecclesiastes 12:13, orho ru, are i gba kpahenrhọ onọ ọnana:

Fọkime i Jehova o ru ekwakwa buebun harẹn ọwan ne, marhẹ ene ru kpẹmiẹ?

OHWORHO ỌNỌ SABU NỌ: “Mesoriẹ a ma arhọ?”

Marhẹ wu na kpahenrhọ ye lele?

ME WU YONORIN?

Jehova ọ guọlọre na riamerhen akpenyerẹn bẹmẹdẹ uvuẹn erhirhiẹ ro fuoma uvuẹn otọrakpọ na. Ọwan i rha ga ye rhẹ ọsoso ọmudu ọwan, akpenyerẹn ọwan no no rhomurhọ.