NGUDO 25
Mudzimu U Ṱoḓa Ri Tshi Tshila Vhutshilo Ha Hani?
Bivhili i amba uri vhathu vha tshila ‘tshifhinga tshiṱuku vhe na maṱungu manzhi.’ (Yobo 14:1) Naa Mudzimu u ṱoḓa ri tshi tshila nga yeneyi nḓila? Arali zwi songo ralo, u ṱoḓa ri tshi tshila hani? Naa ri ḓo vhuya ra tshila nga nḓila ine Mudzimu a ṱoḓa ri tshi tshila ngayo? Ṱhogomelani phindulo dzi khuthadzaho dzi bvaho Bivhilini.
1. Yehova u ṱoḓa ri tshi tshila vhutshilo ha hani?
Yehova u ṱoḓa ri tshi tshila vhutshilo havhuḓisa. Musi Yehova a tshi sika vhathu vha u thoma vhane vha vha Adamu na Eva, o vha vhea pharadisoni ya u naka tsimuni ya Edeni. Mudzimu o “vha fhaṱutshedza a ri: ‘Bebani ni vhe vhanzhi ni ḓadze ḽifhasi ni ḽi vhuse.’” (Genesi 1:28) Yehova o vha a tshi ṱoḓa uri vha vhe na vhana, vha ite uri ḽifhasi ḽoṱhe ḽi vhe pharadiso na uri vha ṱhogomele zwipuka. O vha a tshi ṱoḓa uri vhathu vhoṱhe vha ḓiphiṋe nga u tshila tshoṱhe vhe na mutakalo wavhuḓi.
Zwa zwino a ri khou tshila nga nḓila ye Mudzimu a vha tshi ṱoḓa ngayo, a fhedzi u kha ḓi ṱoḓa ri tshi tshila nga nḓila ine a ṱoḓa ngayo. (Yesaya 46:10, 11) U kha ḓi ṱoḓa uri vhathu vha thetshelesaho vha tshile tshoṱhe nga fhasi ha zwiimo zwavhuḓisa hu si na tshi vha dinaho.—Vhalani Nzumbululo 21:3, 4.
2. Ni nga ḓiphiṋa hani nga vhutshilo zwino?
Yehova o ri sika ri na ṱhoḓea ya uri ri livhiswe ngae, ndi ngazwo ri tshi ṱoḓa u mu ḓivha na u mu gwadamela. (Vhalani Mateo 5:3-6.) Yehova u ṱoḓa ri tshi vha khonani dzawe dza tsini, u ṱoḓa uri ri “tevhedze zwoṱhe zwine a [ri] humbela,” ri mu fune na u mu shumela “nga mbilu [yashu] yoṱhe.” (Dotoronomio 10:12; Phisalema 25:14) Musi ri tshi ita zwenezwo, ri ḓo takala nga maanḓa naho ri na dzithaidzo. Musi ri tshi gwadamela Yehova, zwi ita uri ri ḓivhe uri ri khou tshilela mini ngauri ri vha ri tshi khou tshila nga nḓila ine a ṱoḓa ri tshi tshila ngayo.
GUDANI ZWO ENGEDZEAHO
Gudani nga ha nḓila ye Yehova a sumbedza ngayo uri u a ri funa nga maanḓa musi a tshi ri lugisela ḽifhasi na zwine Ipfi ḽawe ḽa zwi funza nga ha uri ri khou tshilela mini.
3. Yehova u ṱoḓa vhathu vha tshi tshila vhutshilo havhuḓisa
Ṱalelani VIDIO, ni kone u fhindula mbudziso i tevhelaho.
-
Ndi ngani Mudzimu o ri sikela ḽifhasi ḽa u naka nga u rali?
Vhalani Muhuweleli 3:11, ni kone u fhindula mbudziso i tevhelaho:
-
Zwenezwi zwi ni funza mini nga ha Yehova?
4. Tshipikwa tsha Yehova a tsho ngo shanduka
Vhalani Phisalema 37:11, 29 na Yesaya 55:11, ni kone u fhindula mbudziso i tevhelaho:
-
Ri zwi ḓivha hani uri Yehova ho ngo shandula tshipikwa tshawe nga ha riṋe?
Nnḓu yo tshinyalaho i nga vusuluswa. Nga hu fanaho, Mudzimu u ḓo vusulusa ḽifhasi ḽe vhathu vha ḽi tshinyadza, a ita uri ḽi dzulwe nga vhathu vhane vha mu funa
5. U gwadamela Yehova zwi ita uri ri ḓivhe uri ri khou tshilela mini
U ḓivha uri ri khou tshilela mini zwi nga ita uri ri takale. Ṱalelani VIDIO, ni kone u fhindula mbudziso i tevhelaho.
-
Vho-Terumi vho vhuyelwa hani nga u ḓivha uri vha khou tshilela mini?
Vhalani Muhuweleli 12:13, ni kone u fhindula mbudziso i tevhelaho:
-
Nga nṱhani ha uri Yehova o ri itela zwithu zwinzhi, ri nga sumbedza hani uri ri a livhuwa zwe a ri itela zwone?
MUṄWE MUTHU A NGA VHUDZISA URI: “Ri khou tshilela mini?”
-
Inwi ni nga ri mini?
NO GUDA MINI?
Yehova u ṱoḓa uri ri ḓiphiṋe nga u tshila tshoṱhe kha ḽifhasi nga fhasi ha zwiimo zwavhuḓisa hu si na tshi ri dinaho. Musi ri tshi mu gwadamela nga mbilu yoṱhe, zwi ita uri ri takale zwino.
Ni Kha Ḓi Zwi Humbula?
-
Yehova o vha o sikela mini Adamu na Eva?
-
Ri zwi ḓivha hani uri tshipikwa tsha Mudzimu nga ha vhathu a tsho ngo shanduka?
-
Ni nga ḓivha hani uri ni khou tshilela mini?
WANANI ZWO ENGEDZEAHO
Gudani uri ndi ngani ri tshi nga vha na vhungoho ha uri tsimu ya Edeni yo vha i hone zwa vhukuma.
“Naa Tsimu Ya Edeni Ndi Ya Vhukuma?” (Tshiingamo, 1 January 2011)
Gudani uri ndi ngani ri tshi nga vha na vhungoho ha uri ḽifhasi ḽi ḓo dzula ḽi hone lwa tshoṱhe.
Gudani nga ha zwine Bivhili ya zwi funza nga ha u ḓivha uri ri khou tshilela mini.
Vhonani uri ndi mini tshe tsha vha tshi tshi khou ṱahela kha muṅwe munna we a vha a tshi humbula uri u na zwithu zwoṱhe.
a Kha ngudo i tevhelaho, ni ḓo guda uri ndi ngani zwa zwino ri sa khou tshila nga nḓila ine Mudzimu a ṱoḓa ri tshi tshila ngayo.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
