Ойго годым еҥ-влак чӱчкыдын йодыт: «Молан тыге лийын?» Библий тиде йодышлан раш вашмутым пуа, да вашмутшо мемнам чот лыпландара.

1. Сатаналан кӧра осал кузе тӱняшке пурен?

Сатана Диавол Юмо ваштареш шогалын. Тудо весе-влакым вуйлатынеже ыле, сандене икымше еҥ-влакым, Адам ден Евам, Юмо ваштареш шогалаш таратен. Тидлан Сатана нуным ондален (Тӱҥалтыш 3:1—5). Тудо Евам шонаш таратен, пуйто Иегова тудын деч ала-мом сайым шылта. Сатана теве мом каласынеже ыле: еҥ-влак, Юмым колыштмым чарнат гын, пиаланрак лийыт. Тудо икымше гана шояклен тунам, кунам Евалан тудо огеш коло манын каласен. Сандене Библийыште Сатанам «шояче да шоякын ачаже» манме (Иоаннын 8:44).

2. Адам ден Ева мом ойырен налыныт?

Иегова Адам да Ева дене чот поро лийын. Нуно Эдем садыште чыла пушеҥге гыч саскам кочкын кертыныт, но тудын кӱштымыжӧ почеш ик пушеҥге гыч веле саскам кочкаш ок йӧрӧ ыле (Тӱҥалтыш 2:15—17). Нуно Юмын кӱштымыжым шотыш налын огытыл да чарыме пушеҥге гыч саскам кочкыныт. Ева «саскам кӱрлын налын да кочкын». Вара тиде пушеҥге гыч саскам Адамжат кочкын (Тӱҥалтыш 3:6). Нуно коктынат Юмым колыштын огытыл. Адам ден Ева языкдыме лийыныт, сандене чын ышташ нунылан куштылго лийын. Но нуно, Юмын кӱштымыжым пален, тудын ваштареш шогалыныт. Нуно языкым ыштеныт да тыге теве мом ончыктеныт: ындыжым нунын Юмын шонымыжым шотыш налмышт ок шу. Тыгай решенийышт илышыштлан ойгым гына конден (Тӱҥалтыш 3:16—19).

3. Адам ден Еван решенийышт мыланна мом конден?

Языкым ыштымеке, Адам ден Ева языкан лийыныт. Вара нунын языкышт уло тукымыштланат куснен. Библийыште возымо дене келшышын, Адам гоч язык «тӱняшке толын‚ а язык гоч — колымаш‚ да чыла айдемым колымаш авалтен» (Римлян-влаклан 5:12).

Еҥ-влак тӱрлӧ амаллан кӧра орланат. Южгунам ме шкенан йоҥылышна верч орланена. Южо годым — весе-влакын йоҥылышт верч. Тыгак ме вучыдымо случай верч орланен кертына. (Экклезиаст 9:11 лудын лекса.)

 КЕЛГЫНРАК ШЫМЛЕН НАЛЗА

4. Молан еҥ-влак чынжымак орланат

Шукышт тӱням Юмо вуйлата манын ӱшанат. Но тиде чын мо? ВИДЕОРОЛИКЫМ ончалза.

Иаковын 1:13 да 1 Иоаннын 5:19 лудын лекса да вашмутым пуыза:

• Еҥ-влак Юмылан кӧра орланат мо?

5. Мом Сатанан вуйлатымыже конден

1. А. Адам ден Ева языкдыме лийыныт да райыште иленыт. Но нуно Сатанан мутшылан ӱшаненыт да Иегова деч кораҥыныт

2.  Б. Юмо ваштареш шогалмылан кӧра тӱняшке язык, орланымаш да колымаш пуреныт

3. В. Иегова языкым, орланымашым да колымашым пытара. Еҥ-влак язык деч утлат да угыч райыште илаш тӱҥалыт

6. Мемнан орланымашна Иегован шӱм-чонжым корштыктара

Орланымашна Юмылан садиктак мо? Ончалза, мом Давид кугыжа да апостол Петр каласеныт. Псалом 30:8 да 1 Петрын 5:7 лудын лекса да вашмутым пуыза:

• Кунам мыланна йӧсӧ, Иегова тидым ужеш да мемнам чот чамана. Тидым палымеке, могай шижмашда лектеш?

 ТӰҤ ШОНЫМАШ

Сатана Диавол да Адам ден Евалан кӧра мланде осал дене темын. Кунам мыланна йӧсӧ, Иегован шӱм-чонжо коршта. Вашке Иегова чыла орланымашым пытара.

Ушештарымаш

• Могай шоякым Сатана Диавол Евалан каласен?

• Адам ден Еван Юмо ваштареш шогалмышт мом конден?

• Мемнан орланымашна Иегован шӱм-чонжым корштыктара манын, кушеч ме палена?