“Ðɛ́ kɔ̃̀ jèɛ́?” mɔ̀ dyi-diè-ɖɛ̀ ɓɛ́ ɔ dyi nyɔ ɓè wɔ̃ín kĩ́ín ɔ jù ké ɖɛ gbà ɖò dyi kpáín nyɛ. À kpá múàùn, sepoɛɖe Baɓoɔ jù dyi-diè-ɖɛ̀à gɔ̃̀ wáɖáá!

1. Xwɛ̀ Nɔɔ́-nàmàùn nyu ma ɖɛ gbà jè ɓóɖó-kpàà kɔ̃ dyàà kɛ́?

Sétɔ̃̀ mɔ̀à Nɔɔ́-nàmàùn wɛ̃ɛ zà ma Geɖepɔɔ wuɖu ɖùù dyi. Sétɔ̃̀ mɔ́ɔ ɓɛ́ ɔ ké ma nyɔ tɔ̀ɔ̀ ɓè nàìn jèɛɛ, ɔ cá ma Áɖɔ̀ùn kè Íì, ɓɛ́ wa ké ma ɔ Geɖepɔɔ wuɖu-ɖùù-dyi-zà-zàɔ̀ hwìɛ̀ kpá. Sétɔ̃̀ nyuɛ ma náa dyììn ɖé Íì se wɔ̃in tɔ́mɔ́ìn-tɔ́mɔ́ìn mú. (Jɛ́nɛ́sì 3:1-5) Ɔ nyuɛ ma ɓɛ́ Íì kéɛ ma hwìɖìi poìn kà Jɛhova nì ma ɔ ɖɛ nɔ̀mɔ̀ dyíin ɖò dyí vièɛ̀n nyɛ. Ɔ cɛ̃ɛ ma sɛ́ɖɛ́-kà kà ɓɛ́ nyɔùn ɓɛ́ìn múàùn nìɛ̀ ɔ jù ké wa se Geɖepɔɔ wuɖu nyu níɛ. Sétɔ̃̀ tɔ́mɔ́ ma se kĩ́ín-kĩ́ínɔ̀ dyììn ɖéɛ Íì gbo-cɛ̃-cɛ̃ mú kà ɓɛ́ ɔ se ma mɛ́ɛ muɛ. Ɔ jèɛɛ, Baɓoɔ ɖáìn Sétɔ̃̀ “se-tɔ́mɔ́-nyɔ̀” kè “seɛ̀ ɓà.”—Jɔ̃́ɔ́ 8:44.

2. Ðɛ́ Áɖɔ̀ùn kè Íì gã ma, ɓɛ́ wa ké ma nyu kɛ́?

Jɛhova nɔ̀mɔ̀ ma kpeɖeín mìɔ cá ɖé Áɖɔ̀ùn kè Íì gbo. Ɔ ɖá wa ɓɛ́ìn ma cu séín nì ma Ídɛ̃̀ìn-ɓàà-ɖɛ̀-gbààɔ̀ múɛɛ ɓo ɖiɛ ɔ sèìn ma cu dyúáɖò. (Jɛ́nɛ́sì 2:15-17) Kɛɛ, wa poɛ ma gbɔ, ɓɛ́ wa ké ma cu nìà wɛ ɓo ɖi wɛ̃́ɛ́. Íì “kpã́ ma cuɔ̀ ɓo ɖò, ké ɔ ɖiɛ ma.” Púɛɛ, Áɖɔ̀ùn mɔ̀ùn “ɖiɛ ma ɖekè.” (Jɛ́nɛ́sì 3:6) Wa sɔ̃́ɔ̀ zà ma Geɖepɔɔ wuɖu ɖùù dyi. Sepoɛɖe Áɖɔ̀ùn kè Íì se ma kɛɛ ɖò ɓéɖé jèɛɛ, wa ɓɛ́ìn ma ɖɛ mɔ̀ ɖɛ sɛ́ɖɛ́ìn dyíɛɛ nyuɛ tee. Kɛɛ, sepoɛɖe wa zà ma Geɖepɔɔ wuɖu ɖùù dyi hwòɖò-gbo-wɔ̃́ìn-kà jèɛɛ, wa nyu ma nàmàùn, ké wa seɛ ma gbo wɔ̃́ìn ɓɛ́ Geɖepɔɔ ké ma wa nàìn. Ðɛ nìà wɛ nyu-nyu dyà ma gà-dyé-dyé vɛ̀nɛ̀ wa kɔ̃.—Jɛ́nɛ́sì 3:16-19.

3. Ðɛ́ Áɖɔ̀ùn kè Íìɛ̀ gbɔ-po-ɖɛ̀ɔ̀ ɖà à bũ̀ nyu kɛ́?

