WEKELO 26
Lande na kele awui wa kɔlɔ ndo asui?
“Lande na?” Bu kɔlɔ ndjaoka dimbola sɔ etena katomba mpokoso kɛmɔtshi. Tekɔ mɛtɛ l’ɔngɛnɔngɛnɔ dia mbeya dia Bible mbishaka ekadimwelo wokɛma hwe lo dimbola sɔ!
1. Ngande wakɔtshiya Satana awui wa kɔlɔ l’andja?
Satana Diabolo akatɔmbɔkwɛ Nzambi. Satana akalange nɔmbɔla anto akina, diakɔ diakandatshutshuya anto wa ntondo, Adama l’Eva dia vɔ ntɔmbɔkɔ oko nde. Satana akasale dui sɔ lo nkesa Eva. (Etatelo 3:1-5) Nde akokonya dia mfɔnya ɔnɛ Jehowa ekɔ lo mbodima ɛngɔ kɛmɔtshi ka dimɛna. Nde akate di’anto wayonga l’ɔngɛnɔngɛnɔ w’efula kaanga hawokitanyiyisha Nzambi. Satana akatɛ Eva kashi ka ntondo k’ɔnɛ nde hatovɔ. Diakɔ dielɛ Bible Satana ɔnɛ: “Kanga kashi ndo she kashi.”—Joani 8:44.
2. Kakɔna kakasɔnɛ Adama l’Eva dia nsala?
Jehowa aki la lokaho l’efula otsha le Adama l’Eva. Nde akate dia vɔ wakakoke ndɛ elowa w’oma l’esongo tshɛ wa l’ekambɔ k’Ɛdɛna, onyake elowa w’oma l’osongo ɔtɔi. (Etatelo 2:15-17) Kaanga mbakandaashimbe dui sɔ, vɔ wakɔshi yɛdikɔ ya ndɛ olowa w’oma l’osongo ɔsɔ. Eva “akatatɛ nkɔhɔla olowa w’oma lɔkɔ ko akatatɛ ndɛ.” L’ɔkɔngɔ diko, Adama ‘akatatɛ ndɛ olowa akɔ.’ (Etatelo 3:6) Vɔ akɔ ahende wakahindolɛ Nzambi. Lam’ele Adama l’Eva waki kokele, vɔ komonga l’okakatanu dia nsala kɛnɛ kele ɔlɔlɔ. Ɔnkɔnɛ, lo mpindolɛ Nzambi l’okonda tshɛ, vɔ wakasale pɛkato ndo wakatone ɛlɔmbwɛlɔ kande. Yɛdikɔ shɔ yakawaela asui efula.—Etatelo 3:16-19.
3. Shɛngiya yakɔna yele la yɛdikɔ yakɔshi Adama l’Eva le so?
Etena kakasale Adama l’Eva pɛkato, vɔ wakakome ekokele, ndo vɔ wakasambiyɛ anawɔ tshɛ ekokele. Lo dikambo di’Adama, Bible mbutaka ɔnɛ: “Pɛkato [kakɔtɔ] l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ.”—Rɔmɔ 5:12.
Tekɔ lo nsowa l’ɔtɛ w’ɛkɔkɔ wotshikitanyi. Ntena dimɔtshi sho sowaka l’ɔtɛ wa tɛdikɔ ta kɔlɔ tɔsaso. Ntena dikina sho sowaka l’ɔtɛ wa tɛdikɔ ta kɔlɔ tɔsa anto akina. Ntena dikina nto, sho sowaka l’ɔtɛ weso lo dihole dia kɔlɔ ndo l’etena ka kɔlɔ.—Adia Ondaki 9:11.
NYOMOTSHIMOLA
Tende lande na kataso dia Nzambi bu lo kiɔkɔ y’akambo wa kɔlɔ ndo y’asui wɛnaso l’andja ɛlɔ kɛnɛ ndo woho wayaokande etena kasowaso.
4. Ɔnɛ lele lo kiɔkɔ y’asui aso
Anto efula fɔnyaka dia Nzambi mbalɔmbɔla andja ɔnɛ. Onde dui sɔ diekɔ mɛtɛ? Nyende VIDƐO.
Nyadia Jakɔba 1:13 ndo 1 Joani 5:19, ndo oma laasɔ, nyɔkɛtshanya dimbola nɛ:
-
Onde Nzambi mbele lo kiɔkɔ y’asui ndo y’awui wa kɔlɔ?
