Ashca turmintuguna tiacta ricusha, runaguna tapurinaun: “Imahuata casna turmintarisha causanchi”. Bibliaga caimanda pasacta yachachin.

1. Supaiga cai munduibi turmintuguna tiachun nisha imatata rara

Supai Satanasca, Diospa contra tucura. Paiga, shuccunata mandanata munashami, Adanda Evatahuas pandachira, paiguna Diospa contra tucunauchun nisha. Pai munashcata rangahua Evata llullara (Genesis 3:1-5). Jehovami cangunata ali cosascunata mana cunata munan nisha quirichira. Diosta mana casushaga, mas cushimi causanguichi nira. Satanasca, Evata mana huañunguichu nisha, pundami llullaura. Chiraicu, Bibliaga nin, “paimandami, llullaga callarira, cunangama paiga llulla man” (Juan 8:44).

2. Adan y Eva imatata ranaura

Jehovaga, ali shunguyuc ashcamanda, Adanda Evata ashcata cumbirara. Jardin de Edenbi tiac ruyagunamandami, micunalla manguichi nira. Chasna acpihuas, shuc ruyamandalla ama micunguichichu nira (Genesis 2:15-17). Diosta casuna randiga, chi ruyamandallatami micunaura. Evaga, “chi muyuta apishami, micungahua callarira”. Huasha, Adanbas “chi muyuta micura” (Genesis 3:6). Chita rasha, ishcandi Diosta mana casunaura. Adan y Evaga ucha illac ashami, alita rasha Diosta tucuibi casuna anaura. Chasna ashahuas, paiguna munashcata rasha, Diosta mana casunaura. Uchaibi urmasha, Dios mandanamanda caruyanaura. Paiguna chasna rashcamandami, ashcata turmintarinaura (Genesis 3:16-19).

3. Adan y Eva, Diosta mana casushcamanda imasata causaunchi

Adan y Eva Diosta mana casushcamanda, uchayuc tucunaura. Huasha, paigunamanda miraigunahuas uchayuc tucunaura. Adanmanda, Bibliaga caitami nin: “Callari uras cai pachama uchaga shuc runamandallami shamura, chi uchamanda huañunahuas callarira. Chi urasmanda cunangama tucui runaguna uchata rashcamanda huañunchi” (Romanos 5:12).

Chasna ashaga, imahuata turmintarinchi. Imasaibiga, mana aligunatachu ranchi. Chasnallata, shuccuna mana alita rashcamanda turmintarinchi. Chimandas, shuc uras ima tucunata mana yachashcamanda, imasaibi cungaimanda susirisha turmintarinchi (Santiago 4:13, 14​ta leipai).

 CAIMANDA MASTA YACHAI

4. Ñucanchi turmintarishcamanda pita culpata charin

Ashca runaguna casna yuyanaun: Diosmi cai munduta mandaun nisha. Chiga sirtu chan. VIDEOTA ricuichi.

Lamentaciones 3:33 y 1 Juan 5:19​ta leichi, huasha cai tapuimanda cuintanacuichi:

• Turmintuguna tiashcamanda Dioschu culpayuc an.

5. Supai cai munduta mandashcamanda runaguna imashinata causanaun

1. Adan y Evaga ucha illac ashami, Jardin de Edenbi causanaura. Chasna ashahuas, Supai nishcata casusha, Jehovahua contra tucunaura.

2.   Adan y Eva Dios nishcata mana casushcamanda, uchaga cai munduma yaicura. Chi uchamanda, turmintarisha huañuna callarira.

3. Jehovaga, uchata, turmintarinata, huañunata tucuchinga. Runagunaga ucha illac tucusha, gustu Paraiso Allpaibi causangauna.

6. Jehovaga ñucanchi turmintarishcata ricusha yapacta llaquirin

Jehovaga ñucanchi llaquirishcata ricusha, manachu llaquirin. Rey David y Apostol Pablo quillcashcata ricuichi. Salmo 31:7 y 2 Corintios 1:3​ta leichi, huasha cai tapuimanda cuintanacuichi:

• Jehova ñucanchi turmintarishcata ricusha yapacta llaquirin. Chita yachashaga imashinata sintiringui.

 IMATA YACHASHCANGUI

Supai, Adan, Evaga mundu intiruibi turmintu causai tiashcamanda culpayuc manaun. Jehovaga ñucanchi turmintarishcata ricusha yapacta llaquirin. Ñallami turmintarinata tucuchinga.

Yachashcata cuintai

• Supaiga Evata ima llullatata nira.

• Adan y Eva Dios nishcata mana casushcamanda, imashinata causaunchi.

• Imahuata Jehova ñucanchi turmintarishcata ricusha llaquirin ninchi.