Sɛ odwokɔ tanɩ be si a, ɩyɛ a mmenii sʋ̃maa bɛta bebizia kɛɛ “Mɩnla ti a?” Kila kezimɔ ɩyɛ anyɩnlɩlelɛ kɛɛ Bayɩbʋlʋ ɩfa odwokɔɣizialɛ eyi nwʋ munwalɩyɛ mɔɔ numɔ ɩla ɛkɛnɩ ɩma yɛ!

1. Kɛ ɩyɛlɩ mɔɔ Setanɩ ɩvalɩ tanɩ ɩɣalɩ oyuwadɩ a?

Setanɩ Abɔnsamɩ idwodwuli idiyialɩ Nyamɩnlɩ. Nɩ Setanɩ ɩpɛ kɛɛ idi mmenii zʋ, meti ɩlahɩlɩlɩ mmenii mɔɔ beli bɔmʋnlɩ, Adamɩ nɩɩ Yifi, ma bɛɣa bɛhɩnlanlɩ yɩ nwʋ ma bodwodwuli bediyialɩ Nyamɩnlɩ. Setanɩ iluwalɩ awohwi odwokɔ mɔɔ ɩhanlɩ ihileli Yifi zʋ yɛ ɩyɛlɩ ɔzɔ a. (Gyɛnɛsɩsɩ 3:1-5) Ɩmanlɩ inyianlɩ adwɩnɩ kɛɛ Gyehova ɩlɛ dɩyɛ baaba be isiyee yi. Nɩ ɩpɛɛ ikehile kɛɛ sɛ adasamaa bɛátiye Nyamɩnlɩ a, bɛ anyɩ ikele. Setanɩ ɩhanlɩ ihileli Yifi kɛɛ ilówu, na eyi yɛ ɩdɩ awohwi mɔɔ ili bɔmʋnlɩ a. Meti Bayɩbʋlʋ ɩfʋlɔ Abɔnsamɩ kɛɛ “ɩdɩ awohwinii na ɩdɩ awohwimaa munwala bɛ zɩ.”—Dwɔɔnʋ 8:44.

2. Mɩnla yɛ Adamɩ nɩɩ Yifi bezili pɔkɔ kɛɛ bɛkɛyɛ a?

Gyehova ɩyɛlɩ nninyeni baaba sʋ̃maa ɩmanlɩ Adamɩ nɩɩ Yifi. Ɩhanlɩ kɛɛ sa bɔkʋla bedi owudo bela zʋ mma wɔ toolo yi nu, gyɩsɛ ɔkʋ̃ pɛ. (Gyɛnɛsɩsɩ 2:15-17) Naasʋ̃ bezili pɔkɔ kɛɛ bekeli ɔzɔ owudo ɔkʋ̃ yɩ zʋ mma. Yifi “ɩdɩlɩ owudo mma yɩ be na ilili.” Aɣinzi nɩ, Adamɩ sʋ̃ “ilili” ebiye. (Gyɛnɛsɩsɩ 3:6) Bo munwala bɛyɛlɩ Nyamɩnlɩ zʋ azʋ̃nzɩzɩbɛ. Nɩ Adamɩ nɩɩ Yifi bedi munli, iluwakɛɛ bɔwɔlɩ bɛ wɔ ɔhʋanɩ be zʋ mɔɔ nɩ bɔkʋla bɛyɛ mɔɔ ɩtɩnɣɛ. Naasʋ̃ bɛhyɛlɩ da bɛyɛlɩ Gyehova zʋ azʋ̃nzɩzɩbɛ, eyi ɩmanlɩ bɛyɛlɩ tanɩ na bɔbʋlɩ yi tumililɛ. Pɔkɔ mɔɔ bezili nɩ ɩmanlɩ bɔnwʋnlɩ amanɩyɛ sʋ̃maa.—Gyɛnɛsɩsɩ 3:16-19.

3. Mɔɔ Adamɩ nɩɩ Yifi bɛyɛlɩ nɩ, kɛ ɩhã yɛ ize a?

Mmɩlɩ mɔ Adamɩ nɩɩ Yifi bɛyɛlɩ tanɩ nɩ, bɔdɔlɩ sini, na bɛvalɩ sinidɔlɛ bɔwʋlɩ bɔ tʋmaa munwala. Bayɩbʋlʋ ɩkã Adamɩ nwʋ odwokɔ kɛɛ: “Tanɩ iluwalɩ enii ɔkʋ̃ yɩ zʋ yɛ ɩɣalɩ oyuwadɩ a, na enii ɔkʋ̃ nɩ yɩ tanɩ nɩ ɩvalɩ owulo ɩɣalɩ. Iluwa eyi zʋ ti yɛ owulo ɩdʋlɩ ɩbɩndɩnlɩ mmenii munwatĩĩ bɔ zʋ a.”—Wulomimaa 5:12.

