MATAUPU 25

Se a te Fuafuaga a te Atua mō Tatou?

FAKATAGI/PEI

E fakaasi ‵tonu mai i te Tusi Tapu me i te olaga o tino ‘e toetoe kae ‵fonu i fakalavelave.’ (Iopu 14:1) E mata, tenei loa te olaga ne manako te Atua ke maua ne tatou? Kafai e se tenā, se a la tena fuafuaga mō tatou? E mata, ka taunu eiloa? Mafaufau ki tali fakamafanafana e maua mai i te Tusi Tapu.

1. Se a te vaegā olaga ne manako a Ieova ke maua ne tatou?

Ne manako a Ieova ke maua ne tatou te ‵toe olaga ‵lei. I te taimi ne faite ne ia a te tauavaga muamua ko Atamu mo Eva, ne faka‵nofo ne ia lāua i se palataiso gali, ko te fatoaga o Etena. Oti aka, “ne fakamanuia lāua ne te Atua kae fai atu: ‘Ke fanafanau kae ke fakatokouke, faka‵fonu te lalolagi kae pule atu ki ei.’” (Kenese 1:28) Ne manako a Ieova ke fai lā tama‵liki, ke fai te lalolagi kātoa mo fai se palataiso, kae ke tausi atu ki manu. Ne manako a ia ke maua ne tino katoa a te malosi ‵lei katoatoa kae ke ola ki se-gata-mai.

E tiga loa ne seki taunu a mea konā, a kae ne seki ‵fuli eiloa a te fuafuaga a te Atua. (Isaia 46:10, 11) Koi manako eiloa a ia ke ola a tino faka‵logo ki te se-gata-mai i tulaga ‵lei katoatoa.—Faitau te Fakaasiga 21:3, 4.

2. E mafai pefea o maua ne tatou se olaga aoga i aso nei?

Ne faite ne Ieova tatou mo se “manakoga faka-te-agaga,” ke fia iloa kae tapuaki atu ki a ia. (Faitau te Mataio 5:3-6.) E manako a ia ke maua ne tatou se va fakataugasoa pili mo ia, ‘ke sa‵sale i ana auala katoa, ke alofa ki a ia,’ kae ke tavini atu foki “mo [‵tou] loto kātoa.” (Teutelonome 10:12; Salamo 25:14) Kafai e fai tatou penā ka mafai o fia‵fia tonu tatou faitalia ‵tou fakalavelave. A te tapuaki atu ki a Ieova ka fai ei ke lavea ne tatou a te aoga o te olaga ona ko te mea e ola tatou i te auala e manako a ia ki ei.

KELI MALOSI IFO

Tauloto ki te lasi o te alofa o Ieova ne fakaasi mai i te taimi ne fakatoka ne ia te lalolagi mō tatou mo mea e akoako mai i tena Muna e uiga ki te fuafuaga mō te olaga.

3. Ne fakatoka ne Ieova se olaga gali mō tino

Pei te VITIO, ko sau‵tala ei ki te fesili tenei.

VITIO: Kaia ne Faite ne te Atua te Lalolagi?—Se vaega i ei (1:41)

Kaia ne faite ei ne te Atua te ‵tou paneta gali?

Faitau te Failauga 3:11, ko sau‵tala ei ki te fesili tenei:

Se a te mea e akoako atu ne te mea tenei ki a koe e uiga ki a Ieova?

4. Ne seki ‵fuli eiloa te fuafuaga a Ieova

Faitau te Salamo 37:11, 29 mo te Isaia 55:11, ko sau‵tala ei ki te fesili tenei.

E iloa pefea ne tatou me seki ‵fuli eiloa te fuafuaga a Ieova?

A te fale telā ko oti ne maofa e mafai o toe faite aka. E penā foki a te lalolagi telā ko se fia ‵saga ki ei te tokoukega o tino, ka toe fakafou ne te Atua ke ‵nofo i ei a tino kolā e a‵lofa ki a ia

5. A te tapuaki atu ki a Ieova e maua ei ne tatou se olaga aoga

E fia‵fia tatou māfai ko iloa atu te aoga o te olaga. Pei te VITIO, ko sau‵tala ei ki te fesili tenei.

VITIO: Ko Iloa ne Au a te Aoga o te Olaga (5:03)

Ne a mea aoga ne maua ne Terumi i te taimi ne iloa ei ne ia a te aoga o te olaga?

Faitau te Failauga 12:13, ko sau‵tala ei ki te fesili tenei:

Ona ko te uke o mea ne fai ne Ieova mō tatou, e ‵tau o fakaasi atu pefea te ‵tou loto fakafetai ki ei?

KĀTI KA FESILI MAI SE TINO: “Se a te aoga o te olaga?”

Ka tali atu pefea koe?

MANATU AOGA

E manako a Ieova ke ola tatou ki te se-gata-mai i tulaga ‵lei katoatoa i te lalolagi nei. Kafai e tapuaki atu tatou ki a ia mo ‵tou loto kātoa, ka aoga ‵tou olaga—i te taimi foki loa tenei.