ISOMO 26

Habwaki Haroho Ebintu Ebibi n’Okubonabona?

TEKAHO

Ekintu ekibi muno obukibaho, kyabulikiro abantu kwekaguza ngu “Habwaki kibaireho?” Nikitusemeza muno ngu Baibuli egarukamu ekikaguzo kinu!

1. Sitaani akaletaho ata obubi omu nsi?

Sitaani Diabbolo akajeemera Ruhanga. Sitaani akaba n’agonza kulema abandi, nahabweki akaletera abantu ab’okubanza, Adam na Hawa, nabo kumweteranizaaho omu kujeemera Ruhanga. Kinu Sitaani akakikora obuyagambiire Hawa ekisuba. (Okubanza 3:1-5) Akamuletera kutekereza ngu haroho ekintu ekirungi Yahwe eky’akaba amwimire. Sitaani akaba n’amanyisa ngu abantu baakweyongire kusemererwa obubakujeemiire Ruhanga. Sitaani akabaza ekisuba ky’okubanza obuyagambiire Hawa ngu akaba atarukwija kufa. Enu niyo ensonga habwaki, Baibuli eyeta Sitaani ‘omubiihi kandi ise ebisuba.’—Yohana 8:44.

2. Adamu na Hawa bakacwamu kukora ki?

Yahwe akaha Adam na Hawa buli kimu kyona ekibabaka nibetaaga. Akagamba ngu bakaba basemeriire kulya ha muti gwona oguli omu rugonjo Adeni oihireho omuti gumu gwonka. (Okubanza 2:15-17) Baitu bo bakacwamu kulya ha muti ogubaali batangirwe. Hawa ‘akanoga ha byana byagwo, yalya.’ Hanyuma, Adamu “nauwe, yalya.” (Okubanza 3:6) Boona bakajeemera Ruhanga. Habwokuba Adam na Hawa bakaba bahikiriire, kyali kibahangiirwemu kukora ekihikire. Baitu bakacwamu kwanga kworobera Ruhanga, bakasiisa kandi bayanga obulemi bwe. Encwamu yabo ekabaleetera okubonabona kwingi muno.—Okubanza 3:16-19.

3. Encwamu ya Adamu na Hawa ekatukwataho eta?

Adamu na Hawa obubaasiisire, bakafooka abatahikiriire, nahabweki bakaleetera abaijukuru baabo nabo kuhikwaho obutahikirra. Baibuli ebazaaho Adamu eti: “Nkekibi okukyatahire omu nsi obwomuntu omu, kandi nokufa obwekibi; nukwo nokufa kwahikire kuti ha bantu bona.”—Abarumi 5:12.

Haroho ensonga ezirukwahukana habwaki tubonabona. Obwire obumu tubonabona habw’encwamu embi ezitukora. Obundi tubonabona habw’encwamu abantu abandi ezibakora. Kandi obwire obundi tubonabona habwokuba tusangirwe omu kiikaro nambere harukwija kuba ekizibu.—Soma Omugambizi 9:11.

YEGA EBIRUKUKIRAHO

Manya habwaki Ruhanga atarukujunaanizibwa habw’ebintu ebibi n’okubonabona okuli omu nsi kasumi kanu, n’omulingo ayehurramu obutuba nitubonabona.

4. Omuntu ow’arukujunaanizibwa habw’okubonabona kwaitu

Abantu baingi baikiriza ngu Ruhanga nuwe arukulema ensi yoona. Baitu ago mananu? Mutekeho VIDIYO.

VIDIYO: Noha Arukulema Ensi? (1:24)

Musome Yakobo 1:13 na 1 Yohana 5:19, hanyuma mubazeeho ekikaguzo kinu:

Ruhanga nuwe arukujunaanizibwa habw’obubi n’okubonabona?

5. Biki ebirugire omu bulemi bwa Sitaani

Mutekeho VIDIYO.

VIDIYO: Habwaki Ruhanga Alekereho Okubonabona?—Akacweka ka Vidiyo (3:07)

Soma Okubanza 3:1-6, hanyuma mubazeeho ebikaguzo binu:

Sitaani akabaza kisuba ki?—Rora orukarra 4, na 5.
Sitaani akalengaho ata kwoleka ngu haroho ekintu ekirungi Yahwe eky’akaba atarukugonza abantu batunge?
Sitaani akooleka ata ngu abantu tibarukwetaaga Yahwe kuba mulemi wabo kusobora kutunga okusemererwa?

Musome Omugambizi 8:9, hanyuma mubazeeho ekikaguzo kinu:

Akasumi Yahwe akamazire atarukulema ensi enu, kiki ekibaireho?

Adamu na Hawa bakaba bahikiriire kandi baikaraga omu rugonjo orurungi. Baitu bakahuliiriza Sitaani kandi bajeemera Yahwe
Hanyuma y’okujeema, ensi ekaijura ekibi, kubonabona hamu n’okufa
Yahwe naija kumaraho ekibi, okubanabona, n’okufa. Abantu nibaija kwongera babe abahikiriire kandi baikale omu rugonjo orurungi

6. Yahwe akwatwaho obutubonabona

Yahwe akwatwaho obutubonabona? Tekerezaaho ekintu Omukama Daudi n’omukwenda Petero baahandiikire. Musome Zabuli 31:7 na 1 Petero 5:7, hanyuma mubazeeho ekikaguzo kinu:

Nikikuletera kwehurra ota kumanya ngu Yahwe arora kandi akwatwaho obutubonabona?

7. Ruhanga naija kumaraho okubonabona kwona

Musome Isaya 65:17 na Okusuku’rwa 21:3, 4, hanyuma mubazeeho ekikaguzo kinu:

Habwaki nikihuumuza kumanya ngu Yahwe naija kumaraho okubonabona okuleserweho ebintu ebibi omu nsi?

Obaire okimanyire?

Sitaani obuyabalize ekisuba eky’okubanza, akahangirra Yahwe. Omu mulingo ogu, akasiisa ibara lya Yahwe nk’Omulemi omurungi kandi ow’okugonza. Omu kasumi akatali ka hara, Yahwe obwalimaraho okubonabona abantu okubarukurabamu, naija kweza ibara lye. Ekirukumanyisa ngu, naija kukigumiza kimu ngu obulemi bwe nubwo burukukirayo kuba burungi. Okweza ibara lya Yahwe eri nsonga nkuru muno omu buhangwa bwona.—Matayo 6:9, 10.

ABANTU ABAMU BAGAMBA: “Okubonaboba kiri kimu ha bigendererwa bya Ruhanga hali itwe.”

Iwe n’osobora kugarukamu ota?

OYEGERE KI?

Sitaani Diabbolo hamu n’abantu babiri ab’okubanza nubo barukujunaanizibwa habw’ebintu ebibi ebirukubaho omu nsi. Yahwe n’akwatwaho muno habw’okubonabona okurukutuhikaho, kandi omu kasumi akatali ka hara naija kukumaraho.