Adanampi Evampejj janiw Diosar istʼapkänti. Ukatwa jiwasajj juchararätansa, tʼaqestansa, jiwaraktansa. a Ukampis juchampit jiwañampit jiwasar salvañatakejja, Jehová Diosajj Jesucristo Yoqaparuw khitanïna. Jesusajj jiwatapampiw jiwañat kutsuyistu sasaw Bibliajj yatichi. Jiwasar juchampit jiwañampit kutsuyañatakejja, Jesusajj perfecto vidap churasaw pagawayi (Mateo 20:28 liytʼäta). Jesusajj aka oraqen wiñay jakañatak derechonïkchïnsa, jiwasanak layku jiwañwa ajllïna. Ukham lurasaw kuntï Adanampi Evampejj aptʼawayapki uk mayamp katoqañasatak mä suytʼäwi churistu, Jehová Diosajj qhawqsa munasistu uksa amtayarakistuwa. Aka yatichäwejj Jesusan jiwatapat yuspärañatakiw yanaptʼistani.

1. ¿Kunjamsa Jesusan jiwatapajj yanaptʼistu?

Pantjasir jaqenakjamajja, kunanakatï Jehová Diosar jan gustki ukanakwa lurtanjja. Ukampis taqe chuyma juchanakasat arrepentisisasa Diosar Jesús toqe perdón mayisisasa, Jehová Diosampejj jukʼamp sumaw apassna. Kuna jan walinaktï lurkayätan ukanak jan lurjjañatakis chʼamachasiñasarakiwa (1 Juan 2:1). Bibliajj akham siwa: “Cristow juchanak laykojj mä kutiki jiwäna, mä arunjja cheqapar sarnaqer mä jaqew jan cheqapar sarnaqer jaqenak laykojj jiwäna, ukhamatwa jumanakarojj Diosampi sumankthapipjjañamatak yanaptʼapjjtamjja” sasa (1 Pedro 3:18).

2. ¿Kunjamsa Jesusan jiwatapajj jutïrin yanaptʼistani?

Jehová Diosaw yoqaparojj jiwas layku jiwañapatak khitanïna, “ukhamat taqe khitinakatï [Jesusar] confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” (Juan 3:16). Adanan jan istʼasitapat kuna jan walinakatï utjawayki ukanakjja, Jehová Diosajj Jesusan jiwatap toqew qʼal chhaqtayani. Jiwasatï Jesusan jiwatapar confiyañänejja, aka oraqejj mä suma paraisöjjani ukhajj wiñayatakiw jakañäni (Isaías 65:21-23).

 JUKʼAMP YATJJATAÑÄNI

3. Jesusan jiwatapajj juchampit jiwañampitwa salvistu

1. Adán chachajj perfecto jaqënwa, ukampis Jehová Diosar jan istʼasajj juchampir jiwañampiruw aptʼawayistu.

2. Jesusajj perfecto jaqënwa, jupajj Diosar istʼasaw sarnaqäna, ukhamatwa jaqenakan perfectöpjjañapataki ukhamarak wiñay jakapjjañapatak mä thak jistʼarawayi.

4. Jesusan jiwatapajj taqeniruw yanaptʼistu

 5. Jesusan jiwatapajj Jehová Diosan mä suma regalopawa

Jehová Diosan amigonakapajja, Jesusajj jupa layku jiwatap sumwa amuyapjje. Kunatsa ukham sistan uk amuyañatakejja Gálatas 2:20 liytʼapjjäta, ukatjja aka toqetwa parltʼapjjäta:

• Jesusan jiwatapajj jupatak mä regalökaspas ukham uñjatapjja, ¿kuna arunakampis apóstol Pablojj uñachtʼayäna?

Adanajj juchachaskäna ukhajja, jupasa taqpach wawanakapasa jiwañar aljantatäpjjänwa. Ukampis Jehová Diosaw Yoqaparojj jiwasanak layku jiwañapatak aka oraqer khitanïna, ukhamat jumajj wiñay jakañ katoqañamataki.

Aka aynachan utjki uka versiculonak liytʼasajja, Yoqapar tʼaqesiskir uñjasajj qhawqsa Jehová Diosajj chuymap usuyaspachäna uk amuytʼam. Juan 19:1-7, 16-18 liytʼasajja aka toqetwa parltʼapjjäta:

• ¿Kuntï Jehová Diosas Jesusas juma layku lurapki uk yatiñajj kunjamakis jumatakejja?

 ¿KUNSA YATEQAWAYTAN?

Jesusan jiwatapatwa Jehová Diosajj juchanakas perdonistu, jutïrin wiñayatak jakasiñatakis mä suytʼäwi churarakistu.

Amtañataki

• ¿Kunatsa Jesusajj jiwäna?

• ¿Kunjamsa Jesusajj jakäwip “ukhat ukha churasajj” taqe jaqenakar juchat kutsuyäna?

• ¿Kunjamsa Jesusan jiwatapajj jumar yanaptʼtamjja?