LÉSON 27
Kouman lanmò Jézi pouvé sové nou ?
Nou ka péché a, soufri ké mouri paské Adan ké Èv pa obéyi Jéova (gadé nòt-a). Mé tout bagaj pa pédi. Jéova voyé so Pitit Jézi pou libéré nou di péché-a ké lanmò-a. Labib-a ka di ki, gras a so lanmò, Jézi péyé roun ranson. Ranson-an, a sa ou ka péyé pou libéré roun moun. Jézi bay so lavi parfè pou péyé ranson-an (li Matthieu 20:28). Jézi té gen drwa viv pou tout-tan asou latè-a, mé i asèpté mouri pou nou, é a konsa nou pouvé routrouvé tousa Adan ké Èv pédi. Lanmò Jézi ka montré nou osi kouman Jéova ké Jézi kontan nou. Sa léson-an ké idé ou bay plis valò pou sakrifis Jézi fè-a.
1. Kouman lanmò Jézi pouvé idé nou dipi aprézan ?
Nou pa parfè, a pou sa nou ka fè bokou bagaj ki ka fè Jéova lapenn. Mé gras a sa Jézi fè pou nou, nou pouvé rété zanmi ké Bondjé si nou ka vréman rigrété nou péché, doumandé l’ pardon o non di Jézi Kris é fè tousa nou pouvé pou pa roukoumansé sa nou fè ki pa té bon (1 Jean 2:1). Labib-a ka di : « Kris mouri roun bon kou pou péché-ya, roun moun ki jis mouri pou moun ki pa jis, pou zòt pouvé byen ké Bondjé » (1 Pierre 3:18).
2. Kouman lanmò Jézi ké idé nou pita ?
Jéova voyé Jézi asou latè-a pou bay so lavi parfè « pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:16). Gras a sakrifis Jézi, Jéova ké fini nèt ké tout mové bagaj ki ka rivé paské Adan dézobéyi. Sa lé di ki si nou gen lafwa annan sakrifis Jézi, nou ké pouvé viv pou tout-tan annan paradi-a asou latè-a (Isaïe 65:21-23).
ANNOU FOUYÉ ANNAN LABIB-A
Annou anprann plis bagaj asou poukisa Jézi mouri pou nou é kouman sa pouvé idé ou.
3. Sakrifis Jézi ka libéré nou di péché-a ké lanmò-a
Gadé VIDÉYO-a, épi kozé asou késyon-an :
-
Kisa Adan pédi lò i dézobéyi Bondjé ?
Li Romains 5:12, épi kozé asou sa késyon-an :
-
Kisa péché Adan mennen pou nou ?
Li Jean 3:16, épi kozé asou sa késyon-an :
-
Poukisa Jéova voyé so Pitit asou latè-a ?
-
Adan té roun wonm parfè. Mé paské i dézobéyi, tout moun ka péché ké mouri.
-
Jézi té roun wonm parfè. É paské i obéyi, tout moun pouvé gen roun lavi parfè ké viv pou tout-tan.
4. Lanmò Jézi pouvé idé tout moun
Gadé VIDÉYO-a, épi kozé asou sa késyon-an :
-
Kouman lanmò rounsèl wonm pouvé idé tout moun ?
Li 1 Timothée 2:5, 6, épi kozé asou sa késyon-an :
-
Adan té roun wonm parfè, mé paské i péché, tout moun ka péché ké mouri. Jézi osi a té roun wonm parfè. Poukisa Labib-a ka di ki i sa roun « ranson ki ka korèsponn » pou nou tout ?
5. Ranson-an a roun kado di Jéova pou ou
Pou zanmi Jéova-ya, ranson-an a roun kado ki vréman èspésyal. Parèkzanp, li Galates 2:20, épi kozé asou sa késyon-an :
-
Kouman apot Pòl montré ki i té savé ki ranson-an a té roun kado di Bondjé pou li ?
Paské Adan péché i mouri é nou tout ka mouri osi. Mé Jéova bay lavi so Pitit pou ou gen chans viv pou tout-tan.
Li Jean 19:1-7, 16-18. Toupannan ou ka li vèrsé-ya, imajiné kisa Jéova rousanti lò i té ka wè so Pitit soufri, épi kozé asou sa késyon-an :
-
Kisa ou ka rousanti lò ou ka wè sa Jéova ké Jézi fè pou ou ?
SI ROUN MOUN DOUMANDÉ OU : « Kouman lanmò rounsèl wonm pouvé sové tout moun ? »
-
Kisa ou té ké réponn ?
SA NOU WÈ
Gras a lanmò Jézi, Jéova pouvé pardonnen nou péché. Gras a lanmò Jézi nou pouvé osi viv pou tout-tan.
Kisa ou anprann
-
Poukisa Jézi té divèt mouri ?
-
Poukisa lanmò Jézi pouvé sa roun « ranson ki ka korèsponn pou tout moun » ?
-
Kouman lanmò Jézi pouvé idé ou ?
SA OU POUVÉ TRAPÉ OSI
Poukisa nou ka di ki lavi parfè Jézi-a sa roun ranson ?
« Poukisa sakrifis Jézi pouvé sa roun ‘ranson pou bokou moun’ ? » (artik jw.org)
Gadé sa nou bézwen fè pou nou sové.
Ès Jéova ka pardonnen péché ki grav ?
Gadé kouman sakrifis Jézi idé roun mouché chanjé.
a Nòt-a : « Péché-a » a pa sèlman roun mové bagaj roun moun ka fè. A osi sa ki ka pousé nou fè bagaj ki pa bon paské nou sa pitit Adan ké Èv.
