NGUDO 26
Ndi Ngani Hu Na Vhuvhi Na Tshengelo?
Musi hu tshi itea zwithu zwivhi, zwo ḓowelea u vhudzisa uri: “Ndi ngani zwi tshi khou itea?” Zwi a takadza u ḓivha uri Bivhili i a fhindula yeneyo mbudziso!
1. Saṱhane o ita hani uri hu vhe na vhuvhi shangoni?
Saṱhane Diabolo o shandukela Mudzimu. Saṱhane o vha a tshi ṱoḓa u vhusa vhaṅwe, ndi ngazwo o ṱuṱuwedza vhathu vha u thoma Adamu na Eva uri na vhone vha shandukele Mudzimu. Saṱhane o ita zwenezwi nga u zwifhela Eva. (Genesi 3:1-5) O ita uri Eva a humbule uri Yehova u khou mu dzima zwiṅwe zwithu zwavhuḓi. O amba uri vhathu vha ḓo takala nga maanḓa arali vha sa thetshelesi Mudzimu. Saṱhane o zwifhela Eva nga u mu vhudza uri a nga si fe. Ndi ngazwo Bivhili i tshi amba uri Saṱhane “ndi muzwifhi na khotsi a vhane vha zwifha.”—Yohane 8:44.
2. Adamu na Eva vho khetha u ita mini?
Yehova o sumbedza Adamu na Eva mafunda. O amba uri vha nga ḽa miri yoṱhe ya tsimuni ya Edeni nga nnḓa ha muri muthihi fhedzi. (Genesi 2:15-17) Fhedzi vho khetha u ḽa mutshelo wa wonoyo muri we ha pfi vha songo u ḽa. Eva o “fula mutshelo a ḽa.” Nga murahu Adamu “na ene a ḽa.” (Genesi 3:6) Adamu na Eva a vho ngo thetshelesa Mudzimu. Zwo vha zwi zwa nzulele uri Adamu na Eva vha ite zwo lugaho nga nṱhani ha uri vho vha vhe si na tshivhi. Fhedzi vho khetha u sa thetshelesa Mudzimu nga khole, vha ita tshivhi. Zwenezwo zwo sumbedza uri a vha ṱoḓi Mudzimu a tshi vha vhudza zwine vha tea u ita na zwine vha sa tee u zwi ita. Yeneyo phetho yo ita uri vha shengele nga maanḓa.—Genesi 3:16-19.
3. Zwe Adamu na Eva vha zwi ita zwo ri kwama hani?
U sa thetshelesa ha Adamu na Eva, zwo ita uri vha vhe na tshivhi nahone zwenezwo zwo ita uri vha pfukisele tshivhi kha vhana vhavho vhoṱhe. Bivhili i amba zwi tevhelaho nga ha Adamu, i ri: “Tshivhi tsho dzhena shangoni nga muthu muthihi, tshenetsho tshivhi tsha ḓisa lufu, lufu lwa ṱanganya vhathu vhoṱhe.”—Vharoma 5:12.
Ri khou shengela nga nṱhani ha zwiitisi zwo fhambanaho. Nga zwiṅwe zwifhinga, ri shengela nga nṱhani ha phetho dzi si dzavhuḓi dzine ra dzi ita. Nga zwiṅwe zwifhinga, ri shengela nga nṱhani ha phetho dzi si dzavhuḓi dzine vhaṅwe vha dzi ita. Nga zwiṅwe zwifhinga, ri shengela nga nṱhani ha zwiitea zwi songo lavhelelwaho.—Muhuweleli 9:11.
GUDANI ZWO ENGEDZEAHO
Vhonani uri ndi ngani hu si Mudzimu ane a ita uri hu vhe na zwithu zwivhi na tshengelo na uri u ḓipfa hani musi ri tshi shengela.
4. Ndi nnyi ane a khou ita uri ri shengele?
Vhathu vhanzhi vha humbula uri ndi Mudzimu ane a khou vhusa shango ḽoṱhe. Naa zwenezwo ndi ngoho? Ṱalelani VIDIO.
Vhalani Yakobo 1:13 na 1 Yohane 5:19, ni kone u fhindula mbudziso i tevhelaho:
-
Naa ndi Mudzimu ane a ita uri hu vhe na vhuvhi na tshengelo?
