LESEN 26
Pwata A Fiffis Minne mi Ngaw me Riáfféú?
Atun a kan fis eú mettóch mi ngaw, sia kan erá: “Pwata a fis ei?” Sia pwapwa pwe ewe Paipel a pélúweni ena kapas eis!
1. Ifa usun Satan a atolonga minne mi ngaw wóón fénúfan?
Satan ewe Tefil a ú ngeni Kot. A mochen nemeni ekkewe ekkóch, ina minne a etipetipa ekkewe popun aramas, Atam me Efa, ar repwe fiti lón an angangen ú ngeni Kot. A féri ena ren an kapas chofona ngeni Efa. (Keneses 3:1-5) A efisi án Efa epwe ekieki pwe Jiowa a amwéchú seni och mettóch mi múrinné. A ámmeef ngeni pwe epwe lapóló pwapwaan aramas ika ra álleasolapa Kot. Satan a eáni ewe áeúin kapas chofona atun a ereni Efa pwe esap tongeni máló. Ina popun, ewe Paipel a eita ngeni “eman chon chofona me semen chon chofona.”—Johannes 8:44.
2. Met Atam me Efa ra filatá le féri?
Jiowa a fókkun kisáseú ngeni Atam me Efa. A ereniir pwe ra tongeni mwéngé seni meinisin iráán lón ewe tánipiin Eten chilóón chék ewe efóch. (Keneses 2:15-17) Nge ra fen filatá ar repwe ocheei uwaan ena irá. Efa “a angei uän ewe irä o mongö.” Mwirin, Atam “a pwal mongö.” (Keneses 3:6) Iir me rúúemén ra álleasolapa Kot. Pokiten Atam me Efa ra unuséch, iwe ra tongeni chék féri minne mi pwúng. Iwe nge, ra filatá ar repwe álleasolapa Kot. Atun ra féri ena, ra tipis me ú ngeni an nemenem. Minne ra filatá a atoto ngeniir watteen riáfféú.—Keneses 3:16-19.
3. Ifa usun minne Atam me Efa ra filatá a kkúú manawach?
Atun Atam me Efa ra tipis, rese chúen unuséch, iwe meinisin mwirimwiriir kewe ra álemwiri tipis seniir. Iei met Paipel a erá usun Atam: “Ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin.”—Rom 5:12.
A wor fitu popun pwata sia kúna riáfféú. Fán ekkóch, sia riáfféú pokiten sia kefilingaw. Fán ekkóch, sia riáfféú pokiten án ekkewe ekkóch kefilingaw. Fán ekkóch, sia riáfféú pokiten sia chék sereni fisin och mettóch.—Álleani James 4:13, 14.
KÚTTAFICHI
Ppii ika pwata esap efisien Kot ekkeei mettóch mi ngaw me riáfféú mi tottori aramas lón ei fansoun, me met meefian atun sia kúna riáfféú.
4. Efisien ié ach kewe riáfféú?
Chómmóng aramas ra lúkú pwe Kot a nemeni unusen fénúfan. Nge mi pwúng ena? Fichi ei VIDEO.
Álleani James 1:13 me 1 Johannes 5:19, me mwirin pwóróusfengen wóón ei kapas eis:
-
Efisien Kot án aramas kewe riáfféú me minne mi ngaw?
5. Met mwirilóón án Satan nemenem?
Álleani Keneses 3:1-6, me mwirin pwóróusfengen wóón ekkeei kapas eis:
-
Ifa ewe kapas chofona Satan a eáni?—Ppii wokisin 4 me 5.
-
Ifa usun Satan a ámmeef ngeni Efa pwe Jiowa a amwéchú seni aramas och mettóch mi múrinné?
-
Ifa usun Satan a ámmeef ngeni aramas pwe ese pwal lamot ngeniir án Jiowa epwe néúr Sounemenem ren ar repwe kúna pwapwa?
Álleani Än Salomon Afalafal 8:9, me mwirin pwóróusfengen wóón ei kapas eis:
-
Met a fis ngeni fénúfan pokiten Jiowa ese nemeni?
-
Atam me Efa ra unuséch me ra nóm lón ewe Paratis. Nge ra álleasochisi Satan me ra ú ngeni Jiowa
-
Mwirin ewe angangen ú ngeni, fénúfan a uren tipis, weires, me a fis máló
-
Jiowa epwe amóeló tipis, riáfféú, me máló. Iwe, aramas repwe unuséch me nómsefál lón ewe Paratis
6. Jiowa a áfánni ach riáfféú
Kot mi áfánnikich atun sia nóm fán riáfféú? Álleani met King Tafit me aposel Petrus ra makkeei. Álleani Kölfel 31:7 me 1 Petrus 5:7, me mwirin pwóróusfengen wóón ei kapas eis:
-
Met meefiom ren óm silei pwe Jiowa a kúna me áfánni ach kewe riáfféú?
7. Kot epwe amóeló án aramas riáfféú meinisin
Álleani Aisea 65:17 me Pwärätä 21:3, 4, me mwirin pwóróusfengen wóón ei kapas eis:
-
Pwata ach silei pwe Jiowa epwe amóeló meinisin minne mi ngaw a oururukich?
En mi silei?
Atun Satan a eáni ewe áeúin kapas chofona, a pweni iten Jiowa. Weween a eitengawa Jiowa, ewe Sounemenem mi pwúng me tong. Lón mwachkkan, atun Jiowa epwe amóeló ekkewe riáfféú sia kúkkúna, i epwe eitéchúsefáli itan we. Weween, epwe ánneta pwe an nemenem a múrinné seni meinisin. Pinilóón iten Jiowa we, a fókkun aúchea seni meinisin lón láng me fénúfan.—Mateus 6:9, 10.
EKKÓCH RA ERÁ: “Letipen Kot pwe sipwe riáfféú.”
-
Met kopwe erá?
MENLAPAN
Satan ewe Tefil me popuch kewe, iir populapen minne mi ngaw wóón fénúfan. Jiowa a fókkun áfánni ach weires, me ekiseló chék epwe amóeló.
Enniwili
-
Ifa ewe kapas chofona Satan ewe Tefil a ereni Efa?
-
Ifa usun án Atam me Efa angangen ú ngeni Kot a kkúú aramas meinisin?
-
Ifa usun sia silei pwe Kot a áfánni ach kewe riáfféú?
PWAL EKKÓCH PWÓRÓUS
Ppii met weween tipis me ren ewe Paipel.
Álleani pwal ekkóch pwóróus usun met Satan ewe Tefil a eppiietá lón ewe tánipiin Eten.
“Why Does God Allow Suffering?” (The Watchtower, January 1, 2014)
Ppii pélúwen ei kapas eis mi weires, nge mi oururukich.
“Why Did the Holocaust Happen? Why Didn’t God Stop It?” (Web article)
Ppii met emén mwán a káé usun ekkewe riáfféú a kúkkúna.