Sianti sʋ̃maa ti yɛ yɛnwʋ amanɩyɛ a. Ɩyɛ a, yɛnwʋ amanɩyɛ iluwa pɔkɔ tanɩ be mɔɔ yezili. Ɩyɛ sʋ̃ a, abiyemmɔ bɔ pɔkɔ tanɩ mɔɔ besi nɩ yɛ ɩma yɛnwʋ amanɩyɛ a. Itwu mmɩlɩ be sʋ̃ a, asianɩ mɔɔ yɛáhila yɩ ɔhʋanɩ mɔɔ isi nɩ yɛ ɩma yɛnwʋ amanɩyɛ a.—Kɩnga Odwokɔhanlɛvʋlɔ 9:11.

 SUMÁ SƲ̃MAA

4. Enii mɔɔ iwula yɛ amanɩyɛnwʋnlɛ mɛda

Mmenii sʋ̃maa bede bedi kɛɛ Nyamɩnlɩ yɛ idii oyuwadɩ munwala zʋ tumi a. Asʋ̃ eyi ɩdɩ nɔhʋanlɛ a? Yɩ́ VIDIYO nɩ.

Kɩnga Gyemisi 1:13 nɩɩ 1 Dwɔɔnʋ 5:19, na akʋ̃ bozunzú odwokɔɣizialɛ eyi nwʋ:

• Asʋ̃ Nyamɩnlɩ yɛ ɩma amanɩyɛnwʋnlɛ nɩɩ nninyeni tanɩ isizi a?

5. Kilá mɔɔ ɩzʋ̃ Setanɩ yi tumililɛ nu ɩɣa

1. A. Nɩ Adamɩ nɩɩ Yifi bedi munli, na nɩ bɛda Paladayɩsɩ. Naasʋ̃ bediyeli Setanɩ na bodwodwuli bediyialɩ Gyehova

2.  B. Mmɩlɩ mɔ bɛdɩlɩ atunwa nɩ, tanɩ, amanɩyɛnwʋnlɛ, nɩɩ owulo hyɛlɩ oyuwadɩ eyi nu manlɩ

3. D. Gyehova ɩkɛyɩ tanɩ, amanɩyɛnwʋnlɛ nɩɩ owulo wɔ ɛkɛ, na mmenii keli munli dɔkʋ̃ na bɛawʋwa Paladayɩsɩ

6. Gyehova ɩdwɩnɩ yɛ amanɩyɛnwʋnlɛ nwʋ

Asʋ̃ amanɩyɛ mɔɔ yɛnwʋʋ nɩ ɩávalɩ Nyamɩnlɩ nwʋ a? Kila mɔɔ Bulombunli Devidi nɩɩ sʋ̃mavʋlɔ Pita bɛhɛlɛlɩ. Kɩnga Ndwomi 31:7 nɩɩ 1 Pita 5:7, na akʋ̃ bozunzú odwokɔɣizialɛ eyi nwʋ:

• Sikalɛyɩ mɔɔ ɛɣa ɔnwʋ kɛɛ Gyehova ɩdwɩnɩ amanɩyɛ mɔɔ yɛnwʋʋ yɩ nwʋ nɩ, kɛ ɩma ɛtɩ nɣanlɩ ese a?

 YƖ DƆKƆWƆLƐ

Setanɩ Abɔnsamɩ, Adamɩ nɩɩ Yifi yɛ bɛvalɩ tanɩ bɛɣalɩ oyuwadɩ a. Gyehova ɩdwɩnɩ amanɩyɛ mɔɔ yɛnwʋʋ nɩ nwʋ baaba, na ɩlɛ́kyɛ ɩkɛyɩ yɩ wɔ ɛkɛnɩ.

Kɛ Okowuwa Ekeze a?

• Mɩnla awohwi odwokɔ yɛ Setanɩ Abɔnsamɩ ɩhanlɩ ihileli Yifi a?

• Mɩnla ɔhʋanɩ zʋ yɛ Adamɩ nɩɩ Yifi bɛ atunwadɩlɛ nɩ ɩhã ye munwala a?

• Mɩnla yɛ ɩma yɛnwʋ kɛɛ Gyehova ɩdwɩnɩ yɛ amanɩyɛnwʋnlɛ yɩ nwʋ a?