Osiandɛ nyimpa beenu a wodzi kan, Adam na Eve, enntsie Nyankopɔn ntsi, ama yɛyɛ bɔn, yehu amandze, na yewu. a Naaso yɛwɔ enyidado. Jehovah ebue kwan bi ama hɛn. Ɔnam ne Ba Jesus Christ do bɛgye hɛn efi bɔn na owu ndom ase. Bible no ma yehu dɛ, Jesus wui dze yɛɛ werdam maa hɛn. Sɛ wɔka werdam a, ɔkyerɛ dɛn? Werdam yɛ biribi a wotua dze gye obi. Jesus no nkwa a odzi mu no na ɔdze yɛɛ werdam no. (Kenkan Matthew 20:​28.) Nna Jesus wɔ ho kwan a obotum dze atsena asaase do daa. Naaso ofi ne pɛ mu wui maa hɛn, dɛ mbrɛ ɔbɛyɛ a hɛn nsa botum aka biribiara a Adam na Eve hweree no. Dza Jesus yɛe no san so ma yehu dɛ ɔno na Jehovah dɔ hɛn paa. Adzesua yi bɔboa wo ma aakyerɛ Jesus no wu no ho enyisɔ kɛse paa.

1. Yebesi dɛn enya Jesus no wu no do mfaso ndɛ?

Osiandɛ yɛyɛ ndzebɔnyɛfo ntsi, ndzɛmba pii wɔ hɔ a yɛyɛ a Jehovah mmpɛ. Naaso sɛ yɛyɛ bɔn na sɛ yenu hɛnho ampa, na yɛfa Jesus do bɔ Jehovah mpaa dɛ ɔmfa hɛn bɔn nkyɛ hɛn, na yɛyɛ dza yebotum biara annyɛ dɛm bɔn no bio a, ɔdze bɛkyɛ hɛn, na yɛnye Nyankopɔn ntamu bɛyɛ kamakama. (1 John 2:1) Bible no ka dɛ: ‘Bɔn ntsi Christ wui prɛko, nyia ɔtsen wui maa hɔn a wɔnntsen, ma ɔdze hɛn aakɔ Nyankopɔn nkyɛn.’​—1 Peter 3:18.

2. Yebesi dɛn enya Jesus no wu no do mfaso daakye?

Jehovah somaa Jesus dɛ ɔmfa no nkwa a odzi mu no mbɔbɔ afɔr mma hɛn “ama obiara a ɔgye [Jesus] dzi no ɔaannhera, na [mbom] oeenya onnyiewiei nkwa.” (John 3:​16) Jesus n’adaworom ntsi, ɔrennkyɛr biara, Jehovah beyi ndzɛmba bɔn a Adam n’asoɔdzen akɛfa aba no nyina efi hɔ. Iyi kyerɛ dɛ sɛ yenya gyedzi wɔ Jesus n’afɔrbɔ no mu a, yebenya ho kwan dze enyigye atsena ase daa wɔ Paradise!​—Isaiah 65:​21-​23.

 PƐNSAPƐNSA MU KƆ EKYIR

3. Jesus no wu no gye hɛn fi bɔn na owu mu

1. Nna Adam yɛ nyimpa a odzi mu, naaso osiandɛ oenntsie Nyankopɔn ntsi, ama nyimpa nyina yɛ bɔn na wowuwu

2. Nna Jesus yɛ nyimpa a odzi mu, na osiandɛ otsiee Nyankopɔn ntsi, nyimpa botum edzi mu bio na wɔaatsena ase daa

4. Adasamba nyina botum enya Jesus no wu no do mfaso

 5. Werdam no yɛ akyɛdze bi a Jehovah dze ama wo

Jehovah ne nyɛnko biara bu werdam no dɛ akyɛdze a Jehovah dze ama no. Dɛ nhwɛdo no, ma yɛnkenkan Galatiafo 2:​20, na yensusu asɛmbisa yi ho:

• Ebɛn asɛm na ɔsomafo Paul kae dze kyerɛɛ dɛ obu werdam no dɛ ɔyɛ akyɛdze bi a Jehovah dze ama no?

Adam yɛɛ bɔn no, ɔkɛfaa owu bɛsaan ɔno na ne mba a ɔbɔwo hɔn nyina kɔn mu. Naaso, Jehovah somaa ne Ba no dɛ ombowu mma wo, ama eetum atsena ase daa.

Yɛrebɛkenkan kyerɛwsɛm bi. Sɛ yɛrekenkan a, ɔyɛ a dwendwen mbrɛ ɔbɛyɛ dɛ Jehovah tsee nka aber a nna ne Ba no ruhu amandze no ho. Ma yɛnkenkan John 19:​1-7, 16-​18, na yensusu asɛmbisa yi ho:

• Dza Jehovah na Jesus ayɛ ama wo no, etse nka dɛn wɔ ho?

 DZA ESUA

Osiandɛ Jesus wui ntsi, Jehovah botum dze hɛn bɔn akyɛ hɛn na yaatsena ase daa.

Mbobɔdo

• Ebɛnadze ntsi na Jesus wui?

• Ebɛn kwan do na afɔr a Jesus bɔe no gye hɛn fi bɔn na owu mu?

• Ibesi dɛn enya Jesus no wu no do mfaso?