5. Ho itea mini u bva tshee Saṱhane a thoma u vhusa?
Vhalani Genesi 3:1-6, ni kone u fhindula mbudziso dzi tevhelaho:
-
Saṱhane o zwifha a ri mini?—Vhalani vese 4 na 5.
-
Saṱhane o pomoka hani Yehova uri u khou dzima vhathu zwithu zwavhuḓi?
-
U ya nga zwe Saṱhane a zwi amba, naa vhathu vha ṱoḓa u vhuswa nga Yehova u itela uri vha takale?
Vhalani Muhuweleli 8:9, ni kone u fhindula mbudziso i tevhelaho:
-
Ho itea mini nga tshifhinga tshee Yehova a vha a sa khou Vhusa shango?
-
Adamu na Eva vho vha vha tshi tshila Pharadisoni vha si na tshivhi. Fhedzi vho litsha u thetshelesa Yehova, vha thetshelesa Saṱhane
-
Musi Adamu na Eva vha tshi litsha u thetshelesa Mudzimu, zwo ita uri shango ḽi ḓale nga tshivhi, tshengelo na lufu
-
Yehova u ḓo fhelisa tshivhi, tshengelo na lufu. Vhathu vha ḓo dovha vha tshila Pharadisoni vha si tshee na tshivhi
6. Yehova u a kwamea musi ri tshi shengela
Naa Mudzimu u na ndavha nazwo musi ri tshi shengela? Ṱhogomelani zwe Khosi Davida na muapostola Petro vha zwi ṅwala. Vhalani Phisalema 31:7 na 1 Petro 5:7, ni kone u fhindula mbudziso i tevhelaho:
-
Ni ḓipfa hani nga u ḓivha uri Yehova u a zwi vhona nahone u a kwamea musi ri tshi shengela?
7. Mudzimu u ḓo fhelisa tshengelo yoṱhe
Vhalani Yesaya 65:17 na Nzumbululo 21:3, 4, ni kone u fhindula mbudziso i tevhelaho:
-
Ndi ngani zwi tshi khuthadza u ḓivha uri Yehova u ḓo fhelisa zwithu zwoṱhe zwine zwa ita uri vhathu vha shengele?
Naa no vha ni tshi zwi ḓivha?
Musi Saṱhane a tshi zwifha tsimuni ya Edeni, o tshinya dzina ḽa Mudzimu. Saṱhane o ita uri vhathu vha humbule zwithu zwi si zwavhuḓi nga ha Yehova musi a tshi amba uri Mudzimu ha Vhusi zwavhuḓi nahone ha na lufuno. Hu si kale Yehova u ḓo fhelisa tshengelo. Zwenezwo zwi ḓo ita uri a ṱanzwe dzina ḽawe ḽe ḽa ḓodzwa matope. Zwenezwo zwi ḓo sumbedza uri ndi ene muvhusi wa khwinesa u fhira vhoṱhe. U ita uri dzina ḽa Mudzimu ḽi vhe ḽikhethwa, ndi one mafhungo a ndeme u fhira oṱhe fhethu hoṱhe.—Mateo 6:9, 10.
VHAṄWE VHATHU VHA AMBA URI: “Mudzimu o vha a tshi ṱoḓa uri ri shengele.”
-
Inwi ni nga ri mini?
NO GUDA MINI?
Saṱhane Diabolo na Adamu na Eva ndi vhone vho itaho uri hu vhe na vhuvhi kha ḽifhasi. Yehova u a kwamea vhukuma musi ri tshi shengela nahone hu si kale u ḓo fhelisa tshengelo.
Ni Kha Ḓi Zwi Humbula?
-
Saṱhane Diabolo o ri mini musi a tshi zwifhela Eva?
-
U sa thetshelesa ha Adamu na Eva zwo ri kwama hani?
-
Ri zwi ḓivha hani uri Yehova u a kwamea musi ri tshi shengela?
WANANI ZWO ENGEDZEAHO
Gudani uri Bivhili i amba uri tshivhi ndi mini.
Gudani zwo engedzeaho nga ha zwe Saṱhane Diabolo a zwi amba tsimuni ya Edeni.
“Ndi Ngani Mudzimu A Tshi Tendela Tshengelo?” (Tshiingamo, 1 March 2014)
Wanani phindulo dzi khuthadzaho dza mbudziso i konḓaho.
Vhonani uri muṅwe munna o guda mini nga ha u shengela.
Yehova O Ita Uri Ndi Ḓivhe Uri Ndi Khou Tshilela Mini (5:09)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
