“Manino ro nisy an’iny?” Zay matetiky ro fanontanea apetrakin’olo lafa misy loza miseho. Mamaly mazava ani-fanontanea io ty Baiboly, le mahafalifaly antsika raha zay!

1. Ino ty nataoni-Satana ka nahavy ty raha raty hisy?

Nanohitsy a-Ndranahary, Satana Devoly. Ta ho mpanday ie, ka nitarihiny hanohitsy manahaky azy Adama noho Eva. Nitariky an-drozy Satana lafa navandy tamy Eva. (Genesisy 3:1-5) Nataony ze hahavy ani-Eva hieritseritsy hoe misy raha soa tokony ho azon-drozy fe tsy ameani-Jehovah. Sahala ta hivola ie hoe ho sambatsy marerè ty olombelo laha tsy manoriky ty safà-Ndranahary. Nivola tamy Eva, Satana fa tsy ho maty zao rozy. Io ty vandy voalohany marè. Zay ro mahavy ty Baiboly mikaiky ani-Satana hoe “mpavandy sady babani-vandy.”​—Jaona 8:44.

2. Nifily hanao ino Adama noho Eva?

Nameani-Jehovah raha maro Adama noho Eva. Nivola ie hoe azon-drozy hany iaby ty voani-hazo tamy zaridainani-Edena tao, laha tsy raiky zay avao. (Genesisy 2:15-17) Fe nihinanan-drozy avao voani-hazo nandrarà an-drozy iny. Eva tse ty “nangalaky noho nihina azy.” Bakeo “nihina” koa Adama. (Genesisy 3:6) Samby tsy nanoriky ty safà-Ndranahary rozy roe. Lavorary rozy ka tokony ho mora amin-drozy ty manao raha mahity. Fe sitrapon-drozy ro tsy nanoriky ty safà-Ndranahary, le nanota sady nandà ty fandaisany rozy. Nahavy fijalea ho an-drozy raha nataon-drozy zay.​—Genesisy 3:16-19.

3. Misy vokany amintsika va ty raha nataoni-Adama noho Eva?

Tsy lavorary sasy Adama noho Eva lafa nanota, le nifindra tamy ty taranakin-drozy koa tsy fahalavoraria zay. Ho zao ty nivolanini-Baiboly mikasiky ani-Adama: “Baka amin’olo raiky [ro nilirani-ota] ho amy zao tontolo zao, le baka amy ota ro nilirani-fahafatesa, ka niparitaky tamin’olo iaby ty fahafatesa.”​—Romanina 5:12.

Maro ty antony mahavy antsika hijaly. Kindraiky ty fanapahan-kevitsy raty nataontsika avao ro manday fijalea ho antsika. Mety ho fanapahan-kevitsy raty nataon’olo hafa koa ro hahavy antsika hijaly. Na mety hijaly tsika satria tratsini-loza tsy nampoizy.​—Vakio Mpitoriteny 9:11.

 DINIHO LALIKY

4. Baka amin’ia ro mahavy antsika hijaly?

Mieritseritsy ty ankamaroan’olo hoe Ndranahary ro mifehy ani-zao tontolo zao. Marina va zay? Alefaso VIDEO io.

Vakio Jakoba 1:13 noho 1 Jaona 5:19, bakeo iaraho midiniky fanontanea toy:

• Ndranahary va ro mahavy ty raha raty noho ty fijalea?

5. Ino ty niseho lafa Satana ro nanday?

1. A. Lavorary Adama noho Eva sady nipetraky tamy Paradisa ao. Fe nijanjy ty safàni-Satana rozy sady nanohitsy ani-Jehovah

2.  B. Tafarani-fanohera natao ani-Jehovah iny, le nanjary mpanota ty olo, nijaly noho maty

3. D. Horavàni-Jehovah ty ota, ty fijalea, noho ty fahafatesa. Ho lavorary ndraiky ty olo sady hipetraky amy Paradisa

6. Malahelo Jehovah mahita antsika mijaly

Tsy midary ty fijaleantsika va Ndranahary? Henteo ty raha nisoratini-Davida Mpanjaka noho apostoly Petera. Vakio Salamo 31:7 noho 1 Petera 5:7, bakeo iaraho midiniky fanontanea toy:

• Ino ty tsapanao lafa mahay hoe mahita noho midary ty fijaleantsika Ndranahary?

 FAMINTINA

Ty raha nataoni-Satana Devoly noho Adama noho Eva ro nahavy ty raha raty hisy. Tena midary ty fijaleantsika Jehovah sady horavàny raha zay tsy ho ela.

Famerena

• Ino ty vandy nivolanini-Satana Devoly tamy Eva?

• Tsy nanoriky ty safàni-Jehovah, Adama noho Eva. Ino ty vokatsini-raha zay tamin’olombelo iaby?

• Ino ty ahaizantsika hoe midary ty fijaleantsika Jehovah?