LECCIÓN 26
¿Imaraykú sajra imas tiyan, chanta imaraykú sufrinchej?
Mayta sufrispaqa ninchej: “¿Imaraykutaj kay jinapi rikukuniri?”, nispa. Bibliaqa imaraykuchus sufrisqanchejta willawanchej.
1. Kay mundopi sajra imas kananpaj, ¿imatá Satanás ruwarqa?
Satanasqa Diospa contranpi oqharikorqa. Chantapis payqa waj runasta kamachiyta munarqa. Chayrayku Adantawan Evatawan pantacherqa, munarqa paykunapis Diospa contranpi sayaykunankuta (Génesis 3:1-5). Llullakuspa paykunata creecherqa Diosqa allin kajmanta jarkʼashasqanta, mana cheqan kajtachu imatapis ruwasqanta, Diosta mana kasukuspalla kusisqa kausakuyta atisqankuta, mana wañunankuta ima. Chayrayku Satanasmanta Biblia nin: “Payqa llulla, llullakuypa tatantaj”, nispa (Juan 8:44).
2. ¿Imatataj Adanwan Evawan ruwarqanku?
Adanwan Evawanqa Diosta mana kasukorqankuchu, juchallikorqanku, niñataj Jehovata kamachejninkuta jinachu qhawarqanku. Chayrayku llakiypi rikukorqanku (Génesis 3:16-19). Jehovaqa paykunawan kʼacha kasqanrayku nerqa: ‘Huertapi kaj tukuynin sachʼasmanta mikhullankichej, ujllamanta mana’, nispa (Génesis 2:15-17). Jinapis Evaqa ‘chay sachʼaj poqoyninta pʼitispa mikhuykorqa, qosanpis mikhuykullarqataj’ (Génesis 3:6). Jehovaqa Adantawan Evatawan mana juchayojta ruwarqa. Paykunaqa Jehovata kasukuyta ajllayta aterqanku.
3. ¿Imaspitaj rikukunchej Adanwan Evawan mana kasukusqankurayku?
Adanwan Evawanqa Diosta mana kasukusqankurayku juchasapa runasman tukorqanku. Chay juchatataj wawasninkumanpis herenciata jina saqerqanku. Adanmanta parlaspa Biblia nin: “Uj runanejta jucha kay mundoman yaykumorqa, juchanejtataj wañuy yaykumorqa. Ajinamanta wañoyqa tukuy runasman chayarqa”, nispa (Romanos 5:12).
¿Imaraykutaj sufrinchej? Wakin kutis sufrinchej kausayninchejpi mana allin imasta ajllasqanchejrayku, waj runas mana allin imasta ajllasqankurayku. Wakin kutistaj mana yuyasqallamanta ima llakiypis kajtin sufrinchej (Eclesiastés 9:11 leey).
ASTAWAN YACHAKUNA
Kaypi yachakusun mana Dioschu juchayoj kasqanta sajra imas kananpaj, runas sufrinankupaj ima. Yachakullasuntaj sufrejtinchej Jehová mayta llakikusqanta.
4. ¿Pitaj juchayoj runas ñakʼarinankupaj?
Ashkha runas yuyanku Dios kay mundota kamachishasqanta. Ajinachus manachus kasqanta yachanapaj VIDEOTA qhawariychej.
Santiago 1:13; 1 Juan 5:19 leeriychej, chantá yachakojta tapuriy:
-
¿Jehová Dioschu juchayoj kasqa sajra imas kananpaj, sufrinapaj ima?
5. Satanás kamachishasqanrayku llakiykuna tiyan
Génesis 3:1-6 leeriychej, chantá yachakojta tapuriy:
-
¿Imatataj Satanás llullakuspa Adanmanwan Evamanwan nisqa? (4, 5 versiculosta qhawariy).
-
Jehová allin imasmanta jarkʼashasqanta creechinanpaj, ¿imatataj Satanás Evaman nisqa?
-
Satanasqa nin Diosta mana kasukuspa kusisqa kausakunanchejta, ¿ajinapunichu kanman?