Ti Áɖɔ̀ùn kè Íì nyu ma nàmàùn wɛ̃ɛ, wa ɓéɖé ma kɛɛ, ké waà dyú séín ɓèɔ̀ ɓéɖé ma kɛɛ ɖekè. Baɓoɔ cɛ̃ɛ ɓá Áɖɔ̀ùn jè dyí, ké ɔ ɖá: “Gàa dyúáɖò dyà ma nàmàùn ɓóɖó-kpàà kɔ̃, ké nàmàùn dyà mɛ́-mɛ́. Ké kàà mɛ́-mɛ́ nyu nyɔùn séín kɔ̃ dyiɛ.”—Wóɖómà 5:12.

À dyé gà ɓó xwíníín kò-kò ɓè jè. Tiɔ̀ ɖíɛ́ ɓè ní, à dyé gà ɓó ɖɛ gbà ɓè à po gbɔɛɛ jè. Tiɔ̀ ɖíɛ́ ɓè ɓaɖaín, à dyé gà ɓó ɖɛ gbà ɓè nyɔ tɔ̀ɔ̀ ɓè po gbɔɛɛ jè. Ké tiɔ̀ ɖíɛ́ ɓè mɔ̀ùn ní, à dyé gà ɓó se-dyí-ɓɛ̀ɖɛ̀ìn-ɖɛ̀ ɖò jè.—Zà Ìkíɖísìásì 9:11 wuɖuún.

 ÐE ÐƐ MÚIN CÁ

4. Nyɔ kɔ̃̀ sɔ̃ nìà à gà-dyé-dyéɔ̀ ɖeín nyɛ

Nyɔ ɓáún-ɓáún poɛ jàà kà ɓɛ́ Geɖepɔɔ kɔ̃̀ ɓóɖó-kpà gànáà kpé kɔ̃ún wɛ̃. Ɔ mɔ̀ jàà? Po VÍÐÒƆ̀ kũ̀à gbo.

Zà Jĩ́ìn 1:13 kè 1 Jɔ̃́ɔ́ 5:19 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Geɖepɔɔ sɔ̃ nì gà-dyé-dyé kè ɖɛ gbà ɖeínǹ?

5. Dyé ɖɛ ɓè sɔ̀ìn ɖé Sétɔ̃̀ɛ̀ nyɔ-nàìn-nàìnɔ̀ múɛ

1. Áɖɔ̀ùn kè Íì se ma kɛɛ ɖò ɓéɖé, ké wa cĩ́ ma Páɖédà mú. Kɛɛ, wa tò ma Sétɔ̃̀ ɖùù gbo, ké wa zà ma Jɛhova wuɖu ɖùù dyi

2.   Sɔ̀ìn ɓó wuɖu-ɖùù-dyi-zà-zàɔ̀ gboɛɛ, nàmàùn kè gà-dyé-dyé ɔ kè mɛ́-mɛ́ dyíìn ɓóɖó-kpàà kɔ̃in

3. Jɛhova mu nàmàùn kè gà-dyé-dyé ɔ kè mɛ́-mɛ́ jè dyi zĩ̀ìn. Nìí, nyɔùn-dyù se kɛɛ ɓéɖéɛ mu, ké wa mu Páɖédà mú cĩ́ìn ɖe

6. Jɛhova kɔ̃̀ à gà-dyé-dyéɔ̀ jè gbo

Geɖepɔɔ se à gà-dyé-dyéɔ̀ jè gbo kɔ̃̀ɔ̀? Dyé ɖɛ Kã́á Dèɓé kè àpɔ́sò Píɖɛ̀ céè ma kɛ. Zà Wɛ́ɖɛ́ 31:7 kè 1 Píɖɛ̀ 5:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ ɔ nyu nì hwòɖòɔ̀ nyuɛ ɓɛ́ m̀ kéɛ dyí dyuò kà ɓɛ́ Jɛhova dyé à gà-dyé-dyéɔ̀, ké ɔ kɔ̃̀ à jè gboɛ́?

 SṸÌN-XWÍNÍÍN

Sétɔ̃̀ mɔ̀à Nɔɔ́-nàmàùn wɛ̃ɛ kè Áɖɔ̀ùn ɔ kè Íì mɔ̀ nyɔ jɛ́ɛ́ ɓè dyàà gà ɓóɖó-kpàà kɔ̃ɛ̀. Jɛhova kɔ̃̀ ɖé à gà-dyé-dyéɔ̀ jè gbo mìɔ, ké ɔ muɛ jè dyi zĩ̀ìn kàùn.

Ðɛ-kɔ̃in-kpa-kpa

• Ðɛ́ mɔ̀ se ɓɛ́ Sétɔ̃̀ mɔ̀à Nɔɔ́-nàmàùn wɛ̃ɛ tɔ́mɔ́ìn ma Íì wɔ̃in nyɛ́?

• Ðɛ́ Áɖɔ̀ùn kè Íìɛ̀ wuɖu-ɖùù-dyi-zà-zàɔ̀ ɖà à séín bũ̀ nyu kɛ́?

• Xwɛ̀ à nyuɛ dyí dyuòɛ̀ kà Jɛhova kɔ̃̀ à gà-dyé-dyéɔ̀ jè gboɛ́?