LEKCIJA 25
Savo dživipen dela o Del le manušenge?
E Biblija phenel čačipen, hoj le manušeskero dživipen hino ‚charno the pharo.‘ (Jób 14:1) Kamelas o Del, kaj avka te dživas? Te na, ta soske amen kerďa? Dživaha varekana avka, sar kamelas o Del? Andal e Biblija pes dodžanas sar ada hin.
1) Savo dživipen predal amende kamelas o Jehovas?
O Jehovas kamelas, kaj amen te el oda nekfeder dživipen. Sar kerďa perše manušen le Adam la Evaha, thoďa len te bešel andro šukar rajos, andre bar (zahrada) Eden. Paľis lenge o Del phenďa: „Mi el tumen but čhave a pheraren e phuv. Bešen pal caľi phuv u zalen la.“ (1. Mojžišova 1:28) O Jehovas kamelas mi en len čhave, mi keren caľa phuvatar o rajos a kaj pes te starinen pal o zvjerata. Kamelas, kaj savore manuša te en pro furt saste a kaj ňigda te na meren.
Adaďives na dživas avka, sar kamelas o Del, a aľe Ov peskero lav doľikerela. (Izaiáš 46:10, 11) Furt kamel te del le manušenge, so les šunen, o dživipen bijo čoripen, nasvaľiben the meriben. (Pregen Zjavenie 21:3, 4)
2) Kana amen ela čačes bachtalo dživipen?
Sam kerde avka, hoj amenge „kampel le Devles“. Oda hin, hoj furt kamas pal leste te džanel buter a buter a das leske ajsi paťiv the kamiben sar ňikaske avreske. (Pregen Matúš 5:3–6) Kamel, kaj leha te avas lačhe, „kaj te [phiras] pal leskere droma, kaj les te [kamas]“ a kaj les te šunas „cale jilestar.“ (5. Mojžišova 10:12; Žalm 25:14) Hin amen pharipena, aľe te oda avka keraha, ela amen bachtalo dživipen imar akana. Te das amari paťiv the kamiben le Jehovaske, dikhaha, hoj hin amen vaš soske te dživel a hoj džas lačhe dromeha.
DODŽAN TUT BUTER
Savo baro jilo sikaďa o Jehovas, sar predal amende kerďa kadi šukar phuv? So phenel e Biblija pal oda, savo dživipen amen užarel?
3) O Jehovas amenge dela rajikano dživipen
Mukh o VIDEJO a paľis vakeren jekhetane.
-
Soske o Jehovas kerďa ajsi šukar phuv?
Pregen Kazateľ 3:11 a paľis vakeren jekhetane:
-
So olestar sikhľuvas pal o Jehovas?
4) O Jehovas čačes kerela oda, so phenďa
Pregen Žalm 37:11, 29 the Izaiáš 55:11 a paľis vakeren jekhetane:
-
Sar džanas, hoj o Jehovas furt kamel, kaj te dživas andro rajos?
Avka sar rozmarde kherestar šaj el pale šukar kher the amara phuvatar šaj el šukar rajos. O manuša la mosarde, aľe o Del latar kerela šukar kher predal ola, so les kamen
5) Dživ predal o Jehovas a ela tut bachtalo dživipen!
Te džanas, soske dživas, sam bachtale. Mukh o VIDEJO a paľis vakeren jekhetane.
-
Soske hiňi e pheň akana čačes bachtaľi?
Pregen Kazateľ 12:13 a paľis vakeren jekhetane:
-
O Jehovas predal amende kerďa igen but a furt kerel. Sar leske oda lačhipen šaj visaras pale?
VAREKO ŠAJ PHUČEL: „Soske sam pro svetos?“
-
So bi pre ada phenehas tu?
SO SIKHĽIĽAM
O Jehovas kamel, kaj te dživas pro furt adaj pre phuv bijo nasvaľiben the meriben. Te les cale jilestar šunaha, imar akana zadživaha, so hin bachtalo dživipen.
So bi phenehas
-
Soske o Jehovas kerďa le Adam la Evaha?
-
Sar džanas, hoj o Jehovas pale dela le manušenge o rajos?
-
Kana tut ela čačes bachtalo dživipen?
DIKH TUKE BUTER
Pregen tuke, soske sam peske ista, hoj e bar (zahrada) Eden adaj čačes sas.
Naozaj existovala záhrada Eden? (Strážna veža z 1. januára 2011)
Pregen tuke, soske šaj paťas, hoj e phuv ačhela pro furt.
Kana ela tiro dživipen čačes bachtalo? Adaj tut dodžaneha.
Jekhe muršes sas sa pro svetos, aľe paľis arakhľa, so hin čačes bachtalo dživipen.
a Andre aver lekcija pes dodžanaha, soske hin pro svetos o trapišagos.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
