CHILONGESA 26
Mwomwo Ika Kwapwila Vyuma Vyavipi naKuyanda?
Nge kunasoloka vyuma vyavipi, vatu veji kuhulisanga ngwavo, “Mwomwo ika vinasolokela?” Twawahilila hakuwana nge Mbimbiliya yakumbulula chihula kana.
1. Chuma muka alingile Satana numba vyuma vyavipi viputuke kusoloka?
Satana Liyavolo alikangile kuli Kalunga. Asakile kupwa nangolo jakuyula, ngocho ahungumwishile Alama naEve, vatu vatete mangana navakiko valikange kuli Kalunga. Alingile ngocho hakwonga Eve. (Kuputuka 3:1-5) Amulingishile ashinganyeke ngwenyi Yehova amuswekelelele vyuma vyamwaza. Chapwile kwijiva nge ali nakwamba ngwenyi, vatu navapwa vakuwahilila chikuma nge navalikanga kuli Kalunga. Satana ahanjikile makuli atete hakulweza Eve ngwenyi keshi kufwako. Echi chikiko Mbimbiliya yavulukila Satana ngwayo, “muka-makuli, kaha nawa ise yamakuli.”—Yowano 8:44.
2. Alama naEve vasakwile kulinga ika?
Yehova ahanyine Alama naEve vyuma vyosena vapwile nakusakiwa. Avalwezele ngwenyi vanahase kulya kumitondo yosena yapwile mumilemba yaEtene, kufumisaho kaha mutondo umwe. (Kuputuka 2:15-17) Oloze vakiko valile kumutondo uze avakanyishile. Eve “aheleleko kumihako yawo, alile.” Kufumaho naAlama nawa alile. (Kuputuka 3:6) Vosena vavali valikangile kuli Kalunga. Hakuwana nge Alama naEve vapwile vakukupuka, ngocho kavapwile navishinganyeka vyakusaka kulinga vyuma vyavipiko. Oloze vasakwile kulikanga kuli Kalunga. Echi chapwile kulinga shili nakukana kuvatwaminyina kuli ikiye. Chuma vasakwile kulinga chavanehelele ukalu.—Kuputuka 3:16-19.
3. Uno chuma alingile Alama naEve chaneha ika hali etu?
Omu Alama naEve valingile shili, kavapwile cheka vakukupukako. Kaha navana vasemene kavapwile vakukupukako. Mbimbiliya yahanjika hali Alama ngwayo: “Nge muze shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena.”—Wavaka-Loma 5:12.
Tweji kuyandanga mwomwo yavyuma vyakulisezaseza. Lwola lumwe tweji kuyandanga mwomwo yavyuma vyavipi tweji kusakulanga kulinga. Lwola lukwavo nawa tweji kuyandanga mwomwo yavyuma vyavipi veji kusakulanga kulinga vakwetu. Kaha nawa tweji kuyandanga mwomwo yavyuma vyakwiza mukukasumuna.—Tanga Muka-kwambulula 9:11.
LINANGULE VYAKUJIMINYINA
Wana ovyo katwatela kuhanyina Kalunga mulonga havyuma vyavipi nakuyanda chili mukayeko. Wana nawa omwo eji kwivwanga nge tuli nakuyanda.
4. Owo atulingisa tuyande
Vatu vavavulu vafwelela ngwavo Kalunga ikiye ali nakuyula kaye kosena. Uno omu mukiko tahi? Talenu VINDIYO.
Tangenu WaYakova 1:13 naWaYowano 1, 5:19, nakushimutwila hachihula chino:
-
Uno Kalunga ikiye alingisa kupwenga kuyanda navyuma vyavipi tahi?
5. Vyuma chaneha chiyulo chaSatana
Tangenu Kuputuka 3:1-6, nakushimutwila havihula vino:
-
Makuli muka ahanjikile Satana?—Tala vesi 4 na 5.
-
Mazu muka amakuli ahanjikile Satana aze asolwele nge Yehova apwile nakuswekela vatu vyuma vyamwaza?
-
Mazu muka amakuli ahanjikile Satana aze asolwele nge vatu vanahase kupwa vakuwahilila chakuzeneka kuvatwaminyina kuli Yehova?
Tangenu Muka-kwambulula 8:9, nakushimutwila hachihula chino:
-
Vyuma vili ngachilihi hakuwana nge Yehova keshi ikiye ali nakuyula kano kayeko?
-
Alama naEve vapwile vakukupuka kaha vatwaminenga muPalachise. Oloze vevwililile Satana nakulikanga kuli Yehova
-
Hanyima yakulikanga, mukaye mwazala jino shili, nakuyanda nakufwa
-
Yehova mwakafumisako shili nakuyanda nakufwa. Muyachi wamutu naukapwa cheka wakukupuka nakukayoyela muPalachise
6. Yehova kasaka tuyandeko
Uno Kalunga eji kwivwanga ngachilihi hakumona tuli nakuyanda? Wana vyuma asonekele Mwangana Ndavichi nakaposetolo Petulu. Tangenu Samu 31:7 naWaPetulu 1, 5:7, nakushimutwila hachihula chino:
-
Uno uli nakwivwa ngachilihi hakutachikiza ngwove Yehova eji kutumonanga nakutuzakama nge tuli nakuyanda?
7. Kalunga mwakafumisako kuyanda chosena
Tangenu Isaya 65:17 naKusoloka 21:3, 4, nakushimutwila hachihula chino:
-
Uno kutachikiza ngwove Yehova mwakafumisako vyuma vyavipi vyosena vize vali nakumona vatu chinakuvendejeka ngachilihi?
Uno watachikiza tahi?
Satana avangijikilile Yehova omu ahanjikile makuli atete. Amupihishile lijina ngwenyi kapwa Muka-kuyula wamwaza, wazangiko. Yehova mwakahakwila lijina lyenyi omu mwakafumisako kuyanda chosena. Mujila yikwavo mwakasolola ngwenyi chiyulo chenyi chikiko kaha chapwa chamwenemwene. Chihande chakuhakwila lijina lyaYehova chapwa chachilemu mwilu nahamavu.—Mateu 6:9, 10.
VATU VAMWE NGWAVO: “Kalunga ikiye ajina ngwenyi tuyandenga.”
-
Nyi ove ngwove ika?
CHISHINA UNALINANGULA
Satana Liyavolo navatu vavali vatete vakiko valingishile kupwenga vyuma vyavipi muno mukaye. Yehova eji kutuzakamanga nge tuli nakuyanda, kaha nawa kalinwomu achifumiseko.
Kuhituluka
-
Makuli muka ahanjikile Satana Liyavolo kuli Eve?
-
Kulikanga chaAlama naEve chaneha ika hali yetu vatu?
-
Twatachikiza ngachilihi ngwetu Yehova eji kutuzakamanga nge tuli nakuyanda?
WANA VYAVIVULU
Wana omwo Mbimbiliya yalumbununa lizu shili.
Tanga vyavivulu hachihande akatwile Satana Liyavolo mumilemba yaEtene.
“Mwomwo Ika Kalunga Etavishila Kuyanda?” (Kaposhi Kakutalila, April 1, 2014)
Wana jila yamwaza vakumbulwilamo chihula chachikalu.
“Mwomwo ika Kwapwilile Jita Yakujiha vaYuleya Vavavulu muChiyulo chaNazi muGermany? Mwomwo Ika Kalunga Azenekele Kuhonesa Jita Kana?” (Chihande chili ha jw.org/lue)
Wana vyuma alinangwile lunga umwe kutalisa kuvyuma vyavipi amwenenga.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