Eclesiastés 8:9 leeriychej, chantá yachakojta tapuriy:
-
Runaspuralla kamachinakusqankurayku, ¿imaynataj kausay?
-
Adanwan Evawanqa mana juchayoj karqanku, uj kʼachitu huertapitaj tiyakorqanku. Jinapis Diosta kasukunankumantaqa Satanasta kasorqanku.
-
Adanwan Evawan juchallikusqankurayku tukuyninchej juchayoj kanchej, sufrinchej, wañunchejtaj.
-
Runasqa mana juchayojman tukusunchej, wiñaypajtaj uj kʼacha paraisopi kausakusunchej. Imaraykuchus Jehová Diosqa tumpamantawan juchata, llakiykunata, wañuytapis chinkachenqa.
6. Jehová Diosqa sufrejtinchej llakikun
Jehová Diosqa sufrejta rikuwanchej chayqa llakikun. Chayta yachanchej rey David, apóstol Pedropis imatachus nisqankupi. Salmo 31:7; 1 Pedro 5:7 leeriychej, chantá yachakojta tapuriy:
-
Jehová Dios sufrejta rikuwanchej chay, ¿noqanchejmanta llakikunchu? ¿Chayta yachay sonqochawasunmanchu?
7. Diosqa tukuy llakiykunata chinkachenqa
Isaías 65:17; Apocalipsis 21:3, 4 leeriychej, chantá yachakojta tapuriy:
-
Kay leerisqanchejman jina, ¿imastaj mana kanqañachu? ¿Chayta yachay kusichisunkichu?
Astawan yachanaykipaj
Satanasqa Jehovamanta llulla imasta parlarqa. Chayta nispaqa Diosta sajrapaj qhawacherqa. Payqa nisharqa Diosninchej mana cheqantachu ruwasqanta, nitaj sumaj kamachejchu kasqanta. Jehovaqa pisimantawan tukuy llakiykunata chinkachenqa. Chantapis Satanás llulla kasqanta rikuchenqa, ajinamantataj sutinta jatunchanqa, nisunman paylla sumaj kamachej kasqanta rikuchenqa. Chantapis tukuy yachanqanku mana Satanás nisqanman jinachu kasqanta. Ajinamanta sutinta jatunchanqa (Mateo 6:9, 10).
WAKIN RUNAS NINKU: “Runasqa unaymantañapuni sufrinchej, sufrillasunpunitaj. Diosqa ajinamanta pruebaman churashawanchej”, nispa.
-
¿Ajinachu kanman, imatá qan niwaj?
¿IMASTÁ YACHAKUNCHEJ?
Kaypi yachakunchej Satanaswan, Adanwan, Evawan ima, llakiypi kanapaj juchayoj kasqankuta. Yachakullanchejtaj Jehovaqa sufrejtinchej llakikusqanta, tumpamantawantaj llakiykunata chinkachinanta.
Yuyarikunapaj
-
¿Imatataj Satanás, Evaman llullakuspa nerqa?
-
Adanwan Evawan mana kasukusqankurayku, ¿imaspitaj rikukunchej?
-
¿Jehová Dios llakikojchu kasqa sufrejtinchej? ¿Imaynapí chayta yachanchej?
ASTAWAN YACHAKUNAYKIPAJ
¿Biblia sutʼinchanchu imachus jucha kasqanta? Chayta yachanaykipaj kayta leeriy.
“¿Imataj jucha?” (Chaytaqa Internetpi jw.org nisqapi tarinki)
Edén huertapi, ¿imatataj Satanás Evaman nerqa? Chayta yachanaykipaj kayta leeriy.
“¿Imaraykú Dios ñakʼariy kananta saqen?” (Torremanta Qhawaj, 1 de enero de 2014)
¿Imaraykuchus sufrisqanchejta yachay sonqochawasunmanchu? Chayta yachanaykipaj kayta leeriy.
Uj runaqa juchʼuymantapacha sufrerqa. Paymanta yachanaykipaj kay videota qhawariy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
