Kokenem ḇe snonggaku ḇesasar, koḇekandera, mura na komar kukro sinan ḇepon koḇesu, Adam ma Eva su, susouser faro Manseren Allah ḇa. a Ḇape kenem koḇena nari ryadine ker ke? Oroḇa. Yahwe fyasos nyan kwar fa komkei ro sasar ma marmar ya. Ifrur roi ine roro Roma Ḇyedi, Yesus Kristus i. Refo ya doḇe Yesus imar ḇe farsarser fa fyasos fasaspar ya. Yesus byuk kenem ḇemnis kaku ḇyeja kwar fa byukbak namuk snonggaku koine. (Kowasya Matius 20:28.) Yesus ima bisa ikenem isof fyoro-fyoro ro supswan ine. Ḇape, manggundi imarisen imarwarek ko insama kosmai kaḇer roi Adam ma Eva sufrur fa napromes kwar anya. Roi Yesus ifrur nane nfasnai manggundi ma Yahwe suswar fafaya ko. Wafarkor ro farkarkor ine wer ido, nari wakofen kasumasa kaku kukro wafawi Yesus imarwarek ko kwar.

1. Rariso Yesus marmar ḇyedi dun payamyum ḇe ko ro fafisu ine rai?

Koine snonggaku ḇesasar siko, inja na kofrur ker roi Yahwe imewer na. Imbape, kofawi kosasar kwar ma kor faro Yahwe roro snonsnon Yesus Kristus fa byuk ampun ḇe ko, mura kosewar fa komnai kofrur sasar anna ido, nari wis koḇena kuker Manseren Allah napyum kaḇer. (1 Yohanes 2:1) Refo ya ikofen radine, ’Kristus manggundi imar ḇeoser isof fyoro-fyoro snar snonggaku sya sasar sena, snonggaku oser ḇesasar ḇa imar sadwer ḇefrur sasar sya. Kristus ifrur rarirya insa dun ko faro Allah.’​—1 Petrus 3:18.

2. Rariso Yesus marmar ḇyedi dun payamyum ḇe ko ro fafisu iyama rai?

Yahwe iwan Yesus i ḇe supswan ine fa byuk kankenem ḇemnis kaku ḇyeja ’insa snonggaku ḇekyar faro [Yesus] i sya sro ḇa, mboi sismai kankenem fyoro’. (Yohanes 3:16) Yesus imarisen imarwarek ko, inja nari Allah Yahwe ipyos roi ḇeḇye ḇa ḇejadi kukro Adam soasuser ḇa ḇyena. Rarirya, kofasnai kakyar faro Yesus marmar ḇyedine kada, nari kaksmai swaf fa kokenem isof fyoro-fyoro ro firdaus ro supswan ine!​—Yesaya 65:21-23.

 SWEWAR KAKU WER

3. Yesus marmar ḇyedi imkei ko ro sasar ma marmar ya

1. Adam ima snonggaku ḇemnis kaku, mboi isouser Manseren Allah ḇa ma dun snonggaku sya ḇe sasar ma marmar ya

2.   Yesus ima snonggaku ḇemnis kaku ma isouser Manseren Allah ma dun snonggaku sya ḇe payamyum ma kankenem fyoro ya

4. Yesus marmar ḇyedi na dun payamyum ḇe snonggaku syakam

5. Farsarser ḇaḇyak ḇebuk fasaspar ima roi ḇepyum Yahwe byuk ḇe Au nairi

Snonggaku ḇebati kuker Yahwe I sya smam farsarser ḇaḇyak ḇebuk fasaspar ḇe roi ḇepyum Yahwe byuk ḇe si. Kowasya Galatia 2:20, raimnai kawos fakfuken ine:

• Rariso Manwawan Paulus fyasnai ima myam farsarser ḇaḇyak ḇebuk fasaspar ḇe roi ḇepyum Yahwe byuk ḇe i?

Fafisu Adam isapi ro sasar anya, manggundi ma up ḇyesya kam sismai samamyai marmar ya. Ḇape, Yahwe iwan Roma Ḇyedi fa imarwarek ko insama kaksmai swaf fa kokenem fyoro-fyoro.

Rofyor wawasya mnuk-mnuk ḇerama nane, wawasen moḇsa Yahwe ḇyaḇir rai fafisu myam Roma Ḇyedi ḇyekandera fafaya ḇa. Kowasya Yohanes 19:1-7, 16-18, raimnai kawos fakfuken ine:

• Fafisu wafawi rosai Allah Yahwe ma Yesus sufrur kwar ḇe Au na, moḇsa ḇaḇir rai?

 FARKARKOR ḆYENA

Yesus marmar ḇyedi ḇyas nyan ḇe Yahwe I fa byuk ampun faro sasar ḇarḇor koḇena, ma nbuk swaf fa kaksmai kankenem ḇekain fyoro ya.

Waswarepen Kaḇer

• Rosai ḇefnai fa Yesus imardi?

• Snar Yesus ima snonggaku ḇemnis kaku raris Adam i, inja rosai syambraḇ fa ifrur ya?

• Rariso Yesus marmar ḇyedi dun payamyum ḇe Au rai?