Iluwakɛɛ Adamɩ nɩɩ Yifi bɛátiye Nyamɩnlɩ nɩ ti yɛ yɛyɛ tanɩ, yɛnwʋ amanɩyɛ, na yewu a. a Naasʋ̃ yɛ anyɩnlɩlazʋ ɩlɛ́sanlɩ. Gyehova iluwalɩ yɩ Ɣa Gyisɛsɩ Kɩlayɩsɩ zʋ ɩyɛlɩ nhyɩhyɛlɩyɛ na ɩava iale yɛ wɔ tanɩ nɩɩ owulo amʋnlɩgulɩyɛ tʋ. Bayɩbʋlʋ yɩ ikilehile kɛɛ, Gyisɛsɩ iluwa yi owulo yɩ zʋ yɛ ileli yɛ a. Elelɛdɩyɛ ɩdɩ dɩyɛ be mɔɔ botuwa bɛfa bede abiye. Gyisɛsɩ yɩ nnwʋanlɩ mɔɔ idi munli nɩ yɛ ɩva iduwalɩ elelɛdɩyɛ nɩ a. (Kɩnga Matiyu 20:28.) Nɩ Gyisɛsɩ ɩwɔ ɔnwʋmɔ ɔhʋanɩ kɛɛ ɩbʋwa azɩlɛ yɩ zʋ daabaa iluwakɛɛ nɩ idi munli na nɩ ɩyɛ sutiye ɩma Gyehova. Naasʋ̃ ɩzʋ̃ yɩ pɛ nu iwuli ɩmanlɩ yɛ na ama yɛ sa ɩahã dɩyɛ mɔɔ ivili Adamɩ nɩɩ Yifi bɛ sa nɩ. Gyisɛsɩ ɩlalɩ yɩ ali kɛɛ ɩ nɩɩ Gyehova munwala bɔdɔ yɛ. Ozumalɛdɩyɛ eyi ɩkɔwʋwa yɛ ma yekehile anyɩnlɩzɔlɛ yɛkɛma Gyisɛsɩ yi owulo nɩ.

1. Mɩnla mfasʋ yɛ yɛkɔhʋla yekenyia wɔ Gyisɛsɩ yi owulo zʋ wɔ nnɛ a?

Iluwakɛɛ yɛdɩ tanɩyɛlɛmaa ti, yɛyɛ nninyeni sʋ̃maa mɔɔ ɩázɔ Gyehova anyɩ. Naasʋ̃, sɛ yɛyɛ tanɩ na yɛzʋ̃ yɛ ahʋnlɩnɩ nu yenu yɛ nwʋ na yesiã Gyehova yɩ ɛkɛnɩ tanɩfakyɛ iluwa Gyisɛsɩ zʋ, na yɛyɛ mɔɔ yɛkɔhʋla bela kɛɛ yelésia yɛkɛyɛ ɔzɔ tanɩ nɩ dɔkʋ̃ a, sa yɛkʋla yɛ nɩɩ Nyamɩnlɩ nyia ɔhɔnwʋvalɛ mɔɔ numɔ ɩyɛ sɩ. (1 Dwɔɔnʋ 2:1) Bayɩbʋlʋ yɩ ɩkã kɛɛ: “Kɩlayɩsɩ yɩzayɩ munli ɩnwʋnlɩ amanɩyɛ ɔkʋ̃ kyeinyii wɔ abiyela yɩ tanɩ ti. Mɛyɩ mɔɔ ɩdɩ ɛdɩnɣɛlɛnii nɩ, ɩnwʋnlɩ amanɩyɛ ɩmanlɩ tanɩyɛlɛmaa, ama iale mʋnlʋmmɔ ɩahɔ ɩama Nyamɩnlɩ.”—1 Pita 3:18.

2. Mɩnla mfasʋ yɛ yekenyia wɔ Gyisɛsɩ yi owulo yɩ zʋ wɔ eɣile be a?

Gyehova ɩzʋ̃manlɩ Gyisɛsɩ ma ɩvalɩ yɩ nnwʋanlɩ mɔɔ idi munli nɩ ɩwɔlɩ afɔlɩ “ama abiyela mɔɔ ikele [Gyisɛsɩ] ikeli nɩ iáwuli mfomi ianyia nnwʋanlɩ mɔɔ íni awielɩyɛ.” (Dwɔɔnʋ 3:16) Iluwa mɔɔ Gyisɛsɩ ɩyɛlɩ nɩ ti, ɩlɛ́kyɛ Gyehova ɩkɛyɩ nninyeni tanɩ mɔɔ Adamɩ yɩ azʋ̃nzɩzɩbɛ ɩva ɩɣa munwatĩĩ wɔ ɛkɛnɩ. Eyi ikile kɛɛ, sɛ yenyia Gyisɛsɩ yɩ afɔlɩwɔlɛ yi nu dedi a, sa yɛkʋla yɛbʋwa azɩ daabaa wɔ paladayɩsɩ azɩlɛ yɩ zʋ!—Ayɩzaya 65:21-23.

