Haba don kano kano ka jingjia ba sniew, ki briew ki ju kylli: “Balei?” Katno ngi dap da ka jingkmen ba ka Baibl ka batai shai ïa ki jubab jong kata ka jingkylli!

1. Kumno u Soitan u la sdang ïa ka jingsniew ha ka pyrthei?

U Soitan u la ïaleh pyrshah ïa U Blei bad u kwah ban synshar halor baroh, te u la pynshoi ïa u Adam bad ka Im ban ïaleh pyrshah lang ïa U Blei. U Soitan u la leh ïa kane da kaba shukor ïa ka Im. (Jenesis 3:1-5) U la ong ba U Jehobah u buhrieh ïa ka jingshisha na ka, bad ba kin kham kmen lada kin ym kohnguh ïa U Blei. Ka jingshukor kaba nyngkong eh ka la wan na u Soitan da kaba ong ïa ka Im ba kan ym ïap. Na kata ka daw, ka Baibl ka khot ïa u Soitan “uba lamler bad u kpa ki jinglamler.”—Ïoannis 8:44.

2. Kaei kaba u Adam bad ka Im ki la jied ban leh?

U Jehobah u la ai shibun kiei kiei kiba bha ïa u Adam bad ka Im. U la ong ïa ki ba ki lah ban bam ïa ki jait soh baroh kiba don ha ka kper Eden lait noh tang na uwei u dieng. (Jenesis 2:15-17) Hynrei ki la rai ban bam ïa u soh na uta u dieng ba la mana. Ka Im ka la shim ïa u soh “bad ka la bam.” Nangta, u Adam “ruh u la bam” na uta u soh. (Jenesis 3:6) Baroh ar ngut ki la saitlah ïa U Blei. Namarba u Adam bad ka Im ki la long kiba janai, ka suk bha ïa ki ban leh ïa kaba dei. Hynrei ki la leh khnang ban ym kohnguh ïa U Blei, ki la leh pop bad ki la kyntait ïa ka jingsynshar jong u. Kata ka rai ba ki shim ka la wanrah ka jingjynjar kaba khraw ïa ki.—Jenesis 3:16-19.

3. Kumno ka rai jong u Adam bad ka Im ka la ktah ïa ngi?

Hadien ba u Adam bad ka Im ki la leh pop, kim long shuh kiba janai, bad kata ka la hiar pateng ha ki khun ki ksiew jong ki. Shaphang u Adam, ka Baibl ka ong: “Da uwei u briew ka pop ka la bsut sha ka pyrthei, bad da kata ka pop ka jingïap, bad kumta kata ka jingïap ka la wan hap ha ki bynriew baroh phar.”—Rom 5:12.

Don shibun ki daw ba balei ngi jynjar. Teng teng ngi jynjar namar ngi shim ïa ki rai kiba bakla. Don pat ki por ba ngi jynjar na ka daw jong kiwei. Bad teng teng pat na ka daw jong ki jingjia ryngkhat.—Pule Ekklesiastis 9:11.

 WAD SHUH SHUH

4. Ïano ngin kynnoh haba ngi mad ki jingjynjar?

Bun ki briew ki ngeit ba dei U Blei uba synshar ïa ka pyrthei. Hynrei, hato kata ka dei shisha? Peit ïa ka VIDEO.

Pule Jakob 1:13 bad 1 Ïoannis 5:19, bad nangta sa ïa peit lang ïa kane ka jingkylli harum: 

• Hato ki jingsniew bad ki jingjynjar ki wan na U Blei?

5. Kaei kaba la jia naduh ba synshar u Soitan?

1. U Adam bad ka Im ki la long kiba janai bad ki la im ha ka Paradais. Hynrei ki la sngap ïa u Soitan bad ki la ïaleh pyrshah ïa U Jehobah

2. Hadien ba ki la ïaleh pyrshah ïa U Jehobah, ka pyrthei ka la dap da ka pop, ka jingjynjar, bad ka jingïap

3. U Jehobah un pynduh noh ïa ka pop, ka jingjynjar bad ka jingïap. Sa shisien pat, ki briew kin long kiba janai bad kin im ha ka Paradais ha pyrthei

 6. U Jehobah u phikir ïa ngi

Hato U Blei u phikir ïa ngi haba ngi jynjar? Peit aïu u Syiem Dabid bad u apostol Petros ki la thoh. Pule Salm 31:7 bad 1 Petros 5:7, bad nangta sa ïa peit lang ïa kane ka jingkylli harum:

• Kumno phi sngew haba phi tip ba U Jehobah u ïohi bad u phikir ïa ngi haba ngi jynjar?

 KI MAT BAKONGSAN

Ki jingsniew ha ka pyrthei ki dei na ka daw jong u Soitan bad jong u Adam bad ka Im. U Jehobah u ieid bha ïa ngi, na kata ka daw shen un sa weng noh ïa baroh ki jingjynjar jong ngi.

Peit Biang

• Kumno u Soitan u la shukor ïa ka Im?

• Kumno ka jingbym kohnguh jong u Adam bad ka Im ka la ktah ïa ngi baroh?

• Kumno ngi tip ba U Jehobah u phikir ïa ngi haba ngi jynjar?