5. Tɔsɛdingole etombelo w’oma l’ɛlɔmbwɛlɔ kaki Satana
Nyadia Etatelo 3:1-6, ndo oma laasɔ, nyɔkɛtshanya ambola anɛ:
-
Kashi kakɔna kakate Satana?—Enda divɛsa 4 ndo 5.
-
Ngande wakɛnya Satana diele oko Jehowa ekɔ lo dima anto ɛngɔ kɛmɔtshi ka dimɛna?
-
Lo ndjela Satana, onde anto wekɔ l’ohomba wa Jehowa monga Ɔnɔmbɔdi awɔ dia vɔ monga l’ɔngɛnɔngɛnɔ?
Nyadia Ondaki 8:9, ndo oma laasɔ, nyɔkɛtshanya dimbola nɛ:
-
Kakɔna kɛnaso lam’ele aha Jehowa mbalɔmbɔla andja ɔnɛ?
-
Adama l’Eva waki kokele ndo wakasɛnaka lo Paradiso. Koko vɔ wakahokamɛ Satana ndo wakatɔmbɔkwɛ Jehowa
-
L’ɔkɔngɔ w’ɔtɔmbɔkwɛlɔ awɔ, andja wakalole tɔɔ la pɛkato, l’asui ndo la nyɔi
-
Jehowa ayonya pɛkato, asui ndo nyɔi. Anto wayonga nto kokele ndo wayɔsɛna lo Paradiso
6. Jehowa ndjakiyanyaka dikambo di’asui aso
Onde Nzambi handje yimba l’asui aso? Tende kɛnɛ kakafunde nkumekanga Davidɛ nde l’ɔpɔstɔlɔ Petero. Nyadia Osambo 31:7 ndo 1 Petero 5:7, ndo oma laasɔ, nyɔkɛtshanya dimbola nɛ:
-
Ngande wayaokayɛ lo mbeya dia Jehowa mɛnaka ndo ndjakiyanyaka dikambo di’asui aso?
7. Nzambi ayokomiya asui tshɛ wɛna anto
Nyadia Isaya 65:17 ndo Ɛnyɛlɔ 21:3, 4, ndo oma laasɔ, nyɔkɛtshanya dimbola nɛ:
-
Lande na kele ekɔ dui di’ekeketshelo dia mbeya ɔnɛ Jehowa ayonya etombelo w’oma l’awui wa kɔlɔ tshɛ wadiɛnɛ anto?
Onde wɛ akeyaka?
Etena kakate Satana kashi ka ntondo, nde akamamatanyɛ Jehowa akambo. Mbuta ate, nde akalanya lokumu la Jehowa lendana la woho wende Ɔnɔmbɔdi w’ɔlɔlɔ ndo wa ngandji. Keem’edja, etena kayanga minya Jehowa asui w’anto, nde ayoyindja lokombo lande. L’ɛtɛkɛta ekina, nde ayɛnya dia ɛlɔmbwɛlɔ kande koleki dimɛna. Oyindjelo wa lokombo laki Jehowa mbele dui dioleki ohomba l’andja w’otondo.—Mateo 6:9, 10.
ANTO AMƆTSHI MBUTAKA ƆNƐ: “Asui wekɔ etenyi kɛmɔtshi ka sangwelo diaki Nzambi lo dikambo diaso.”
-
Kakɔna kayoyota?
LO TSHENA PE
Satana Diabolo nde l’Adama l’Eva mbele anto wa ntondo wele lo kiɔkɔ y’awui wa kɔlɔ wasalema l’andja ɔnɛ. Jehowa ndjakiyanyaka efula lo dikambo di’asui aso, ndo keem’edja, nde ayonya asui.
Ovuswelo
-
Kashi kakɔna kakatɛ Satana Diabolo Eva?
-
Etombelo akɔna wambonga l’ɔtɔmbɔkwɛlɔ waki Adama l’Eva le so sho tshɛ?
-
Ngande weyaso dia Jehowa ndjakiyanyaka dikambo di’asui aso?
SALA EYANGELO
Eka kɛnɛ kata Bible lo dikambo dia pɛkato.
Adia akambo akina wendana la dikambo diakonyiya Satana Diabolo l’ekambɔ k’Ɛdɛna.
“Lande na katshika Nzambi asui?” (Tshoto y’Etangelo, Ngɔndɔ ka ntondo 1, 2014)
Sɛdingola ekadimwelo w’ekeketshelo washa Bible lo dimbola dimɔtshi dia wolo.
Enda kɛnɛ kakeke pami kɛmɔtshi lo kɛnɛ kendana l’asui wakandɛnaka lo dihole diakandadjasɛka.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