 SUMÁ SƲ̃MAA

3. Gyisɛsɩ yi owulo yɩ ɩma yenyia fanwʋdi wɔ tanɩ nɩɩ owulo nwʋ

1. Nɩ Adamɩ ɩdɩ abiye mɔɔ idi munli naasʋ̃ ɩyɛlɩ Nyamɩnlɩ zʋ azʋ̃nzɩzɩbɛ na iluwa eyi ti yɛ adasamaa bɛyɛ tanɩ na bowu a

2. Nɩ Gyisɛsɩ ɩdɩ abiye mɔɔ idi munli na idiyeli Nyamɩnlɩ. Na iluwa mɔɔ ɩyɛlɩ ti, adasamaa benyia ɔnwʋmɔ ɔhʋanɩ kɛɛ bekeli munli na bɛawʋwa azɩ daabaa

4. Abiyela kɔhʋla kenyia Gyisɛsɩ yi owulo yɩ zʋ mfasʋ

 5. Elelɛdɩyɛ nɩ ɩdɩ Gyehova yɩ akyɛdɩ mɔɔ ɩva ɩma wʋ

Gyehova yɩ ɔhɔnwʋmmɔ bobu elelɛdɩyɛ nɩ kɛɛ akyɛdɩ mɔɔ ɩva ɩma bɛ. Kɛ ndianwʋ nɩ, kɩnga Galatiyiamaa 2:20, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ sʋ̃mavʋlɔ Pɔɔlʋ ihileli kɛɛ ibu elelɛdɩyɛ nɩ kɛɛ akyɛdɩ mɔɔ Gyehova ɩva ɩma yɩ a?

Mmɩlɩ mɔ Adamɩ ɩyɛlɩ tanɩ nɩ, bowuli ɩ nɩɩ yɩ tʋmaa munwala owulofɔ. Naasʋ̃ Gyehova ɩzʋ̃manlɩ yɩ Ɣa nɩ ma ɩɣa iwuli kɛmɔ ɩkɛyɛ a, yekenyia ɔnwʋmɔ ɔhʋanɩ yɛkɔwʋwa azɩ daabaa.

Mmɩlɩ mɔ ɛkɩngaa ɛhɛlɛlɛ odwokɔ mɔɔ ili ɛkɛnɩ nɩ, tuá nwʋmɔ mfonyini kila kezimɔ ɩkɛyɛ kɛɛ Gyehova ɩdɩlɩ nɣanlɩ, wɔ mmɩlɩ mɔ nɩ yɩ Ɣa yɩ ɩnwʋʋ amanɩyɛ nɩ. Kɩnga Dwɔɔnʋ 19:1-7, 16-18, na akʋ̃ bozunzú odwokɔɣizialɛ eyi nwʋ:

• Kɛ ɛtɩ nɣanlɩ ese wɔ mɔɔ Gyehova nɩɩ Gyisɛsɩ bɛyɛ bɛma wʋ nɩ nwʋ a?

 YƖ DƆKƆWƆLƐ

Iluwakɛɛ Gyisɛsɩ iwuli nɩ ti, Gyehova ɩkɔhʋla ɩkɛva yɛ tanɩ ɩkɛhyɛ yɛ na yɛahʋla yɛawʋwa azɩ daabaa.

Kɛ Okowuwa Ekeze a?

• Mɩnla ti mɔɔ Gyisɛsɩ iwuli a?

• Mɩnla ɔhʋanɩ zʋ yɛ Gyisɛsɩ yɩ nnwʋanlɩ mɔɔ idi munli nɩ ɩdɩ elelɛdɩyɛ mɔɔ ɩfata a?

• Mɩnla ɔhʋanɩ zʋ yɛ Gyisɛsɩ yi owulo nɩ ɩkɔhʋla ɩkɔwʋwa wʋ a?