Hmasa bik nupa, Adam le Evi nih Pathian nawl an ngaih lo caah misual kan si, sifah harnak kan tong i kan thi. a Asinain kan caah ruahchannak a um lo tinak a si lo. Jehovah nih a Fapa, Jesuh Khrih thawngin sualnak le thihnak in kan luat khawh nakhnga lam a kan timhtuahpiak. Jesuh nih a thihnak thawngin tlanhnak man a kan pek tiah Baibal nih a kan cawnpiak. Tlanhnak man timi cu mi pakhat luatter awkah a man pekmi kha a si. Jesuh nih a pekmi man cu a sunglawi tukmi a tlingmi minung a nunnak kha a si. (Matthai 20:28 rel.) Jesuh cu vawleicung ah zungzal in a nung kho. Asinain kan caah lungtho tein a nunnak a pek caah Adam le Evi nih an rak sunghmi thil vialte kha kan hmuh ṭhan khawh. Jesuh nih amah le Jehovah nih zeitlukin dah an kan dawt ti zong kha a langhter. Mah cawn dingmi kong nih Jesuh thihnak kha sunsak chin awkah aan bawmh lai.

1. Tuchan ah Jesuh thihnak in zeitindah ṭhathnemhnak kan hmuh khawh?

Misual kan si caah Jehovah lung a lawmhter lomi thil kha voi tampi kan tuah. Asinain kan sualnak kha lungtak tein kan i ngaihchih, Jesuh Khrih min in Jehovah sinah ngaihthiam kan hal i mah sualnak kha kan tuah ṭhan ti lo ahcun Pathian he a ṭhami pehtlaihnak kan ngei kho lai. (1 Johan 2:1) Baibal nih hitin a ti: “Khrih hrimhrim zong kha nanmah caah a thi i sualnak ruangah khan voikhat ah za lakin a thi; nannih cu Pathian sin i kalpi awk caah khan miṭha cu miṭhalo mi hna ruangah a thi.”—1 Peter 3:18.

2. Hmailei ah Jesuh thihnak in zeitindah ṭhathnemhnak kan hmuh khawh?

Jehovah nih Jesuh kha a tlingmi minung a nunnak pek awkah a thlah, “cucaah amah [Jesuh] a zummi poah cu an thi lai lo zungzal nunnak an ngei lai.” (Johan 3:16) Jesuh tuahmi thil thawngin Jehovah nih Adam nawlngaih lonak ruangah a chuakmi thil ṭha lo vialte kha a rauhhlan ah a kan hlohpiak dih cang lai caah kan i lawm tuk. A sullam cu Jesuh raithawinak kan zumh kha kan langhter ahcun vawlei paradis ah zungzal nunnak caanṭha kan hmu lai tinak a si.—Isaiah 65:21-23.

 TAM DEUH IN HLATHLAI

3. Jesuh thihnak nih sualnak le thihnak in a kan luatter

1. Adam cu Pathian nawl a ngai lomi le mi pawl kha sualnak le thihnak lam ah a hruaitu hna mitling pakhat a si

2. Jesuh cu Pathian nawl a ngaimi le mi pawl kha zungzal nunnak lam ah a hruaitu hna mitling pakhat a si

4. Jesuh thihnak nih mi vialte kha ṭhathnemhnak a pek khawh hna

 5. Tlanhnak cu Jehovah nih aan pekmi laksawng a si

Jehovah hawile nih tlanhnak man kha anmah pumpak laksawng in an hmuh. Tahchunhnak ah, Galati 2:20 rel law mah biahalnak hi i ruah u:

• Tlanhnak man kha amah pumpak laksawng in a hmuh ti kha lamkaltu Paul nih zeitindah a langhter?

Adam nih sualnak a tuah tikah amah le a tefa vialte cu thihnak lam ah an phan dih. Asinain Jehovah nih a Fapa kha a nunnak pek dingin a thlah caah nangzong zungzal nunnak caanṭha na hmu kho.

A tanglei Baibal caang hna na rel lioah a Fapa nih sifah harnak a ton tikah Jehovah cu zeitindah a um lai ti kha na mitthlam ah cuanter. Johan 19:1-7, 16-18 rel law mah biahalnak hi i ruah u:

• Jehovah le Jesuh nih na caah an in tuahpiakmi thil kong he aa tlaiin zeitindah na um?

 A TAWINAK

Jesuh thihnak thawngin Jehovah nih kan sualnak kha a kan ngaihthiam i zungzal in kan nung kho.

I Ruahṭi Ṭhannak

• Jesuh cu zeicah a thih?

• Jesuh nih tlanhnak man caah a tlingmi minung a nunnak kha zei ti lam in dah a rak pek?

• Jesuh thihnak nih zeitindah ṭhathnemhnak aan pek khawh?